Эстер 5 - Гирами Китаб

Эстер паччагьдихьна илтӀикӀуру

¹ Шубуд кӀуру йигъан Эстер, чан багьа палтарра алахьну, паччагьдин дараматдин айтӀан гьяятдиъ, паччагь яшамиш шулайи хуларин улихь, дийигъуру. Хъа паччагь чан тахтниин, учӀвру йишваз машна-машди деънайи.

² Паччагьдиз гьяятдиъ Эстер дийигъну гъяркъган, дугъан дугъак юкӀв кабсру. Паччагьди дугъан терефназди чан хилиъ айи гъизилин маргъ гьачӀабккуру. Багахьна дуфну, Эстери гъизилин маргълин кӀукӀшик кучру.

³ Паччагьди дугъхьан гьерхру: «Фу дерди вуяв, Эстер? Фициб тӀалаб аяв? Паччагьлугъдин гьацӀ пай тӀалаб гъапӀишра, вари явуб ву».

⁴ Эстери кӀуру: «Эгер паччагьдиз ккун гъабхьиш, гъит дугъу чахъди Аманра гъадагъри ва гъи узу паччагьдин сагълугъназ тешкил апӀурайи демраз гъюри».

⁵ Паччагьди кӀуру: «Кьан дарапӀди Амандиз дих апӀинай, ва гъит Эстериз ккуниганси ибшри!» Паччагь ва Аман Эстери тешкил гъапӀу демраз гъюру.

⁶ Дурари чяхир убхъуру, ва паччагьди Эстерихьан гьерхру: «Фу тӀалаб апӀурава? Увуз фу ккундушра тувдиза. ТӀалаб фициб вуяв? ГьацӀ паччагьлугъ тӀалаб апӀин – яв хаиш тамам апӀидиза».

⁷ Эстери жаваб тувру: «ТӀалаб вуйиз ва миннат апӀураза,

⁸ эгер узу паччагьдин рягьимлуваликк ккаш, эгер паччагьдиз йиз хаиш тамам апӀуз ният аш, гъит думу Аманра хъади закурра узу дурариз тешкил апӀурайи демраз гъири, гьадмуган узу паччагьдиз жаваб тувдиза».

Амандин Мярдягьяйихьна вуйи ажугъ

⁹ Думу йигъан Аман разиди ва шадди гъушнийи. Амма паччагьдин дараматдин раккнарихъ деънайи Мярдягьяй гъяркъиган ва чан улихь думу гъудудужвган, Амандиз Мярдягьяйикан яман хъял гъафнийи,

¹⁰ амма дугъу сабур гъюбхнийи ва хулаз гъушнийи. Чан дустариз ва хпир Зерешдиз чахьна дих апӀуб амур дапӀну,

¹¹ Аманди дурариз чаз айи девлетнакан, адлуваликан, гизаф баяр айиваликан ва паччагьди чав жара гьякимартӀан зади дисурайиваликан фурслуди ктибтуз хъюгъю.

¹² «Сабсана, – гъапи Аманди, – паччагьдин хпир Эстери дем тешкил дапӀну, паччагьдихъди гьадина сар шлиз-вушра ваъ, хъа узуз теклиф гъапӀну. Закурра узуз паччагьдихъди теклиф дапӀна.

¹³ Хъа жугьуд Мярдягьяй паччагьдин дараматдин раккнарихъ узуз рякъюрайиган, узуз му фу вухъа?»

¹⁴ Дугъан хпир Зерешди ва дустари дугъаз насигьят тувру: «Гъит къанна хьуб метр али буруз дубсри, хъа гвачӀинган паччагьдикан, Мярдягьяй гьадму буруздикк ккерхуб тӀалаб апӀин ва юкӀв азадди паччагьдихъди демраз гъарах». Му гафар Амандиз кьабул гъахьнийи, ва дугъу буруз дубсуз амур апӀуру.