Tihlabelelo 98 - Siswati 1996 Bible

Simakadze utawubusa umhlaba

¹ Sihlabelelo. Hlabelani ingoma lensha kuSimakadze, ngobe wente tintfo letinkhulu; wancoba ngesandla sakhe sekudla nangengalo yakhe lengcwele.

² Simakadze uyente yatiwa insindziso yakhe, kulunga kwakhe ukwembulile emehlweni ebetive.

³ Uwukhumbulile umusa wakhe nekwetsembeka kwakhe kubaka-Israyeli. Imikhawulo yonkhe yemhlaba iyibonile insindziso yaNkulunkulu.

⁴ Hlokomani nidvumise Nkulunkulu, nine bantfu bemhlaba. Mdvumiseni ngengoma yekujabula, nihlabele ngekumdvumisa.

⁵ Hlabelani nidvumise Nkulunkulu ngehabhu, hlabelani ngehabhu nangeliphimbo.

⁶ Shayani emacilongo nelivenge. Hlokomani embikwaSimakadze iNkhosi.

⁷ Akubhodle lwandle, nako konkhe lokukulo. Akubhodle umhlaba nalabahlala kuwo!

⁸ Imifula ayishaye tandla ibetsele. Tintsaba tihlabele kanyekanye ngenjabulo

⁹ embikwaSimakadze, ngobe uyeta kutakwehlulela umhlaba ngekulunga, yebo, ehlulele tive ngebucotfo.