Jobe 18 - Siswati 1996 Bible

Bildadi

¹ Wase uyaphendvula-ke Bildadi, umShuhi, watsi:

² “Utawuticedza nini letinkhulumo? Ase ubuyise ingcondvo, sitabe sesiyakhuluma-ke.

³ Wentiwa yini lokutsi usitsatse njengetinkhomo nje, shangatsi tsine sesitilima takho?

⁴ Wena ngobe nguwe lotidzabula ube ticucu ngalokutfukutsela kwakho, usho kutsi sekungalahlwa wonkhe lomhlaba ngenca yakho nje wedvwana? Nome-ke usho kutsi sale kusimuka emadvwala asuswe etindzaweni tawo?

⁵ “Sibane salomubi sicinyiwe, lilangabi lemlilo wakhe alisavutsi.

⁶ Kukhanya kwasekhaya lakhe sekubumnyama; sibane lesiseceleni kwakhe siyacisha.

⁷ Emandla etinyatselo takhe asayancipha; emacebo akhe asamjika phansi.

⁸ Netinyawo takhe setimkhaceke elugibeni, sewubatse uyazubalata luyamtongoletela.

⁹ Lugibe selumbambe ngesitsendze sakhe, sifu simntfonyile akasatsi khwasha.

¹⁰ Bambophele lifindvo endleleni yakhe leyenile, lugibe lusemkhondvweni wakhe.

¹¹ Tesabiso timetfusa ndzawana tonkhe, timhleli etitsendzeni.

¹² Inhlekelele ilambele yena, inhlekelele ikhamisele yena, nakatsi nje uyawa.

¹³ Itakudla sikhumba sakhe, litubulo lekufa lichobote ematsambo etitfo temtimba wakhe.

¹⁴ Ukhishiwe ekuvikelekeni kwasekhaya lakhe, washuciswa wamikiswa enkhosini yekufa.

¹⁵ Ekhaya lakhe sekubusela umlilo, sibabule lesivutsako sisakatwe lapho ahlala khona.

¹⁶ Timphandze takhe tiyoma lapha ngaphansi kwakhe, nemagala akhe asayabuna lapha ngetulu.

¹⁷ Kukhunjulwa kwakhe sekuyafiphala kulomhlaba, akasenabito lapha emhlabeni.

¹⁸ Sewucoshiwe ekukhanyeni wayiswa ebumnyameni, ulahliwe futsi lapha kulomhlaba.

¹⁹ Akasenabantfwana, nabatukulu sewute emkhatsini webantfu bakubo; kute insali lapho ake wahlala khona.

²⁰ Emadvodza asenshonalanga asemangele ngalesehlakalo sakhe; emadvodza asemphumalanga abanjwe kwesaba.

²¹ Ngempela injalo indzawo lapho kuhlala lomubi khona, lena yindzawo lehlala umuntfu longatani naNkulunkulu.”