Эстер 2 - Гирами Китаб

Эстер паччагьдин хпир шулу

¹ Хъасин, чан хъял илцифган, Ахашʼверуш паччагьдиз Вашти кӀваин гъахьнийи – дугъу гъапӀу ляхникан ва дугъан гьякьнаан адабгъу мялуматдикан.

² Ва паччагьдиз дугъан багахь вуйидари гъапну: «Гъит паччагьдиз гюрчег жигьил шубар агри.

³ Гъит паччагьди чан паччагьлугъдин вари вилаятариз хъугъʼвал али инсанар гьаъри ва варишвариан уччвудар жигьил шубар уч дапӀну, Сузы гъалайиз, паччагьдин дараматдиъ айи дишагьлийирин хулариз хъади гъюри. Гъит паччагьдин гъараваш Хегайи дурарин гъайгъушин зигри ва дурарихьна итирин ниъ хъайи мялгьямар туври.

⁴ Паччагьдиз кьабул гъахьи риш Ваштийин ерина дугъан хпир хьиди». Му гафар паччагьдиз кьабул гъахьнийи ва дугъу гьаци гъапӀнура вуйи.

^5-6 Сузы гъалайиъ думуган Мярдягьяй кӀуру жугьуд яшамиш шули гъахьну. Думу Вениаминдин насларикан вуйи Кишдин бай Шимийин, Шимийин бай Яирин бай вуйи. Киш саб фила-вуш Вавилондин паччагь Навухаднасари, жара инсанарра, Иудеяйин паччагь Иехонияра хъади, йисирвализ гъадагъну, Ерусалимдиан кючюрмиш гъапӀнийи.

⁷ Мярдягьяйи чан эмдин йитим риш Хадасса, Эстерра гьадгъаз кӀуру, тербияламиш апӀури гъахьну. Думу гюрчег жан хъайи уччвур риш вуйи. Эстерин адаш ва дада кечмиш гъахьиган, Мярдягьяйи думу чаз ришди гъадагъну.

⁸ Паччагьдин мялуматнакан хабар гъабхьиси, Сузы гъалайиз гизаф шубар уч гъапӀнийи, гьадрарин арайиъ Эстерра айи. Паччагьдин дараматдиз хъади гъафи шубарин ва Эстерин гъайгъушнар Хегайи кӀули гъахурайи.

⁹ Му риш дугъаз кьабул гъахьнийи: кьан дарапӀди дугъу Эстерихьна итирин ниъ хъайи мялгьямар тувру ва дугъаз жаради хураг гьязур апӀуз амур апӀуру. Паччагьдин дараматдиъ айи гъараваш шубарикан ургур ужударстар гъядягъну, Хегайи Эстер гъаравашарра хъади дишагьлийириз жара дапӀнайи ужударстар хулариз гьаъру.

¹⁰ Эстери чав фуну халкьдикан, тухмарикан вуш ктибтундайи, фицики дугъаз Мярдягьяйи къадагъа гъапӀнийи.

¹¹ Хъа Мярдягьяй гьаригъан дишагьлийир яшамиш шулайи хуларин багахьна, Эстерин ляхнар фици вуш, думу сагъ-саламатди аш, аьгъю апӀуз, гъюри гъахьну.

¹² Гьарсар риш, Ахашʼверуш паччагьдихьна гъягъюз чан вахт хъубкьайиз, дишагьлийириз лазим вуйиганси, йицӀикьюб вазли гьязур шули гъахьну. Йирхьуб вазли дурари чибкан ччим ктатуйи, хъа имбу йирхьуб вазли – дишагьлийириз вуйи итирин ниъ хъайи мялгьямар.

¹³ Гьаддин кьяляхъ риш паччагьдихьна хъади гъягъюйи. Паччагьдихьна дишагьлийирин хулариан гъягъюрайи шурахьна дугъу тӀалаб гъапӀу фу вушра тувуйи.

¹⁴ Хябяхъган думу паччагьдихьна гъюйи, хъа гвачӀинган паччагьдин дишагьлийириз лигурайи гъараваш Шаашгъаздин гюзчиваликк ккайи дишагьлийирин хулариз гъягъюйи. Гьаддихъанмина, эгер паччагьди чав амур дарапӀиш, шураз дугъахьна гъягъюз ихтияр адайи.

¹⁵ Мярдягьяйин эм Авихаилин риш, Мярдягьяйи тербияламиш гъапӀу Эстерин паччагьдихьна гъягъюз нубат гъафиган, дугъу паччагьдин гъараваш Хегайи теклиф гъапӀубдилан артухъ фукӀа тӀалаб гъапӀундайи. Эстер, гъяркъган, вардариз кьабул шулайи.

¹⁶ Паччагьдин дараматдиз Эстер йицӀубпи вазли, яни тевет вазли, Ахашʼверуш паччагь духьну ургуд кӀуру йисан хъади гъушнийи.

¹⁷ Паччагьдиз Эстер миди вуйи чан хупартӀан кьабул гъахьнийи, миди вуйи шубариинтӀан дугъʼин дугъан юкӀв улубкьнийи. Дугъу Эстериин паччагьдин таж улубкӀуру ва Ваштийин ерина чаз хпирди гъадагъуру.

¹⁸ Ва паччагьди чаз багахь вуйидариз ва гьякимариз дем тешкил апӀуру – Эстерин сагълугъназ вуйи дем; ва паччагьдин аьдатнаъ айиганси, паччагьлугъдин вари вилаятариз пешкешар пай апӀуру.

Паччагьдиин алархьуз ният айиваликан Мярдягьяйиз аьгъю шулу

¹⁹ Имбу шубар дишагьлийирин кьюдпи хулариз адаъруган, Мярдягьяй паччагьдин дараматдин раккнарихъ деънайи.

²⁰ (Эстери чав фуну хизандиканна миллетдикан вуш, саризра ктибтундайи, гьаз гъапиш Мярдягьяйи дугъаз гъадагъа гъапӀнийи, хъа Мярдягьяйихъ Эстер чав дугъу тербияламиш апӀурайи вахтариси хъпехъури имийи).

²¹ Гъапиганси, Мярдягьяй паччагьдин дараматдин раккнарихъ деънайи. Гьадму вахтна паччагьдин раккнар уьрхюрайи, хъюлу ацӀнайи кьюр гъараваш Бигтандиз ва Терешдиз, Ахашʼверуш паччагьдиин алархьну, думу йикӀуз ният ади гъабхьну.

²² Му ляхникан Мярдягьяйиз хабар шулу ва паччагьдин хпир Эстериз мялум апӀуру, хъа Эстери паччагьдиз Мярдягьяйин ччвурнахъан вари ктибтуру.

²³ Вари ахтармиш дапӀну, тахсиркрариз жаза адабтӀуру – дурар буруздикк ккерхру. Паччагьра ади му ляхникан тарих уьбхбан дикӀбариъ бикӀуру.