Эвел 20 - Гирами Китаб

Ибрагьимна Сара Авимелехдихь

¹ Ибрагьим учв айи йишвариан, кьибла терефнаъ айи Негев кӀуру ичӀи чюлин багарихьна, удучӀвну гъягъюру ва Кадешна Сур йишварин арайиъ яшамиш хьуз хъюгъру. Ибрагьимди гъурабади Герариъ бина ккебгъру,

² ва дугъу душваъ чан хпир Сара чан чи вуйиз кӀуру. Гьаддиз Герарин паччагь Авимелехди Сара чан хпаригъна хуз гъитру.

³ Амма йишвну нивкӀукди Авимелехдиз Заанур ачмиш шулу ва Заанури дугъаз кӀуру: – Уву увуз швувахь хьайи дишагьли гъадагъувал себеб вуди йикӀидиву.

⁴ Сарайик сабан Авимелех гьич куркӀнукьан адайи. – Йиз Аьхюр! – ккарагуз хъюгъру Авимелех. – Тахсир кадру халкь тӀанкь апӀуз ккайва?

⁵ Гьадму адмийи чав гъапунзуз, аьхир, думу йиз чи вуйиз кӀури. Думу дишагьлийира гьаци гъапнийи. Узу му ляхин кӀваъ фукӀа адарди гъапӀуб вуйиз, йиз хилар марцциди вуйиз.

⁶ – Ав, – жаваб туву Заанури нивкӀуъ, – уву думу ляхин яв юкӀв марцциди гъапӀуб вуйиб Узуз аьгъязуз. Узу уву Узуз къаршу гуннагь апӀбахьан гъюрхюнзаву, гьаддиз думу дишагьлийик кучӀуз гъитундарзавухьди.

⁷ Хъа гьамус думу чан жилирихьна кьяляхъ гьаъ. Ибрагьим пайгъамбар кас ву, думу, уву сагъди гъузбан бадали, увхъанди ккарагиди. Аьгъю йибхьки, эгер думу чан жилирихьна уву кьяляхъ гьадраиш, увура яв вари архара йихидичва!

⁸ Гьиринган Авимелехди чан гъуллугъчйир уч дапӀну му гафар дурариз ктитуру. Дурариз гизаф гучӀ гъабхьнийи.

⁹ Авимелехди Ибрагьимдиз чахьна дих дапӀну, дугъаз, тягьна йивури, кӀуру: – Уву учкан гьапӀрава? Узу увуз фтин гиран ктапӀну гьамциб чӀуру гунгьихъна узуна йиз вари паччагьлугъ хъапӀуз? Мици апӀруб дар аьхир!

¹⁰ Уву гьаз мици гъапӀунва?

¹¹ Ибрагьимди жаваб туву: – Му йишвариъ айидариз Заанурихьан гучӀдар кӀури фикир гъапӀунза ва, йиз хпир бадали, узу йивну йикӀуру кӀури, гучӀ гъабхьунзуз.

¹² Тмуну терефнаан кӀури гъабшиш, дугъриданра думу йиз чи вуйиз – жара хпирикан вуйи йиз адашдин риш. Думу шуркан йиз хпир гъахьну.

¹³ Хъа Заанури узуз йиз адашдин хал дипну гъарах гъапиган, узу йиз хпириз гьамци гъапнийза: «Увуз миннат вуйиз, ухьу наана гъушишра, узу яв гъардаш вуйиз, йип».

¹⁴ Авимелехди Ибрагьимдиз марччар, хюнйир, лукӀар, лукӀ дишагьлийир пешкеш апӀуру ва Сарара кьяляхъ гьаъну,

¹⁵ кӀуру: – Йиз вари уьлке яв улихь хьайиз: увуз наан ккундуш, гьадушваъ яшамиш йихь.

¹⁶ Хъа Сарайиз дугъу кӀуру: – Узу яв гъардшиз агъзур шекел арс тувраза. Яв багахьлуйирин улихь увуз гъабхьи дерд миди ккебкди ва яв намус марцц апӀиди.

¹⁷ Ибрагьим Заануриз ккарагуру ва Заанури Авимелех, дугъан хпирна гъараваш дишагьлийир, хъана бицӀидар апӀуз шлуси, сагъ апӀуру.

¹⁸ Гьаз гъапиш Заанури, Ибрагьимдин хпир Сарайин кӀуллан, Авимелехдин хулаъ гьич сар дишагьлийихьанра бицӀир апӀуз даршлуси дапӀнайи.