Tihlabelelo 25 - Siswati 1996 Bible

Umthandazo wekwelulekwa nekutsetselelwa nekuvikelwa

Sihlabelelo saDavide.

¹ Ngiwuphakamisela kuwe, Simakadze, umphefumulo wami.

² Nkulunkulu wami, ngetsembele kuwe, ngisindzise ehlazweni lekwehlulwa. Titsa tami tingatijabulisi ngami.

³ Yebo, labo labetsembele kuwe kute namunye loyawuhlazeka; kepha bayawuhlazeka labo labakuhlubuka ngelite.

⁴ Ngikhombise tindlela takho, Simakadze, ungifundzise imikhondvo yakho.

⁵ Ngihambise ecinisweni lakho, ungifundzise, ngobe wena unguNkulunkulu wensindziso yami. Litsemba lami likuwe lonkhe lilanga.

⁶ Simakadze, khumbula umusa wakho nelutsandvo lwakho, ngobe kwakuvele kukhona phakadze.

⁷ Ungatikhumbuli tono tami, netiphambuko tebusha bami, kodvwa ngikhumbule ngekwemusa wakho, Simakadze, ngikhumbule ngekulunga kwakho.

⁸ Simakadze muhle ulungile, ngako-ke ufundzisa toni indlela lekungiyo sibili.

⁹ Labatfobekile ubaholela kulokulungile; labatfobekile ubafundzisa indlela yakhe.

¹⁰ Tonkhe tindlela taSimakadze tibubele neliciniso kulabo labagcina sivumelwane sakhe kanye nemiyalo yakhe.

¹¹ Simakadze, ngenca yelibito lakho ngitsetselele kona kwami, ngobe kukhulu.

¹² Ngubani lowesaba Simakadze? Lowo uyawumfundzisa leyo ndlela, lekhetselwe yena.

¹³ Yena lucobo uyawuhlala achume, intalo yakhe iyawudla lifa lemhlaba.

¹⁴ Timfihlakalo takhe, Simakadze, utinika labamesabako, abafundzise kwati sivumelwane sakhe.

¹⁵ Emehlo ami ahlala abheke kuSimakadze, ngobe nguye lokhipha tinyawo tami elugibeni.

¹⁶ Gucukela kimi, Simakadze, ube nemusa kimi, ngobe nginesitunge, ngihluphekile.

¹⁷ Ngiphumute kuletinhlupheko tenhlitiyo yami, ungikhokhe etinhluphekweni tami.

¹⁸ Buka kuhlupheka kwami nekukhandleka kwami, ungitsetselele tonkhe tono tami.

¹⁹ Buka titsa tami, kutsi setinyenti kanganani, tingitondza ngelunya.

²⁰ Londvolota imphilo yami, ungephule ngingahlazeki, ngobe naku ngikhosele kuwe.

²¹ Shangatsi bumsulwa nebucotfo bungangigcina, ngobe litsemba lami likuwe.

²² Awu, Nkulunkulu! Khulula Israyeli etinhluphekweni takhe tonkhe.