Jobe 36 - Siswati 1996 Bible

¹ Elihu wachubeka watsi:

² “Ngicela ungibeketelele kwesikhashana, ngitakukhombisa kutsi kunyenti lokusengashiwo ekumeleleni Nkulunkulu.

³ Lwati lwami ngilulomba khashane kabi, ngitawubonakalisa kutsi Nkulunkulu, uMdali wami, ulungile.

⁴ Cinisekani-ke kutsi emavi ami akasiwo emanga; lapha embikwenu kume umuntfu lohlakaniphe ngempela.

⁵ “Nkulunkulu unemandla, kodvwa akabedzeleli bantfu; unemandla, futsi ucinisekile kulenhloso yakhe.

⁶ Akabagcini lababi baphilile, kodvwa labamphofu uyabanika emalungelo abo.

⁷ Emehlo akhe akawesusi kulabalungile, ubabeka kanye nemakhosi etihlalweni tebukhosi, abaphakamise kokuphela.

⁸ Kodvwa bantfu nababoshwe ngetinketane, batsekeletwe ngetibopho tetinhlupheko,

⁹ uyaye abatjele kutsi yini labayentile, kutsi bone kuye ngemabomu ngekutiphakamisa.

¹⁰ Ubenta batfobele kwelulekwa, abayale kutsi baphendvuke ekoneni kwabo.

¹¹ Nabalalela bamkhonte yena, bayawuphila yonkhe imphilo yabo baphumelela neminyaka yabo beneliseka.

¹² Kodvwa nabangalaleli, bayawubhubha ngenkemba, bafe bangati nekwati.

¹³ “Labangamesabi Nkulunkulu bafukamela lulaka, ngisho nome asababopha ngetinketane, abakhali bacele lusito.

¹⁴ Bafa basebasha, bafele emkhatsini wetingwadla letindvuna letisetindlini tekukhontela tithico.

¹⁵ Kodvwa labo labahluphekako uyabakhulula ekuhluphekeni kwabo, ukhuluma kubo basetinhlungwini tabo.

¹⁶ “Nkulunkulu ukwephula emihlatsini yekukhatsateka, ukubeka endzaweni lebanti lengenako kubandzeteleka nome kwani, akubeke ekunetsetekeni uvele ngenhloko enaleni, lapho ungakhetsa lokutsandzako khona.

¹⁷ Kodvwa manje sewetfwele sigwebo, lesifanele lababi, sigwebo nemtsetfocotfo sekukubambile.

¹⁸ Caphela kutsi kubete lokuhuha ngebunjinga, ungavumi kwedukiswa tinsambansamba temidizo.

¹⁹ Emandla akho kanye nebunjinga bakho kungakugcina yini ekutseni ungakhatsateki?

²⁰ Ungabukhaleli busuku kutsi buyawufika nini, sikhatsi lapho tive tonkhe tiyawubhubha tiphele.

²¹ Caphela ungagucukeli kulokubi, kona lokubonakala shangatsi uyakunconota kunekuhlupheka.

²² “Nkulunkulu uphakeme emandleni akhe, ngubani nje lofundzisa njengaye?

²³ Ukhona yini lowake watjela Nkulunkulu kutsi kufanele enteni, nome-ke atsi: ‘Wonile’?

²⁴ Khumbula-ke nawe kudvumisa imisebenti yakhe, njengaloku bantfu bahlala bahlabela ngetindvumiso.

²⁵ Bonkhe bantfu bemhlaba bakubonile loko, bantfu bakugolotela ngemehlo bakhashane.

²⁶ Maye, mkhulu Nkulunkulu! Bukhulu bakhe bungetulu kwekucondza kwetfu. Bunyenti beminyaka yakhe bungetulu kwekubala kwemuntfu.

²⁷ “Ukha ematfonsi emanti, acengeke abe yimvula leyehlela emifudlaneni.

²⁸ Emafu atfululela emhlabatsini ematfonsi awo, tihlambi tetimvula tehlele etikwebantfwana bebantfu.

²⁹ Ngubani nje longacondzisisa kutsi uwendlala kanjani emafu? Udvuma kanjani nje endzaweni yakhe yekuhlala?

³⁰ Ase ubuke nje kutsi uyisakata kanjani imibane yakhe emaceleni akhe, nekutsi ukucwilisa kanjani kujula kwetilwandle.

³¹ Nguleyo ndlela-ke labusa ngayo tive, atinike inala yekudla.

³² Ugcwalisa tandla takhe ngembane, bese uyawutjela kutsi awubaneke.

³³ Kudvuma kwakhe ngelitulu kumemetela kuta kwesihhuhhula semvula, ngobe ngisho netinkhomo tiyakumemetela kuta kwalo.”