Makho 4 - Siswati 1996 Bible

Umfanekiso ngemhlanyeli

¹ Jesu waphindza futsi wafundzisa bantfu eceleni kweLwandle lwaseGalile. Ticuku ngeticuku tebantfu tabutsana ngakuye, wadzimate wakhwela wahlala esikebheni lesasiselwandle, bantfu bema elusentseni lwelwandle.

² Wabafundzisa tintfo letinyenti ngemifanekiso atsi:

³ “Lalelani la: Umuntfu lotsite wake wahamba wayawuhlanyela.

⁴ Kwatsi ngesikhatsi ahlanyela, lenye inhlanyelo yawela endleleni, kwefika tinyoni tayidla.

⁵ Lenye yawela edvwaleni lelalimbonywe ngumhlabashana, yashesha yamila, ngobe lomhlabashana bewungemnyenti.

⁶ Kwefika lilanga labalela, latishisa letitfombo, tabuna ngobe timphandze tato tatingakashoni ngalokwenele.

⁷ Lenye yawela elukhuleni lwemanyeva, lwakhula lwaminyetela titfombo ngemanyeva alo tangabe tisatsela.

⁸ Lenye yawela emhlabatsini lovundzile, yamila kahle, yakhula, yatsela titselo: lenye ngema-30, lenye ngema-60, lenye ngelikhulu.”

⁹ Jesu wephetsa ngekutsi: “Lonendlebe yekuva akeve.”

Injongo yekusebentisa imifanekiso

¹⁰ Kwatsi Jesu asasele nebafundzi bakhe lababeli-12 nalabanye lababemlandzela, bambuta ngalemifanekiso.

¹¹ Waphendvula watsi: “Nine niphiwe imfihlakalo yembuso waNkulunkulu, kodvwa laba labangephandle konkhe bakutfola ngemifanekiso,

¹² kuze kutsi: “ ‘Nome babona, bangakhanyelwa kahle, nome beva, bangacacelwa kahle, bangetiwuphendvuka babuyele kuNkulunkulu, batsetselelwe tono tabo.’ ”

Jesu uchaza umfanekiso ngemhlanyeli

¹³ Jesu watsi kubo: “Nisho kutsi nani lomfanekiso aniwuva? Pho, nitayiva kanjani leminye imifanekiso?

¹⁴ Umhlanyeli uhlanyela livi laNkulunkulu.

¹⁵ Kuhlanyelwa kwaleyo leyawela endleleni kufanekisa labo labatsi bangaliva livi, masinyane kufike Sathane alitsatse lelivi lelihlanyelwe kubo.

¹⁶ Kuhlanyelwa kwaleyo leyawela emadvwaleni kufanekisa labo labatsi bangaliva livi basheshe balemukele ngekujabula,

¹⁷ kepha babe bate timphandze letishona ngalokwenele, balibamba kwesikhashana nje, batsi ngekuhlaselwa tilingo netinhlupheko ngenca yalo basheshe bahlubuke.

¹⁸ Kuhlanyelwa kwaleyo leyawela emanyeveni kufanekisa labo labalivako livi,

¹⁹ kepha kunaka tintfo tasemhlabeni nekujabulela umcebo, nekukhangwa nguletinye tintfo letinyenti kubangene, kuliminyetele livi, bangabe basatsela titselo.

²⁰ Kuhlanyelwa emhlabatsini lovundzile kufanekisa labo labalivako livi balemukele batsele titselo: ngema-30 nome ngema-60 nome ngelikhulu.”

Sibane lesokhelwe ngaphansi kwesitja

²¹ Wachubeka Jesu watsi: “Kodvwa kuke kwenteke yini kutsi kokhelwe sibane siletfwe endlini, bese simbonywa ngesitja nome sifakwe phansi kwembhedze? Singete sabekwa endzaweni yaso yini?

²² Konkhe lokufihlakele kuyawuvetwa ebaleni, naloko lokumbonyiwe kuyawugwatjulwa.

²³ Lonendlebe yekuva akeve.”

²⁴ Wachubeka watsi: “Caphelani inshokutsini yaloku lenikuvako. Leso silinganiso lenilinganisa ngaso nani niyawulinganiswa ngaso, nibuye nengetelwe futsi.

²⁵ Lowo lonako uyakwengetelwa; lowo lote uyakwemukwa naloko lokuncane lanako.”

Umfanekiso ngenhlanyelo letimilelako

²⁶ Jesu wachubeka watsi: “Umbuso waNkulunkulu ufanana nanaku: Umuntfu usakata inhlanyelo ensimini yakhe,

²⁷ ebusuku uyalala, emini avuke, nenhlanyelo iyamila ikhule, kodvwa yena abe angati kutsi ikhula njani.

²⁸ Umhlaba ngekwawo uveta kudla: Kucala kube likhaba, bese kuyabhaceka, kube netibhuluja leticinile,

²⁹ kuyaye kutsi kungoma, kutsatfwe lisikela kuyewuvunwa, ngobe sikhatsi sekuvuna sesifikile.”

Umfanekiso ngesihlahla sendlulamitsi

³⁰ Jesu wabuta watsi: “Kodvwa umbuso waNkulunkulu singawufananisa nani nje? Singawubekisa ngani kodvwa?

³¹ Unjengenhlanyelo yendlulamitsi lencane kakhulu.

³² Kepha umuntfu nakayihlanyela emhlabatsini, itsi ingamila, ikhule ibe sihlahla lesikhulu lesiveta emagala lamakhulu lanemtfunti, ngisho netinyoni tesiganga tifike takhe tidleke tato kuso.”

Jesu ukhuluma ngemifanekiso

³³ Jesu abekhuluma kubantfu ngemifanekiso leminyenti lenjalo, abashumayela livi ngalokubalingene kutsi bakuve.

³⁴ Abengakhulumi lutfo angasebentisi imifanekiso, kantsi nase babodvwana nebafundzi bakhe, bona abebachazela konkhe.

Jesu ubindzisa sivunguvungu

³⁵ Kusihlwa ngalelo langa Jesu watjela bafundzi bakhe watsi: “Aseweleleni ngesheya kwelwandle.”

³⁶ Besuka basishiya sicumbi sebantfu, bahamba ngalesikebhe labekuso. Bekunaletinye tikebhe letatihambisana nalesabo.

³⁷ Kwesuka lesikhulu sivunguvungu, emagagasi angena esikebheni adzimate acishe asigcwalisa.

³⁸ Jesu abengemuva esikebheni, acamele emcamelweni, alele. Bamvusa batsi: “Mfundzisi, walala nje sifa?”

³⁹ Wavuka wekhuta lomoya watsi kulolwandle: “Thula, utsi nya!” Umoya wakhawula khona lapho, kwathula kwatsi nya.

⁴⁰ Watsi kubafundzi: “Nesabani kodvwa? Nentiwa yini lokutsi nibete kukholwa?”

⁴¹ Bafikelwa kwesaba lokukhulu; kwaba ngulowo wabuta lomunye atsi: “Kantsi ngubani lona? Wekhuta umoya ngisho nelwandle kumlalele!”