Makho 5 - Siswati 1996 Bible

Kuphiliswa kwendvodza lenemadimoni

¹ Base bewelela ngesheya kweLwandle LwaseGalile eveni laseGerasa.

² Watsi Jesu uyaphuma nje esikebheni, wahlangabetwa yindvodza lebeyinelidimoni iphuma emathuneni,

³ lapho yase ihlala khona. Kwase kute namunye umuntfu labengakhona kuyibopha ngisho nangetinketane.

⁴ Beyike yetanywa ngaphambili kutsi iboshwe ngetindilimo nangetinketane, kodvwa beyitidzabula incamule naletinketane tibe ticucu. Kute labenemandla ekuyehlula.

⁵ Busuku nemini beyikhala impongoloze etintsabeni nasemathuneni, itihhwebhe ngematje.

⁶ Yatsi nayibona Jesu abucalu, yesuka ngematubane yaya kuye yafika yamkhotsama ikhuleka.

⁷ Yamemeta ngelivi lelikhulu yatsi: “Ufunani kimi wena, Jesu, Ndvodzana yaNkulunkulu Losetikwako Konkhe? Mane ungangihluphi!”

⁸ Yakusho loku, ngobe Jesu abesatsite kuyo: “Phuma dimoni kulomuntfu!”

⁹ Jesu wase uyabuta utsi: “Ungubani libito lakho?” Yamphendvula yatsi: “Libito lami nguSibanyenti, ngobe silibutfo.”

¹⁰ Emadimoni ase ancenga Jesu kutsi angawacoshi kulelo live.

¹¹ Bekukhona umhlambi lomkhulu wetihhontji kuleyo ndzawo utse bhidli, udla eceleni lentsaba.

¹² Yase iyatincengela lemimoya lemibi itsi: “Mane usitfumele lapha etihhontjini singene kuto.”

¹³ Wayivumela. Yaphuma-ke imimoya lemibi kulowo muntfu yangena etihhontjini. Wonkhe lowo mhlambi lowawungahle ube tihhontji letiti-2 000 wagijima, wahholokoshela eweni, wagcumkela elwandle, wacwila, wafa.

¹⁴ Bantfu lababeluse letingulube babaleka bayawubika kubantfu edolobheni nasemaphandleni. Bantfu beta batawutibonela loko lokwase kwentekile.

¹⁵ Befika kuJesu bayibona lendvodza lebeyikadze inemadimoni, lebeyibitwa ngekutsi nguSibanyenti. Beyihleti phansi, yembetse kahle, isangulukile nasemcondvweni. Betfuka, besaba.

¹⁶ Labo lababebonile babachazela konkhe lokwakwentekile kulomuntfu labenemadimoni, nalokwakwentekile etihhontjini.

¹⁷ Base bancenga Jesu kutsi akesuke eveni labo.

¹⁸ Kwatsi Jesu nakakhwela esikebheni, lendvodza lebeyinemadimoni yacela kuJesu kutsi ihambe naye.

¹⁹ Kepha Jesu wala, watsi kuyo: “Buyela ekhaya kubantfu bakini, ubatjele kutsi iNkhosi ikwentele tintfo letinkhulu kangakanani, nekutsi ikuhawukele kanjani.”

²⁰ Yahamba-ke lendvodza yacala kumemetela eDekhapholisi kutsi Jesu uyentele tintfo letinkhulu kangakanani. Bonkhe bamangala nabakuva loko.

Indvodzakati yaJayiru nemfati lotsintse ingubo yaJesu

²¹ Jesu wewela ngesikebhe wabuyela ngesheya kwelwandle. Sicuku lesikhulu sebantfu seta kuye ngaselwandle.

²² Kwefika kuye indvodza, libito layo kunguJayiru, umphatsi welisinagoge, yanelela kubona Jesu yatilahla phansi embikwakhe.

²³ Yamncenga yatsi: “Indvodzakati yami lencane igulela kufa, sekubonwa ngekusa. Mane ute uteyibeka tandla itekusindza iphile.”

²⁴ Jesu wavuma wahamba nayo. Sicumbi lesikhulu sebantfu samlandzela simkakile.

²⁵ Bekukhona umfati labegula, aphetfwe sifo sekopha, lesase sicedze iminyaka leli-12 simphetse.

²⁶ Abesagule kakhulu, asaphelelwe timali kulabelaphako, angasenalutfo esandleni, kodvwa kujinge kubete buncono, kugula kuya embili.

²⁷ Abesake weva tidvumo ngaJesu, ngako watfumbeleta ngemuva kwaJesu watsintsa ingubo yakhe,

²⁸ ngobe wacabanga watsi: “Nangingamane nje ngitsintse ingubo yakhe, ngitawuphila.”

²⁹ Kopha kwancamuka khona lapho, wativa asaphilile esifeni lebesimphetse.

³⁰ Masinyane Jesu wativela kutsi kukhona emandla lasaphumile kuye, wagucuka, wacalata, watsi: “Ngubani lotsintse ingubo yami?”

³¹ Bafundzi bakhe batsi kuye: “Hhawu, ungatsi usibona nje lesiminyaminya lesikukakile ube utsi: ‘Ngubani lotsintse ingubo yami?’ ”

³² Wacalata afuna kubona kutsi ngubani lona lomtsintsile.

³³ Kodvwa lomfati ati kahle kutsi kwentekeni kuye, wasondzela ngembili achachatela, ngenca yekwesaba, waguca phansi embikwakhe, wamtjela lonkhe liciniso.

³⁴ Jesu watsi kuye: “Ndvodzakati yami, kukholwa kwakho kukuphilisile. Hamba ngekuthula, uphile esifeni sakho.”

³⁵ Asakhuluma nje Jesu, kwefika tigijimi tiphuma kaJayiru tambikela tatsi: “Indvodzakati yakho seyifile. Sale umyekela loMfundzisi, ungasamhluphi.”

³⁶ Kodvwa Jesu, angakunaki loku letatikusho, watsi kuJayiro: “Ungesabi, kholwa kuphela.”

³⁷ Jesu wesuka lapho wahamba; wabalela bonkhe kutsi bamlandzele, ngaphandle kwaboPhetro, naJakobe, naJohane, umnakaboJakobe.

³⁸ Batsi nabefika endlini yalomphatsi welisinagoge, beva sililo kutse mpu, bantfu bakhala.

³⁹ Watsi kube angene, watsi kubo: “Nikhalelani, nidzindza sililo nje? Lomntfwana akafi, ulele.”

⁴⁰ Bamane bamhleka bulima nje. Wabakhiphela ngephandle bonkhe, watsatsa uyise nenina walomntfwana, nalabo labebanaye, wangena nabo lapho bekunemntfwana khona.

⁴¹ Wafike wabamba lomntfwana ngesandla, watsi kuye: “Thalitha, khumi,” lokusho kutsi: “Ntfombatana, ngitsi kuwe: Vuka!”

⁴² Intfombatana yasukuma masinyane, yahamba. Bese ineminyaka leli-12 budzala. Masinyane bantfu behlelwa kwesaba nekumangala lokukhulu.

⁴³ Jesu wabayalisisa kutsi bangatjeli muntfu ngaloku. Watsi abayiphe kudla lentfombatana.