Lukha 21 - Siswati 1996 Bible

Umnikelo wemfelokati

¹ Jesu abebukela tinjinga tibeka iminikelo ebhokisini leminikelo yelithempeli,

² wase ubona umfelokati labephuye kakhulu lowanikela ngetinhlavu temali letimbili letenta lisenti.

³ Wase utsi: “Nginitjela kutsi lomfelokati lophuyile unikele kakhulu kunabo bonkhe labanikele,

⁴ ngobe laba labanye banikele ngalokusele ebunjingeni babo; kodvwa yena, njengobe aphuyile nje, unikele ngako konkhe labengahle aphile ngako.”

Jesu ukhuluma ngekubhidlitwa kwelithempeli

⁵ Labanye bebakhuluma ngelithempeli, nebuhle balo nangekuhlotjiswa kwalo ngematje lamahle, nangaletinye tintfo letatinikelwa kuNkulunkulu; Jesu watsi:

⁶ “Niyakubona konkhe loku, sikhatsi siyeta lapho kuyawubate litje leliyawusala lihleti etikwalelinye; onkhe ayawudzilitelwa phansi.”

Tinhlupheko netibonakaliso tesikhatsi

⁷ Babuta batsi: “Mfundzisi, kuyakwenteka nini loko? Siyini sibonakaliso lesiyawubona ngaso kutsi sengiso sikhatsi sekwenteka kwaletintfo?”

⁸ Jesu watsi: “Caphelani, ningedukiswa. Kuyawufika bantfu labanyenti egameni lami, batsi: ‘Nginguye!’ batsi: ‘Sikhatsi sesifikile!’ Kodvwa ningabalandzeli!

⁹ Ningesabi naniva ngetimphi nengucuko, ngobe letintfo kufanele tenteke kucala, kodvwa atisho kutsi siphetfo sesifikile.”

¹⁰ Wachubeka watsi: “Sive siyawuvukela lesinye, umbuso uvukele lomunye.

¹¹ Kuyawuba nekutamatama kwemhlaba lokwesabekako lokunyenti, kuvame indlala netifo letingelapheki naletitsatselwanako etindzaweni letinyenti, kube netesabekiso netibonakaliso letikhulu letivela esibhakabhakeni.

¹² “Noko, ngembili kwako konkhe loku niyawutingelwa, niboshwe niletfwe emasinagogeni, nibekwe emacala bese nifakwa emajele; niyawuletfwa embikwemakhosi nebabusi ngenca yelibito lami.

¹³ Lelo kuyawuba litfuba lenu lekufakaza ngaleliVangeli.

¹⁴ Timiseleni etinhlitiyweni nasetingcondvweni tenu, ngekutsi ningatihluphi ngekucabanga kutsi niyawutivikela kanjani;

¹⁵ ngobe phela ngiyawuninika emavi nekuhlakanipha lekuyawubate nome sinye setitsa tenu lesiyawuba nemandla ekumelana nekuphikisana nani.

¹⁶ Niyawunikelwa ngisho nabatali benu, nabomnakenu, netihlobo tenu, nebangani benu; labanye benu bayawubulawa nekubulawa.

¹⁷ Wonkhe umuntfu uyawunitondza ngenca yelibito lami.

¹⁸ Kodvwa kute nome lunye nje lunwele loluyawulahleka etinhloko tenu.

¹⁹ Ciniselani ngekubeketela kwenu, niyawutisindzisa ngaloko.”

Jesu ukhuluma ngekubhidlitwa kweJerusalema

²⁰ “Nanibona iJerusalema itungeletwe timphi, nibovele nati kutsi seyitawubhidlitwa.

²¹ Labo labaseJudiya babalekele etintsabeni, kutsi labo labakulelo dolobha babaleke, bese kutsi labo labasetigangeni bangabe basangena kulelo dolobha.

²² Phela lamalanga ngesijeziso, newekugcwaliseka kwako konkhe lokushiwo ngimiBhalo.

²³ “Maye kulabo labayawube bakhulelwe, nakulabo labayakube bamunyisa tinswane kulawo malanga! Kuyakufika lusizi lolukhulu kulelive, nentfukutselo yaNkulunkulu iyakulwa nalesive;

²⁴ bayawubulawa ngenkemba, batsatfwe bentiwe babe titfunjwa etiveni tonkhe; nebetive bayakuyigcobagcoba iJerusalema, kuze kugcwaliseke sikhatsi sabo.”

Kufika kweNdvodzana yeMuntfu

²⁵ “Kuyawuba netibonakaliso elangeni, nasenyangeni, nasetinkhanyetini; emhlabeni tonkhe tive tiyawufikelwa kudzidzeka nekudzangala, tesabe kudvungutela nekudvuma kwelwandle nemagagasi alo,

²⁶ bantfu bayawucaleka babe nesiyeti ngenca yekwesaba loko labayawube babheke kutsi kwenteke emhlabeni wonkhe; ngobe emandla emkhatsi ayawutanyatanyiswa.

²⁷ Kusenjalo iNdvodzana yeMuntfu iyawubonakala, ita ngelifu ngemandla lamakhulu neludvumo.

²⁸ Nakucala kwenteka letintfo, sukumani niphakamise tinhloko tenu, ngobe insindziso yenu iyawube seyisedvutane.”

Sifundvo ngesihlahla semkhiwa

²⁹ Jesu wabatjela lomfanekiso watsi: “Khumbulani sihlahla semkhiwa naletinye tihlahla;

³⁰ nasenibona kuhluma emagala aba luhlata nivele nati kutsi lihlobo seliyetfwasa.

³¹ Ngalokufanako-ke, nanibona letintfo tenteka, nibokwati kutsi umbuso waNkulunkulu sewutawufika.

³² Impela ngiyanitjela ngitsi: Tonkhe letintfo tiyakwenteka singakapheli lesitukulwane salamuhla.

³³ Lizulu nemhlaba kuyawushabalala, kodvwa emavi ami ngeke endlule.”

Sidzingo sekulindza

³⁴ “Ticaphelisiseni! Ningatifaki kakhulu emadzilini nasekunatseni lokudzakanako, nasekunakeni tintfo talomhlaba, funa lelo langa linitume;

³⁵ ngobe liyawufika njengasochaka kubantfu bonkhe emhlabeni wonkhe.

³⁶ Lindzani nithandaze onkhe emalanga, khona nitawuba nemandla ekuphunyula kuletintfo letitakwenteka nitekwati kuma embikweNdvodzana yeMuntfu.”

³⁷ Emini Jesu abefundzisa ethempelini, bese kutsi ebusuku ayewukhosela eNtsabeni Yemincumo.

³⁸ Bonkhe bantfu babevukela ethempelini bayewumlalela nakakhuluma.