Эвел 23 - Гирами Китаб

Сара кивру йишв гъадабгъуб

¹ Сара варжна къанна ургуд йисан яшамиш гъахьну.

² Думу Ханаан ругариин али Кирьят-Арба (гьамус душваз Хеврон кӀура) кӀурушваъ гъакӀну. Ибрагьим Сарайихъ гъам зигуз ва дугъахъ ишуз мина гъафнийи.

³ Чан дукӀнайирихъ гъам дизигну, Ибрагьим хеттарихьна гьамци кӀури гъягъюру:

⁴ – Узу мушвариан дарза, хъа – ичв арайиъ гъураба. Йиз дукӀнайи хпир кивуз шлу йишв узуз масу тувайчва.

⁵ Хеттари Ибрагьимдиз жаваб туву:

⁶ – Ич агъа, уву учухъ хъебехъ! Уву гьюрмат айи адми, заан кас вува. Ич гъийихдар ивру дюрхъярикан варитӀан ужуб йишваъ яв хпир кив. Учкан гьарсар, чан тухмин накьвар айишвкан увуз тувуз, рази вуча.

⁷ Ибрагьимди хеттариз, гьаму ругарин адмийириз, икрам гъапӀу

⁸ ва гъапи: – Эгер учву, йиз дукӀнайир кивуз гъитуз, рази вуш, узухъ хъебехъай: Цухардин бай Эфрундикан ккун апӀинай:

⁹ дугъан хутӀлин гъирагъдихъ хъайи Махпела дюрхъ узуз масу тувуб. Учвура шагьидар вуди, гъийихдар киврушв вуди, арсниинди гьубкӀу кьиматнахъ думу йишв гъадабгъуз ккундузуз.

¹⁰ Хеттарин арайиъ деънайи Эфрунди Ибрагьимдиз гъапи – му гафар шагьрин урнарихъна уч духьнайи вари хеттариз ерхьурайи:

¹¹ – Ваъ, йиз агъа! Узухъ хъебехъ: дюрхъ айи му хутӀил йиз терефнаан увуз пешкеш вуйиз. Магьа йиз халкь шагьид: узу увуз му хутӀил дукӀнайир кивуз багъиш апӀураза!

¹² Ва гьадму жилин агьалйириз икрам дапӀну,

¹³ Ибрагьимди Эфрундиз гъапи му гафар, уч духьнайи варидариз ерхьурайи: – ТӀалаб вуйиз увкан, узухъ хъебехъ: узу йиз дукӀнайир кивру хутӀлихъ увуз туврайи арс бис!

¹⁴ Эфрунди жаваб туву:

¹⁵ – Ибшри, йиз агъа! Дици вуш хъебехъ узухъ: жилин кьимат – юкьудварж шекел арс ву; увузра узузра думу ужуб кьимат ву! Кив яв дукӀнайир.

¹⁶ Ибрагьим Эфрундин кьиматниин рази шулу ва дугъаз чав гъапибкьан, хеттар шагьидарра вуди, алверчйирин арайиъ айи гьисабниинди йибцну юкьудварж шекел арс тувру.

^17-18 Гьамци, Мамрейин багахь хьайи Махпелайихъ хъайи Эфрундин хутӀил, дидиъ айи дюрхъра вари гьарарра кади, Ибрагьимдин хусуси хутӀлиз илтӀикӀнийи. Му ляхнин шагьидар, шагьрин урнарихъна уч духьнайи вари хеттар гъахьнийи.

¹⁹ Хъа Ибрагьимди чан хпир Сара Ханаан юрднан Мамрейин багахь хьайи (гьамус душваз Хеврон кӀура) Махпела хутӀлиъ айи дюрхъяъ кивнийи.

²⁰ Гьамци хутӀилна дюрхъ хеттарихьан, гъийихдар кивру йишв вуди, Ибрагьимдихьинди гъушнийи.