Даниял 9 - Гирами Китаб

Даниял Аллагьдиз ккарагуб ва Жабраили аьянвал тувуб

¹ Мидийирин тухмиан вуйи, Ахашʼварушдин бай Дарийи Вавилондиъ паччагьвал апӀури садпи йис вуйи.

² Гьадму вахтна узу, Даниял, Гирами Китабариан гъавриъ ахъзуки: Ереми пайгъамбариз вуйи РАББИЙИН гафназ тялукь вуди, Ерусалим ургцӀур йисандин арайиъ дарабгънайиб ва тӀараш дапӀнайиб вуди гъубзну ккунду…

³ Узу Аллагьдиз, йиз Раббийиз, дих гъапӀунза; узу Дугъаз ккарагури ва миннатар апӀури гъахьунза, швумалвалин лишан вуди, ирин палат алабхьну ва рюкъдиъ дусну, ушвар дисури гъахьунза.

⁴ Узу РАББИЙИЗ, йиз Аллагьдиз, ккарагури гъахьиза ва, гьамци кӀури, гунгьар гардандиъ гъидисза: – Я Рабби, зурба ва кьудратлу Аллагь! Уву ккунидарихъди ва яв табшуругъар кӀулиз адагъурайидарихъди вуйи вафалу ккунивалин йикьрар уьрхюрава, –

⁵ хъа учу гунгьар гъапӀунча, тахсиркрар вуча, аьрвалар гъахунча ва аькси гъудужвунча, Яв табшуругъар ва Яв къанунар нигь гъапӀунча.

⁶ Ич паччгьариз ва гьюкумдрариз, ич абйириз – ич уьлкейин вари халкьдиз Яв гъаравшари, пайгъамбрари Яв ччвурнахъан кӀуру вахтна, хъпехъундарча.

⁷ Уву гьякь вува, йиз Рабби, хъа учу гьамусяаьт аьйибнакк ккахьначу – Иудеяйинна Ерусалимдин агьалйир ва вари Израил: багахь ва ярхла яшамиш шулайидар, Увухьна вуйи ич вафасузвализ лигну, учу наана утӀурккнуш, гьадму уьлкйириъ айикьандар учу вари.

⁸ Я РАББИ! Аьйибнакк ккача учу, ва ич паччгьар, ва гьюкумдрар, ва ич абйир, гьаз гъапиш Увуз аьксивалин гунгьар гъапӀунча.

⁹ Раббийи, ич Аллагьди, учуз рягьим апӀри ва хил алдабгъри, учу Дугъаз къаршу удучӀвнушра,

¹⁰ РАББИЙИХЪ, ич Аллагьдихъ, хъпехъури гъахьундаршра, Чан гъаравшарихъди, пайгъамбрарихъди учуз туву насигьятар кӀули гъахури гъахьундаршра.

¹¹ Вари Израил Яв Къанундилан улдучӀвну – Увухъ хъпехъуз даккунди, чпин машар илдицну. Ва учʼина Мусайин, Аллагьдин гъаравашдин, Къанундиъ дупнайиси, нянат гъафну, – фицики Аллагьдин улихь гунагькрар вуча.

¹² Учкан ва ич гьюкумдрарикан вуйи Дугъан гафар кӀулиз удучӀвну: Дугъу учʼина зурба бала гъабхну – Ерусалимдиъ гъабхьибсиб заварин кӀанакк сарун саб йишваъкьан гъабхьиб дар.

¹³ Мусайин Къанундиъ дупнайиси, балайикк ккахъунчу, аммаки Увуз, РАББИЙИЗ, ич Аллагьдиз ккарагундайча, ич гунгьарихьан ярхла гъахьундайча, Яв гьякьикьат саймиш гъапӀундайча.

¹⁴ Ва РАББИЙИРА учʼин бала алапӀуз кьан гъапӀундайи, учу дидикк ккитнийи. Гьякь ву РАББИ, ич Аллагь, Чан вари ляхнариъ, хъа учу Дугъахъ хъпехъури гъахьундайча.

¹⁵ Я Рабби, ич Аллагь, Уву зурба кьувватниинди Яв халкь Египетдиан адаунва, ва Яв ччвурра гьамусдизкьан варидариз машгьур ву – хъа учу гунгьар апӀури гъахьунча ва тахсиркрар вуча.

¹⁶ Я Рабби! Уву гьякь вува – вушра Яв хъялна ажугълувал Яв Ерусалим шагьрихьан ва марцци йишв вуйи Яв дагъдихьан ярхла апӀин. Ич гунгьар ва ич абйирин тахсрар себеб дубхьну, Ерусалим ва Яв халкь гъунши халкьариз гьясбикк ккадар.

¹⁷ Яв лукӀран ккарагувал ва миннат ебхь сарун, я ич Аллагь – тӀараш дапӀнайи Яв Марцци Хал, Яв Уву бадали, Рабби, Яв ужувлиинди нурлу апӀина.

¹⁸ Хъебехъа, йиз Аллагь, – ва ебхь сарун! Саб ул йива – Яв ччвурнахъ хъайи ич шагьур фици тӀараш дапӀнаш, лига! Учу увуз ккарагурача, ич дугъривалик умуд кади ваъ, хъа Яв зурба рягьимлувалик.

¹⁹ Рабби, ебхьа! Рабби, хил алдабгъа! Рабби, гъаври ахъа! Ич тавакъу, кьаназ гъидрибтди, кӀулиз адабгъа – Яв Уву бадали, йиз Аллагь, фицики му шагьур Явуб ву ва халкьра Явуб ву, Яв ччвурнахъ хъайидар.

²⁰ Гьамци кӀури гъахьиза узу, ккарагури ва йиз гунгьиканна йиз халкьдин, Израилин, гунгьикан йиз кӀваъ айиб ачухъ апӀури ва йиз Аллагьдин марцци дагъдин гьякьнаан РАББИЙИЗ, йиз Аллагьдиз, ккарагури.

²¹ Ва магьа, узу ккарагурайиган, сабпи улупбаъ узуз гъяркъю Жабраил, узухьна гьаънайир, дитӀирхну гъафи ва йиз улихь дийигъу. Му хябяхъдин гъурбнар хру вахтна гъабхьиб вуйи.

²² Узуз насигьят туври, дугъу гъапи: – Даниял! Узу увуз аьгьвалат аьян апӀуз гъафир вуза.

²³ Уву ккарагуз хъюгъюбси, буйругъ тувнийи, ва думу увуз, Аллагьдиз гирами вуйириз, аьян апӀуз гъафунза. Буйругъ аннамиш апӀин ва улупубдин гъавриъ ахъ.

²⁴ Яв халкьдиз ва гирами Шагьриз ургцӀур ражари ургуд йис ккилигури гъузуб улупна. Гьадму вахтнан арайиъ Аллагьдихьна вуйи яв халкьдин аьксивал кӀваълан гьархиди, гунагь ккебкиди ва жазайиинди тахсирнахьан марцци хьиди. Гьадмуган даима гьякьʼвал гъубзиди, гъябкъюб ва гъюз имбуб ачухъ хьувал къайд апӀиди, Аллагьдиз бахш апӀбан лишан вуди, варитӀан Марцци йишвкан ччим кадатиди.

²⁵ Аьгъю йибхьки ва гъаври ахъки: Ерусалим цӀийикӀултӀан дебккуз амур апӀбахъан та-а-ап Ччим кадатнайи Гьюкумдар гъяйизкьан, ургуб ражари ургуд йис гъябгъиди. Хъасин хъанара йирхьцӀурна кьюб ражари ургуд йис гъябгъиди – гьаму вахтна майданна шагьрин арх цӀийи алаиди, амма думу балйирин вахт хьибди.

²⁶ ЙирхьцӀурна кьюб ражари ургуд йис улдубчӀвган, Ччим кадатнайир дудургну хьиди, ва дугъан фужкӀа гъузидар. Шагьурра, Гирами халра гьамус шлу гьякимдрин инсанари тӀараш апӀиди. Дугъан аьжал, штар улучӀвгансиб, хьибди, ва дявдин аьхиризкьан балйир улуркьиди.

²⁷ Дугъу гизафдарихъди ургуд йисаз йикьрар йитӀиди. Ва гьацӀ ургуд йисаз дугъу гъурбан апӀувалар батӀул апӀиди, хъа думу йишвʼин Аллагь гьясбикк ккадру алчагъʼвалар хьиди – та-а-ап тӀарашчийин тяйин дапӀнайи аьхир хьайизкьан гагьди.