Даниял 10 - Гирами Китаб

Лизи палтар али кас

¹ Кири, Персияйин паччагьди, гьюкум хъапӀри шубудпи йисан Даниялиз (вая жараси, Билтишасариз) аьянвал – зурба дявдикан гьякь хабар – шулу. Даниял улупубдиинди му аьянвалин гъаври гъахьну.

² Гьадму вахтназ улихьна тамам шубуб гьяфтайин арайиъ узу – Даниял – пашманвалиъ ади гъахьунза:

³ ицци хурагар гъитӀундарза, йиккунна чяхрин ниъкьан хъапӀундарза, ва гьаму шубуб гьяфтайин арайиъ жандикан ицци ниарра кдатундарза.

⁴ Хъа сабпи вазлин къанна юкьудпи йигъан узу Тигрис кӀуру зурба нирихъ хъайза.

⁵ Узу кӀул за гъапӀза – ва гъябкъзуз: Аллагьдин гъуллугъчийиин шлустар лизи палтарра алди, кьялаъ гъизилин чӀулра идибтӀну фуж-вуш дийигъна.

⁶ Дугъан беден – багьалу гъвансиб, маш – цӀайлапнин крибчувалсиб, улар – чирагъарин цӀийирсдар, ликар-хилари дабхнайи йифриси нур туврайи, хъа сесра, гизаф инсанар сабишвʼинди ягъалди улхругансиб, вуйи.

⁷ Анжагъ сар узузтӀан, ДаниялизтӀан, гъяркъюндайи думу, хъа узухъ хъайи адмийириз гъяркъюндайи; амма дурарик гьациб къурхулувал кабхънийики, гьятта дурар гьарма саб йишвахъинди гьергу ва жин гъаши.

⁸ Узу сар хьимиза, ва гьаму улупбаъ шулайиб сар узузтӀан гъябкъюндайзуз. Ва жандиъ айи гуж вари гъубшдиз, узу кучӀвзу ва иллаж гъахьизу.

⁹ Узуз дугъан дих гъеебхьзуз – ва му дихнан сес кубкӀси, гъаврихъан душну, маш кӀанаккди ккадакзу.

¹⁰ Мушвахь узук хил кубкӀнийи ва диди за гъапӀзу – магьа гьамус, хилар ккудукьну, кьамкьариинди дусназа.

¹¹ Ва дугъу гъапизуз: – Даниял, Аллагьдин гирами! Узу увуз кӀурубдин гъаври йихь. Гъудужв, фицики узу увухьна гьаънайир вузу. Гьаци гъапи дугъу узуз, узура гукӀуни гъудужвза.

¹² Дугъу узуз гъапизуз: – ГучӀ мапӀан, Даниял! Уву, яв Аллагьдин улихь кӀул ис дапӀну, аьгъюваларихьна чалишмиш хьуз хъюгъю гьятта садпи йигъланмина, яв гафар деерхьна. Яв гафар себеб вуди дуфнайир вуза.

¹³ Персияйин паччагьлугъ уьбхру малайик къанна сад йигъандин арайиъ узуз къаршуди дийигъну гъахьну. Душваъ узу Персияйин паччгьарихъди машна-машди гъахьунза – ва узухьна кюмекназ Микаил, заан малайикарикан сар, гъафнийзухьна.

¹⁴ Хъа гьамус, аьхирзамандихъна яв халкьдиз фу шулуш, увуз ктибтуз гъафунза, гьаз гъапиш рябкъюрайиб гьадму йигъарикан ву.

¹⁵ Гьамци кӀуйи дугъу узуз, хъа узу, кӀул ис дапӀну, чӀал дибисну дийигъза.

¹⁶ Амма фуж-вуш сар, инсандин юруш айир, йиз кӀвантӀарик куркӀу – думуган узу чӀалниина гъафиза ва йиз улихь дийигънайириз гъапиза: – Я аьхюр! Улупбахъди аьян шулайи вахтна, узу аьзиятнакк ккади гъахьунзу, йиз жандиан кьувватра удубчӀву.

¹⁷ Узхьан, йиз агъайин лукӀрахьан, увухъди, йиз агъайихъди, гафар апӀуз шуйкӀан? Узуъ затра аман имдарзуъ, ва хътабгъурайи илра кмиди бисурайиз.

¹⁸ Ва хъана фуж-вуш сар, инсандин юруш айир, узук куркӀну – ва йиз аман гужал гъапӀу.

¹⁹ Дугъу гъапи: – ГучӀ мапӀан, Аллагьдин гирами! Сагъ ишриву, кӀубанди гъуз, кӀубанди гъуз! Дугъан гьаму гафарихъди йиз жандиз кьувватра гъафи. Узу гъапиза: – Йип, я аьхюр! Уву йиз кьувват кьяляхъ тувунва.

²⁰ Ва дугъу гъапи: – Узу увухьна гьаз гъафир вуш, аьгъянуз? Гьамусяаьт узу фарсар уьрхру малайикдихъди вуйи женгназ кьяляхъ хътакурза, хъа думу ккудубкӀумитӀлан грекар уьрхру малайик гъюру.

²¹ Амма вушра, Гьякь Китабдик фу дибикӀнаш, хабар дебккдизавуз. Дурарихъди вуйи женгнаъ узуз сарира кюмек апӀурадарзуз, анжагъ МикаилитӀан, учву, жугьтар, уьрхру малайикдитӀан.