Ачмиш 8 - Гирами Китаб

Ургубпи печать алдабгъуб

¹ Дугъу ургубпи печать алдабгъиган, гьацӀ сяаьтнасикьан аьршариъ сессузвал абхъру.

² Узуз Аллагьдин улихь ургур малайик дийигъну гъяркъзуз. Дурарихьна ургуб зурна тувну шулу.

³ Жара малайик гъюру. Думу гъурбнар ургрушван гъвалахъ, кум ккапӀру гъизилин гъабсибра хьади, дугъужвуру. Дугъахьна, Аллагьдин вари халкьдин ккарагбарихъди, тахтнан улихь хьайи гъизилин гъурбнар ургрушвʼина хпан бадали, бегьемди ицци ниар хъайи, ургру ччимарра тувру.

⁴ Хъа малайикдин хилиъ айи гъизилин гъабсибдиан Аллагьдин улихь, Дугъан халкьдин ккарагбарихъди сабси, ицци ниъ хъайи кум за шулу.

⁵ Малайикди кум ккапӀру гъабразди, гъурбнар ургрушвлан цӀа гъадабгъну, кабхьуз ипру, хъа думу дюнʼяйиинди гатӀабхьуру, хъасин душвʼин завар рахуру, гьарай утӀубччвуру, кьюркьлин цӀийир кричуру ва жилар тӀурччвуру.

Ургуб зурна

⁶ Хъа ургуб зурна дидиснайи ургур малайик зурнийир рахуз гьязур духьнайи.

⁷ Сарпири гъарабху – ва ифдихьди гъибикьнайи мирккна цӀа абхьу ва жилиин дабхьу. Дюнʼяйин шубубпи пай жилар гъургу, шубубпи пай гьарар ва вари чру укӀ гъубгу.

⁸ Кьюрпи малайикди зурна гъарабху – убгурайи зурба дагъсиб гьюлеризди абхьу. Хъа гьюлерин шубубпи пай шид ифдиз илтӀибкӀнийи.

⁹ Гьюлериъ шубубпи пай чӀивишин гъирмиш гъабхьнийи ва шубубпи пай гимйир ккахьнийи.

¹⁰ Шубурпи малайикди зурна гъарабху – завʼан чирагъси убгурайи зурба хяд абхъу. Думу шубубпи пай нирариина ва штарин булагъариина абхънийи.

¹¹ Думу хядраз КьутӀкьли Кьал кӀуйи. Вари штарин шубубпи пай кьалси кьутӀкьли гъабхьнийи ва гизаф адмийир гьациб штуан гъийихнийи, гьаз гъапиш штар кьутӀкьли гъахьнийи.

¹² Юкьурпи малайикди зурна гъиву – ригъдин ва вазлин шубубпи пай ва шубубпи пай хядар пуч гъапӀу. Дурарин шу-шубубпи паяр гъидису ва, акв адарди, йишвандин шубубпи пайси, шубубпи пай йигъандинра мучӀуди гъабхьи.

¹³ Узуз аьршарикк тӀибхурайи люкь гъябкъюнзуз. Диди зурба дихниинди кӀурайиб гъеебхьунзуз: «Гьамус имбуну шубур малайикди хъаъру зурнайин дихарихьан дюнʼяйиин яшамиш шулайидарин язухъийкӀана, язухъийкӀана, язухъийкӀана!»