Эвел 25 - Гирами Китаб

Ибрагьимдин наслар ва дугъан аьжал

¹ Ибрагьимди чаз сарсана, Кетура ччвур али, хпир хуру.

² Кетурайикан дугъаз Зимран, Юкшан, Медан, Мидьян, Ишбак ва Шуах баяр шулу.

³ Юкшандиз Шева ва Дедан кӀуру баяр шулу. Хъа Дедандиз баяр шулу ва гьадрарилантина ашурар, летушар ва леюмар кӀуру миллетар арайиз гъюру.

⁴ Мидьяндиз Эфа, Эфер, Ханух, Авид ва Элдаг кӀуру баяр шулу. Мурар вари Кетурайилантина гъахьи наслар вуйи.

⁵ Ибрагьимди чаз айиб вари Исакьдиз тувнийи.

⁶ Хъа Ибрагьимди, учв сагъди имиди, чан лукӀ-хпарикан гъахьи веледаризра багъишар тувну, чан бай Исакьдин багарихьан дурар ригъ гьудубчӀвру терефнан ругариина алдауру.

⁷ Ибрагьим варжна ургцӀурна хьуд йисан яшамиш гъахьнийи.

⁸ Думу лап кьаби духьну, уьмрихьди бегьем ацӀну, гъакӀнийи ва чан ата-бабйирик ктикьнийи.

⁹ Ибрагьим, дугъан баяр Исакьдина Исмаили, Мамрейихьан ярхла дарди айи, Цухарин бай хеттжви Эфрундин хутӀлиъ айи Махпела дюрхъяъ кивнийи.

¹⁰ Ибрагьимди думу хутӀил хеттарихьан гъадабгъуб вуйи. Гьамци душваъ Ибрагьимна чан хпир Сара кивнийи.

¹¹ Ибрагьим гъакӀихъанмина РАББИЙИ дугъан бай Исакь ужувлакк ккаънийи. Исакь, Беэр-Лахай-Руи кӀурушван багарихь яшамиш шулайи.

Исмаилин наслар

¹² Магьа Ибрагьимдиз Сарайин гъараваш египетшив Гьажарикан гъахьи бай Исмаилин тухмикан ихтилат:

¹³ аьхюрилан ккебгъну Исмаилин баярин ччвурар: Невают – му бай Исмаилин сарпи бай вуйи, Кедар, Адбиэл, Мивсам,

¹⁴ Мишма, Дума, Масса,

¹⁵ Хадад, Тема, Етур, Нафиш, Кедма.

¹⁶ Исмаилин му баяр йицӀикьюб тухмин регьбрар вуйи. Дурарин ччвурар чиб ерлемиш духьнайи йишваризра, дергру бинйиризра туври шуйи.

¹⁷ Варжна сумчӀурна ургуд йис яшамиш духьну, Исмаилин уьмур ккудубкӀуру, думу йикӀуру ва чан ата-бабйирик ктикьуру.

¹⁸ Дугъан наслар, Хавилайихъан гъадабгъуб Ассирияйихьинди гъягърушван Египетдин улихь хьайи Сурихънакьан вуйи, жилариин ерлешмиш гъахьнийи. Думу наслар вари чпин чвйирихъди душмнарси яшамиш шулайи.

Исакьдин баяр – Исавна Якьуб

¹⁹ Магьа, Ибрагьимдин бай Исакьдин тухмикан ихтилат: Ибрагьимдиз Исакь шулу.

²⁰ Исакьдин, Паддан-Арамдиан (Месопотамияйиан) вуйи арамейжви Бетуэлин риш, арамейжви Лавандин чи Ребека чаз хпирди гъадагъруган, ягъчӀвур йис вуйи.

²¹ Исакь чан хпирихъанди, веледар бадали, РАББИЙИЗ ккарагуру, фицики Ребека бицӀидар шлур дайи. РАББИЙИЗ дугъан ккарагбар гъеерхьнийи ва Ребекайик бицӀидар киршнийи.

²² Дугъак кьюдюхрар кайи ва бицӀидар гьеле дугъан фуниъ имиди элегнайи. Ребекайи: «Узуз мициб ляхин гьаз шулайкӀан?» – кӀуру ва думу му фу ляхин вуш РАББИЙИХЬАН гьерхри ккарагру йишвахьна гъягъюру.

²³ РАББИЙИ дугъаз гъапи: – Фунин халиъ кьюб халкь аяв. Яв халиан удучӀвиди кьюб халкь. Саб халкь тмунубтӀан гужал хьибди, хъа аьхюнур бицӀинурихъ лихиди.

²⁴ Вахт хътубкьиган дугъаз кьюдюхрар шулу.

²⁵ Сифте удучӀвур цӀухур, чӀарну алацӀнайир вуйи. Дугъʼин Исав («чӀар алир») кӀуру ччвур иливнийи.

²⁶ Кьяляхъди, Исавдин швякьхъан хилихьди ижмиди хъичӀихну жара бицӀирра удучӀвуру. Дугъаз Якьуб («швякьлихъан хъичӀихнайир») кӀуру ччвур тувнийи. Дурар бабкан шлуган, Исакьдин йирхьцӀур йис вуйи.

²⁷ Баяр аьхю шулу. Исавдикан хутӀларин адми, дирбаш хюрчабан шулу, хъа Якьубдикан хулан сикин адми ктучӀвуру.

²⁸ Исакьдиз Исав ккундийи, гьаз гъапиш дугъу хру хюрчнан йикк ицциб шуйи, хъа Ребекайиз ккунир Якьуб вуйи.

²⁹ Саб ражари, Якьубди жвилли харарин хураг апӀурайиган, гашу йикӀурайи Исав хюрчʼан гъюру.

³⁰ Дугъу Якьубдиз: – Уву гьязур апӀурайи уьру хурагнакан узуз чава! – кӀуру. – Гашу йикӀуразу! Магьа гьаддиз дугъаз Эдум («уьрур») кӀуру.

³¹ Хъа Якьубди дугъаз: – Дици вуш, узуз яв аьхювал ча! – гъапи.

³² – Узу гашу йикӀуразу! – гъапи Исавди. – Узу аьхюнур ву кӀури, узуз дидкан айиб фу вухъа?

³³ – Гьамусяаьт ху апӀин! – кӀуру Якьубди. Исавди, Якьуб аьхюнур ву кӀури, ху апӀуру ва чан аьхювалихьан шулу.

³⁴ Хъа Якьубди Исавдиз уьлна харарин хураг тувру. Дугъу ипӀуру, убхъуру, хъа гъудужвну гъягъюру. Гьамци Исавди учв сарпирди бабкан хьувалихьна вуйи вижнасузвал улупуру.