Эвел 13 - Гирами Китаб

Ибрамна Лут жара хьуб

¹ Ибрам Египетдиан, чан хпирна чаз айиб вари хьади, кьяляхъ Негев чюлиз гъюру; дурарихъди – Лутра.

² Гьамус Ибрам гизаф девлетлур вуйи. Дугъаз мал-къара, арс, гъизил айи.

³ Негевдиан думу чан чадур ади гъабхьи Бет-Элихьна гъюру. Бет-Элин ва Гайин арайиъ айи,

⁴ чав сифте гъурбан апӀрушв тикмиш гъапӀу йишваъ Ибрамди РАББИЙИЗ хъана икрам апӀуру.

⁵ Ибрамдихъди хъайи Лутдизра малар-марччарна чадрар айи.

⁶ Жил сарун дурар кьюридигъна гьубкӀри имдайи. Дурарин мал-мутму гьадмукьан гизаф вуйики, сарун дурар саб йишвʼин улуршурадайи.

⁷ Ибрамдинна Лутдин марччлихънарин арайиъ гьюжатар шуз хъюгънийи. Мидланра савайи, му жилариин ханаанарра, перизеярра яшамиш шулайи.

⁸ Ибрамди Лутдиз гъапи: – Гъач, явна йиз ва яв марччлихънаринна йиз марччлихънарин арайиъ гьюжатар даршлуганси апӀурхьа, ухьу багахьлуйир вухьа аьхир!

⁹ Вари жил яв улихь хьаяв, гъач, жара шулхьа. Эгер уву гагул терефназди гъушиш, узу – арччул, эгер уву – арччул терефназди гъушиш, узу гагул терефназди гъягъидиза.

¹⁰ Лутдиз Цуарихънакьан вуйи Иордан нирин дере, РАББИЙИН багъси ва Египет жилси, мублагъди гъябкъю. Мици, РАББИЙИ Содом ва Гоморра шагьрар терг апӀайиз, гъабхьиб вуйи.

¹¹ Лутди чаз Иордан нирин дере ктабгъуру ва ригъ гьудубчӀвру терефназди гъягъюру. Гьамци дурар жара шулу.

¹² Ибрам Ханаан жилиин яшамиш шули гъузру, хъа Лут дерейиъ айи шагьрарин гъирагъарихъ яшамиш хьуз хъюгъру. Лутди чан чадрар Содомдихъ гьатӀарццнийи.

¹³ Содомдин агьлар писдар, РАББИЙИН улихь гизаф гунгьар апӀурайидар вуйи.

¹⁴ Лут жара хьублан кьяляхъ, РАББИЙИ Ибрамдиз кӀуру: – Юкьуб тереф ул илбиц! Кафари, кьибла, ригъ гьудубчӀвру ва ригъ алабхъру терефаризди лиг.

¹⁵ Увуз рябкъюрайи гьадму вари жил Узу увуз ва яв наслариз гьаргандиз тувдиза.

¹⁶ Яв насил гьюлин гъумкьан гизаф апӀидиза. Гъум гьисаб апӀуз даршлуси, гьаци яв насилра кьадар адрубкьан хьибди.

¹⁷ Гъарах, му жилин ярхишназ ва яркьушназ лиг – му жил Узу увуз тувраза.

¹⁸ Ибрам, йишвлан йишвʼина бина алдабгъури, Хеврондиъ айи Мамре кӀуру жвуван мяхъярин гьарарин багахьна яшамиш хьуз гъюру. Дугъу душваъ РАББИЙИЗ гъурбан апӀрушв тикмиш апӀуру.