Эвел 24 - Гирами Китаб

Исакьдиз хпир агуб

¹ Ибрагьим сарун бегьем кьаби гъахьнайи. Вари ляхнариъ думу РАББИЙИ ужʼваликк ккаънийи.

^2-4 Сад йигъан Ибрагьимди чан хулаз ва мал-къарайиз лигурайи чан аьхюну гъаравашдиз гьамци кӀуру: – Завар-жиларин Заанур вуйи РАББИЙИИНДИ, йиз бализ хананеярикан ваъ, хъа йиз ватандиз, йиз багахьлуйирихьна душну, гьадушвʼан Исакьдиз хпир хузди йиз бакьбакьикк хил ккивнумиди ху апӀин.

⁵ Гъаравашди гьерхру: – Хъа, ктагъу шураз, гьаму ругариина гъюз ккун дархьиш гьапӀза? Гьаци гъабшиш, узу яв бай яв ватандиз гьаъну ккундийи?

⁶ – Ваъ, магьаан! – жаваб туву дугъаз Ибрагьимди. – Йиз бай дина яшамиш хьуз дурушри!

⁷ Гьаз гъапиш узу йиз адашдин хулʼан адау Аьршарин Заанур РАББИ узухъди гъулхунзухъди ва Дугъу гьаму жил йиз наслариз тувурза кӀури ху гъапӀунзуз. Дугъу Чав, уву йиз бализ хпир хпан бадали, Чан малайик яв улихьди гьаъди.

⁸ Эгер шураз гъюз ккун дархьиш уву яв ху апӀбаккан азад шулава, вушра йиз бай дина яшамиш хьуз магьаан!

⁹ Ибрагьимдин гъаравашди, чан агъайин жвукьнакк хил ккивну, ху гъапӀнийи.

¹⁰ Хъасин думу гъараваш чан агъайин йицӀуб деве гъадагъну, дурариин ужударстар пешкешар иливну, Арам-Нахараимдиъ (Месопотамияйиъ) айи Нагьор яшамиш шулайи шагьриз рякъюъ учӀвру.

¹¹ Гъаравашди чан девйир шагьрин улихь гъуйдихъ дерккруган, сарун хябяхъ дубхьнайи. Думу вахт шубар штуз удучӀвру вахт вуйи.

¹² Ибрагьимдин гъаравашди гъапнийи: – Йиз агъа Ибрагьимдин Заанур вуйи РАББИ! Гъи узуз йиз рякъ ягъурлу апӀин ва йиз агъа Ибрагьимдихьна вуйи Яв рягьимлувал улуп!

¹³ Магьа узу шагьриан шубар штуз гъюру гъуйихъ дийигъназа.

¹⁴ Дурарикан сариз: «Яв гварʼан узуз шид чава», – пидиза. Хъа эгер дугъу: «Ма убгъ! Яв девйиризра тувдиза», – гъапир, Яв лукӀ Исакьдиз хпирди Уву ктагъур хьиди. Гьадму ляхин Уву йиз агъайиз рягьимлувал улупбан лишан хьибди!

¹⁵ Дугъу гьамци дупну ккудубкӀайизра гъюнихъ гвар хъади Ибрагьимдин чви Нагьоринна Милкайин бай Бетуэлин риш Ребека мина гъюру.

¹⁶ Думу гизаф уччвур, жилижвувахъди духьну адру риш вуйи. Риш гъуйдихъна ктучӀвуру ва гвар абцӀру. Думу кьяляхъ хътакурайиган,

¹⁷ Ибрагьимдин гъараваш дугъахьна гьялак шулу ва, яв гварʼан убхъуз узуз шид чава, кӀури тӀалаб апӀуру.

¹⁸ – Ма убхъ, йиз агъа! – пну жаваб туву шуру. Гьадму гагьди дугъу гъюнихъан гвар хъадабгъну, Ибрагьимдин гъаравашдихьна тувру.

¹⁹ Гъаравашди ккядярхъяйиз шид гъубхъиган, хъа шуру кӀуру: – Гьамус яв девйиризра шид хибдиза, гъит дурар ацӀайизкьан убхъри.

²⁰ Риш, малари шид убхъру латазди тяди гварʼан шид убзну, хъана гъуйихъна жаргъуру. Гьамци дугъу девйир ацӀайизкьан шид гъабхнийи.

²¹ Гъараваш, РАББИЙИ чан рякъ ягъурлу гъапӀуб аьгъю апӀуз ккунди, ккебехъну шурахьинди лигурайи.

^22-23 Девйири шид гъубхъиган, дугъу шураз, хъюхъникк ккибтӀру саб бека гъагъишан айи багьа гъизилин сиргъа ва йицӀуб шекел гъагъишин айи гъизилин кьюб кулих тувру, ва гьерхру: – Йипа, уву шлин риш вува? Яв адашдин хулаъ узуз йишв адапӀуз йишв бихъуйкӀан, яраб?

²⁴ – Узу, – гъапи дугъу, – Нагьоринна Милкайин бай вуйи Бетуэлин риш вуза.

²⁵ Учуз, – давам апӀуру дугъу, – девйириз тувуз гизаф ярмара, сахъвра, учвуз дахърушвра ачуз.

²⁶ Гъаравашди ис алахъну РАББИЙИЗ икрам апӀуру,

²⁷ хъа кӀуру: – Йиз агъайиз рягьимлувал ва вафалувал улупу, йиз агъа Ибрагьимдин Заанур вуйи РАББИЙИЗ шюкюр ибшри! РАББИЙИ узу диш дапӀну йиз агъайин багахьлуйирин хулаз гъахунзу.

²⁸ Ребека дадайин хулаз, гъабхьибдикан ктибтуз, гъажаргънийи.

^29-30 Ребекайихъ Лаван кӀуру гъардаш хъайи. Лаван чан чуччун хъюхъникк сиргъана хиларихъ кулхар гъяркъган ва Ребекайи хялижвуву чаз гъапибдикан хабар дебккган, гъуйдихъна гьялакди гъушнийи. Лаван думу касдин багахьна гъюру. Ибрагьимдин гъараваш девйирихъди гьамусра гъуйихъ дийигъну имийи.

³¹ Гъафи Лаванди дугъаз кӀуру: – РАББИЙИ ужувлакк ккаънайир, гъач учухьна! Мушвахь гьаз дийигънава? Узу халра ккабалгназа ва яв девйириз йишвра гьязур дапӀназа.

³² Дугъу хялижв хулаз хъади гъягъюру. Девйир дурчуру, дурариз сахъвра ярма хуру, хъа хялижвувазна дугъан юлдшариз ликар жикӀуз шид тувру.

³³ ИпӀрубра хуру. Амма думу адмийи: – Узу мина гьаз гьаънайир вуш дарпиди сабан уьл ипӀидарза, – гъапнийи. – Йип, – пну ккун гъапӀу Лаванди.

³⁴ Хъа дугъу ктибтуз хъюгъру: – Узу Ибрагьимдин гъараваш вуза.

³⁵ РАББИЙИ йиз агъа гизаф ужувларикк ккаъну ва думу девлетлу гъахьну. Заанури дугъаз гизаф мал-марчч, арсна-гъизил, лукӀарди жиларна хпар, девйирна дажйир тувну.

³⁶ Йиз агъайин хпир Сарайи кьабишнаъди дугъаз бай гъапӀну ва чаз айиб вари йиз агъайи чан бализ тувну.

^37-38 Йиз агъайи узухьди ху апӀуз гъитунзухьди ва гъапунзуз: «Йиз бализ, узу айи йишван хананей шубарикан ваъ, хъа, йиз ватандиз душну, йиз багахьлуйирикан хпир аькъин».

³⁹ Узу агъайихьан: «Хъа шураз гъюз ккун дархьиш гьапӀза?» – кӀури гьерхунза.

⁴⁰ Дугъу узуз гьамциб жаваб тувнийи: «Вари йиз уьмур Чан улихь гъубшу РАББИЙИ Чав, уву дугъаз хпир йиз тухмиан, йиз хизандиан хпан бадали, Чан малайик увухъди гьаъди ва яв рякъ ягъурлу апӀиди.

⁴¹ Уву йиз багахьлуйирихьна душну дурари увуз риш тутрувишра, уву яв ху апӀбаккан азад шулава», – гъапунзуз.

⁴² Гъи узу, гъуйихьна гъафири гьамци гъапунза: «Йиз агъа Ибрагьимдин Заанур вуйи РАББИ, Уву йиз рякъ ягъурлу гъапӀнийиш хуб ужу шуйи, гьаци апӀинава,

⁴³ ва магьа узу гъуйихъ дийигъунза. Мина штуз риш гъафиш дугъаз: „Яв гварʼан узуз шид чава“, – пидиза гъапунза.

⁴⁴ Хъа эгер дугъу: „Ма убгъ! Яв девйиризра тувдиза“, – гъапиш, ари гьадму йиз агъайин бализ хпирди РАББИЙИ ктагъур хьиди» гъапунза.

⁴⁵ Гьамци дупну узу фикир апӀайизра гъюнихъ гвар хъади гъуйихьинди Ребека гъюру ва дугъу душвʼан чан гвараъ шид убзру. Узу дугъхьан шид ккун гъапӀунза.

⁴⁶ Дугъу гьадмусяаьт гъюнихъан гвар тувунзухьна ва: «Ма убхъ. Яв девйиризра тувдиза» гъапунзуз. Узу бегьемди гъубхъунза, хъа дугъу девйиризра шид гъабхнийиз.

⁴⁷ Узу: «Шлин риш вува?» пну гьерхунза. Хъа дугъу: «Узу Нагьоринна Милкайин бай вуйи Бетуэлин риш вуза», – гъапунзуз. Гьадмуган узу дугъаз сиргъана хилихъ хъаъру кулхар тувунза.

⁴⁸ Хъа узу ис алахъну РАББИЙИЗ икрам гъапӀунза ва йиз агъа Ибрагьимдин Заанур вуйи РАББИ, диш дапӀну узу мина хъади гъюбаз ва йиз агъайин бализ йиз агъайин тухмиан риш улупбаз, адлу гъапӀунза.

⁴⁹ Гьамус гаф ичвуб ву: йиз агъайиз ичв рягьимлувал ва вафалувал улупуз рази вуйчва? Узу гьапӀруш узуз аьгъю хьпан бадали жаваб чавай.

⁵⁰ Лавандина Бетуэли жаваб тувру: – Му ляхин РАББИЙИЛАН асиллу ву. Мушваъ учу ав вая ваъ пуб рубкьурайинхъа?

⁵¹ Магьа Ребека – гъайих увухъди. Гъит РАББИЙИН ният тамам ибшри ва яв агъайин бали му чаз хпирди гъадагъри!

⁵² Му гъеебхьу Ибрагьимдин гъаравашди жилииннакьан алахъну РАББИЙИЗ икрам гъапӀу,

⁵³ хъасин Ребекайиз базарлугъар дирчу. Дугъу уччву палтар, арсранна гъизилин шейʼар адагъну Ребекайиз, гьацира багьа пешкешар дугъан гъардшизна дадайиз тувру.

⁵⁴ Мидхъан Ибрагьимдин гъаравашра дугъахъди хъайи жара касар чпиз дипӀну, дубхъну ахуз дахъру. ГвачӀинган дурар гъудужвуру ва Ибрагьимдин гъаравашди кӀуру: – Узуз йиз агъайихьна кьяляхъ хътакуз ихтияр тувай.

⁵⁵ Хъа Ребекайин гъардшина дадайи кӀуру: – Гъит думу учухъди йицӀуд йигъансана гъузри!

⁵⁶ – Узу сарун энгел хьуз мигъитанайчва, – гъапи Ибрагьимдин гъаравашди. – Узуз, РАББИЙИ йиз рякъ ягъурлу дапӀнайиган, йиз агъайихьна кьяляхъ хътакуз ихтияр тувай!

⁵⁷ – Гъачай шураз дих дапӀну, – гъапи дурари, – чанхьан гьерхурхьа.

⁵⁸ Дурари Ребекайиз дих апӀуру ва гьерхру: – Гьаму адмийихъди гъягъюрива? – Гъягъюрза. – Гъапи дугъу.

⁵⁹ Хъа дурари Ребекара, дугъаз нана туври гъахьи дишагьлира, Ибрагьимдин гъаравашра дугъан адмийирра рякъʼин апӀуру.

⁶⁰ Хуландари, Ребекайиз РАББИЙИКАН берекет хьуб ккун дапӀну, дугъаз кӀуру: Гъит яв наслар, чи, агъзрариинди агъзрар ишрияв! Гъит яв веледарин хилиъ душмнарин шагьрар ахьри.

⁶¹ Ребекана дугъан гъараваш дишагьлийир девйириин элеуру ва гьадму адмийихъди гъягъюру. Гьамци Ибрагьимдин гъараваш, Ребекара хъади, хъадакну гъягъюз рякъюъ учӀвру.

⁶² Хъа Исакь Беэр-Лахай-Руийиан дуфну имийи. Думуган думу Негевдиъ яшамиш шулайи.

⁶³ Хябяхъган фикрарикк ккайи Исакь гъулан гъирагъдиз удучӀвуру ва магьа дугъаз багахь шулайи девйирин сюри рябкъюру.

⁶⁴ Улар улихьинди гатӀахьу Ребекайизра, ярхлаъ сар адми рякъюру. Риш девейилан элдеуру

⁶⁵ ва Ибрагьимдин гъаравашдихьан: – Гьатму хутӀлиъди ихь гъаншаризди гъюрайи адми фуж ву? – кӀури гьерхру. – Тму йиз агъа ву, – гъапи гъаравашди. Хъа гьадмуган Ребекайи чаин илипруб адабгъуру ва машниин илипуру.

⁶⁶ Ибрагьимдин гъаравашди Исакьдиз чаин улубкьубдикан варибдикан ктибтнийи.

⁶⁷ Хъасин Исакьди Ребека чан дадайин чадриккна гъухнийи. Думу чаз хпирди гъадагънийи. Гьаци Исакьдиз Ребека ккун гъахьнийи, ва Исакьдин чан дадайин дерд кӀваълан гъубшнийи.