Даниял 6 - Гирами Китаб

Даниял асланарихъди ичӀаъ

¹ Дари паччагьди вари паччагьлугъ вуйибси варжна къар юрдарин гьякимар дерккбанди гъахьи.

² Хъа дурарин зиинра – шубур гьюкумдар (гьадму гьисабнаан Даниялра), юрдарин гьадму гьякимари мурарин улихь сургъу-гьисаб тувруси ва паччагьдизра саб зарар даршлуси.

³ Гьаму юрдарин гьякимаринна гьюкумдрарин арайиъ Даниял тафавутлу шулайи, фицики дугъаъ сариъра адрубсиб рюгь айи, гьаддиз паччагьди думу вари паччагьлугъдиъ аьхюрди дерккуз фикир апӀурайи.

⁴ Хъа гьюкумдрари ва юрдарин аьхюдари кӀуруш, Данияли паччагьлугъдин ляхнар фици кӀули гъахурайкӀан кӀури, тахсир кипруб абгуз ккунди, ул хъибтри гъахьнийи. Аммаки дугъаз тягьна-тюмбюгь йивруб дурариз гьич саб фукӀара гъибихъундайи: Данияли вари дугъриди идара апӀурайи, дугъан я дюзди дяргъюрайиб, ясана кучӀал кайиб бихъуб гьич мумкин дайи.

⁵ Думуган дурари гъапи: – Даниялиз аькси вуйиб ухьуз фукӀара бихъурдар. Анжагъ думу чан Аллагьдин Къанундихъди гъягъюрайивалтӀан, дугъан тахсир абгуз хьибдар.

⁶ Думуган гьаму вари гьюкумдрарина юрдарин гьякимари, саб хилди паччагьдихьна дуфну, гъапи: – Дари паччагь, уву сагъ ишри!

⁷ Паччагьлугъдиъ айикьан вари гьюкумдрари, шагьрарин аьхюдари ва юрдарин гьякимари, паччагьдин багахьна вуйидари ва дерккнайи кьадйири – гьамрар вардари гьисаб апӀураки, паччагьди гъадагъайин буйругъ тувуб лазим ву: эгер сар фужкӀа сумчӀур йигъандин арайиъ, увуз ктарди, жан паччагь, шлизкӀа жарариз – я гирами бутдиз, ясана сар касдиз – ккарагиш, думу асланари итӀуз ичӀаз гатӀахьну ккунду.

⁸ Гьациб гъадагъа илив, жан паччагь, къанун адабгъ – кьатӀʼи вуйи къанун, мидийиринна фарсарин дючӀрюбгъру къанун.

⁹ Дари паччагь рази гъахьи ва дугъу гъадагъа апӀру къанун адабгъу.

¹⁰ Амма Даниял, мициб къанун адабгънайиб чаз аьгъяшра, чан хулаз душну, Ерусалимдин терефназди унчӀвар али заъхъан хулаъ йигъан шубубан кьамкьариина ис шули, муганайизси чан Аллагьдиз ккарагури ва Дугъаз шюкюр апӀури гъахьи.

¹¹ Гьатмундар дугъахьна саб хилди гъафи – ва дурариз думу, чан Аллагьдиз ккарагури, гъяркъю.

¹² Думуган дурар паччагьдихьна гъушу ва дугъаз дугъан гъадагъа апӀру къанун кӀваин гъапӀу: – Уву къанун адабгънадайвахъа, эгер сар шликӀа сумчӀур йигъандин арайиъ, увуз ктарди, я паччагь, шлизкӀа жарариз – я гирами бутдиз, ясана сар касдиз – ккарагиш, думу асланари итӀуз ичӀаз гатӀахьну ккунду. Паччагьди гъапи: – Думу кьатӀʼи вуйи къанун, мидийиринна фарсарин дючӀрюбгъру къанун ву!

¹³ Мушвахь дурари паччагьдиз гъапи: – Хъа магьа, Данияли, Иудеяйиан хъади дуфнайидарикан сари, я уву, жан паччагь, ясана уву дебккнайи гъадагъа гьисабназкьан гъадагъурадар. Думу йигъан шубуб ражари ккарагура.

¹⁴ Мициб хабар гъеебхьу паччагьдиз дерд-хажалат гъабхьи. Думу Даниял уьрхбанди гъахьи – хъябяхъдизкьан думу жазайиккан азад апӀру чарйир агури гъаши.

¹⁵ Амма гьатмундари, паччагьдихьна саб хилди дуфну, гьамци кӀуйи: – Увуз аьгъявузки, паччагь, мидийиринна фарсарин къанундиинди паччагьдин саб гъадагъара, вая саб буйругъра батӀул апӀуз шлудар дар.

¹⁶ Думуган паччагьди Даниял хъади гъюз гъиту ва думу асланар айи ичӀаз гатӀахьуз амур гъапӀу. Дугъу Даниялиз гъапи: – Гьаммишан уву икрам апӀурайи яв Аллагьди уьрхриву!

¹⁷ Хъасин, аьхю гъван дубхну, ичӀан гурихь хьипу, ва паччагьдин тӀубланихьди ва нукрарин тӀубланарихьди, йикьрарнаъ айиганси Даниял жазаламиш апӀбан бадали, ичӀʼин мугьур алабсу.

¹⁸ Хъасин паччагь чан ужагъариз гъушнийи, ва, ипӀрубкьан дирипӀди, дугъу пашманди йишв адапӀнийи, дугъаз нивкӀра гъафундайи.

¹⁹ Хъайигъан паччагь гвачӀнин акв илибшури гъудужву ва дишлади асланар айи ичӀахъна гьялакди гъушу.

²⁰ Даниял айи ичӀахъна хъуркьубси, паччагьди гъалабулугъ кади дугъаз дих апӀуру: – Я чӀиви Аллагьдин лукӀ, Даниял! Гьаммишан уву икрам апӀурайи яв Аллагьдихьан уву асланарихьан уьрхюз гъабхьнийкӀан?

²¹ Ва мушвахь Данияли паччагьдиз гъапи: – Паччагь, уву сагъ ишри!

²² Йиз Аллагьди Чан малайик гьаъну, дугъура асланарин музмузар илитӀну – магьа гьамци дурарихьан узук кучузкьан гъабхьундар, фицики узу Аллагьдин улихь сабдинкьан тахсиркар дарза, яв улихьра, паччагь, саб ляхнинкьан тахсиркар дарза.

²³ Думуган паччагь мициб ляхниин гизаф шад шулу ва Даниял ичӀʼан адагъуз амур апӀуру. Даниял ичӀʼан адагъу ва, лигуруш, дугъаз, чан Аллагьдихъ хъугъувализ лигну, асуллагь хатӀа дубхьнадайи.

²⁴ Паччагьди Даниялиина аьрзачи гъахьи ксар хъади гъюз ва дурар, чпин веледарра, хпарра хъади, асланарихьна ичӀаз гатӀахьуз амур апӀуру. Дурар, ичӀан кӀаназ хъуркьайизра, асланари, алархьну, тикйир-тикйир гъапӀнийи.

²⁵ Гьадмуган Дари паччагьди гьамци гъибикӀнийи: «Жилиин аликьан вари халкьариз, тухмариз ва миллетариз. Учвуз ислягьвал ва хъуркьувалар ишричвуз!

²⁶ Магьа йиз буйругъ: йиз гьюкмикк ккайикьан вари паччагьлугъ Даниялин Аллагьдин улихь гукӀуни ва гучӀ кади ибшри. Фицики думу ву чӀиви Аллагь Ва гъузрур ву даима, Дугъан паччагьлугъ ккутӀруб дар, гьюкмин Дугъан аьхир хьибдар.

²⁷ Дугъу уьрхюра ва апӀура азад, Завариин ва жилариин керематар, аьламатнан лишнар улупура. Дугъу гъюрхну асланархьан Даниял».

²⁸ Ва Дари паччагьдин гьюкмин вахтари, хъасин Персияйин Кир паччагьдин вахтарира, Даниял сагъ-саламатди яшамиш шули гъахьну.