Эвел 12 - Гирами Китаб

Заанури Ибрам ктагъуб

¹ РАББИЙИ Ибрамдиз кӀуру: – Яв ругарилан улдучӀвну, яв тухмихьан гьудучӀвну, яв адашдин хулʼан, Узу увуз улупру ругариинна гъарах.

² Хъа Узу увкан зурба халкь артмиш апӀидиза. Ужувлакк ккаъдизаву. Яв ччвур адлу апӀидиза, ва увлантина варидариз ужʼвал хьибди.

³ Увуз ужʼвал ккун апӀрудар Узу ужувлакк ккаъдиза, хъа увуз чӀуруб ккун апӀрудар балайикк ккитдиза. Увлантина дюнʼяйин вари халкьариз ужʼвал хьибди!

⁴ РАББИЙИ гьамци гъаписи, Ибрам удучӀвну гъягъюру. Дугъахъди – Лутра. Харрандиан удучӀвруган, Ибрамдин ургцӀурна хьуд йис вуйи.

⁵ Ибрамди чахъди чан хпир Сарай, чан чвуччвун бай Лутра, чпи гъазанмиш гъапӀу вари мал-мулкра, Харрандиъ чпихъ лихурайидар вари гъадагъуру. Дурар Ханаан жилариина гъягъюз рякъюъ учӀвру ва думу жилариина гъюру.

⁶ Ибрам Шехем кӀуру йишвахь хьайи Морэ кӀуру мяхъюн гьарихьна гъюру. Думуган му жилиин ханаан халкьар яшамиш шулайи.

⁷ РАББИ Ибрамдиз ачмиш шулу ва Дугъу кӀуру: «Яв наслариз Узу гьаму жил тувдиза». Ибрамди душваъ чаз ашкар гъахьи РАББИЙИЗ гъурбан апӀрушв тикмиш апӀуру.

⁸ Думу душвʼан Бет-Эл шагьрихьан ригъ гьудубчӀвру терефнаъ айи дагъларихьна гъюру. Душваъ дугъу, Бет-Элихьан ригъ алабхъру терефнаъ шлуси, чан чадрар дивру, хъа Гай шагьур ригъ гьудубчӀвру терефнахъинди гъубзру. Дугъу, душваъ РАББИЙИЗ гъурбан апӀрушв дивну, икрам апӀуру.

⁹ Хъа Ибрамди чан рякъ Негев чюлиз, кьиблайизди, давам апӀуру.

Ибрамна Сарай Египетдиз гъягъюб

¹⁰ Ханаандиъ гашʼвал айиган, Ибрам Египетдиз яшамиш хьуз гъягъюру.

¹¹ Дугъу, Египетдиз багахь шулайиган, чан хпир Сарайиз кӀуру: – Аьгъязуз, уву успагьи дишагьли вува.

¹² Египтянариз уву гъяркъган, уву йиз хпир ву пиди, ва узу йивну йикӀиди, хъа увуз чӀалра пидар.

¹³ Уву дурариз, йиз чи вуза, йип. Уву гьаци гъапиш, вари ужу хьибди – йивну йикӀбаккан узу уьрхидива.

¹⁴ Ибрам чан хпирра хъади Египетдиз гъюру, ва египтянариз му дишагьли гизаф успагьиди рякъюру.

¹⁵ Думу фяряуьндин гъуллугъчйиризра рякъюру ва фяряуьндиз дугъан уччвуваликан ктибтуру. Думу фяряуьндин хулаз гъадагъуру.

¹⁶ Гьаци Ибрамдизра ужуйи вуйи. Дугъахъ марччар, малар, дажйир, лукӀар (жилар ва хпар) ва девйир хъиршру.

¹⁷ Хъа РАББИЙИ, Ибрамдин хпир себеб духьну, фяряуьнна дугъан хал гъагъи аьзабари ва уьзрари ккапӀнийи.

¹⁸ Фяряуьнди, Ибрамдиз дих дапӀну, дугъаз гъапи: – Уву узкан фу гъапӀунва? Уву, му яв хпир вуйиз кӀури, гьаз гъапундарва?

¹⁹ Уву гьаз, му йиз чи вуйиз, гъапунва? Гьаддиз думу узуз хпирди гъадагънийза! Гьан, гъадагъну яв хпир, гъарах!

²⁰ Фяряуьнди, Ибрам чан хпирра хъади, чаз айибра хьади, му уьлкейиан адауз гъитру.