Jobe 15 - Siswati 1996 Bible

Kukhulumisana kwesibili Elifazi

¹ Elifazi, umThemani, waphendvula watsi:

² “Umuntfu lohlakaniphile angaphendvula yini ngaletimphendvulo letilite, agcwalise sisu sakhe ngemoya loshisako wasemphumalanga?

³ Kute umuntfu lohlakaniphile longakhuluma ngalendlela lelite lokhuluma ngayo nome ativikele ngalamavi laluwangala.

⁴ Kodvwa ukubukela phansi kwesaba Nkulunkulu, uvimbele kuthandaza kuye.

⁵ Ngulesono sakho lelesenta ukhulume kanje; sewukhetse lulwimi lwalabanebucili.

⁶ Awulahlwa ngimi, kodvwa ulahlwa ngumlomo wakho, ulahlwa nguloko lokukhulunywa nguwe lucobo lwakho.

⁷ “Ucabanga kutsi nguwe wedvwa yini umuntfu wekucala lowatalwa? Wena watalwa tingakabikho yini tintsaba?

⁸ Uyalalela yini nangabe Nkulunkulu akhuluma nelibandla lakhe? Ucabanga kutsi kuhlakanipha kuphelela lapha kuwe yini?

⁹ Yini loyatiko lesingayati tsine? Lwati luni lonalo wena lesingenalo tsine?

¹⁰ Timphunga nalabadzala bangakitsi, yebo, emadvodza lamadzala, kwendlula uyihlo.

¹¹ Akukwenelisi yini kudvudvutwa nguNkulunkulu, nemagama lakhulunywe ngebunandzi kuwe?

¹² Inhlitiyo yakho ikutfumbeleni kangaka, nemehlo akho aphashateliswa yini,

¹³ kutsi ungaze utfukutselele Nkulunkulu, ukhiphe emagama lamabi kangaka ngemlomo wakho?

¹⁴ “Umuntfu abeyini kutsi angaba ngulohlantekile, nome-ke umuntfu lotelwe ngumfati kutsi angaba ngulolungile?

¹⁵ Nangabe Nkulunkulu akabetsembi labangcwele bakhe, nangabe ngisho nemazulu akahlanteki emehlweni akhe,

¹⁶ mncane kangakanani-ke, umuntfu lomubi nalowonakele, nalonatsa bubi njengemanti?

¹⁷ “Lalela lapha kimi, ngitakuchazela; ngitakutjela loko lesengikubonile.

¹⁸ Loko lasebakukhulumile labahlakaniphile labangatange babafihlele kona boyise,

¹⁹ labo labanikwa lelive kwabate wetive labendlula emkhatsini wabo, ngikutjela kona loko, ngitsi:

²⁰ Imihla yemuntfu lomubi igcwele lusizi netinhlupheko, uphila kanjalo lowo longenasisa yonkhe imihla lanikwe yona yekuphila kwakhe.

²¹ “Tindlebe takhe tigcwele imisindvo lesabisako, ngesikhatsi konkhe kubukeka shangatsi kuhle, umbhubhisi ngulapho amhlasela khona.

²² Akakholwa kutsi utawubuyela ebumnyameni. Vele, uyawuphelela enkembeni.

²³ Uhamba azulazule afunana nekudla. Uyati kutsi lilanga lebumnyama selisondzele.

²⁴ Buhlungu nelusizi kuyamtfutfumelisa, kumhlisibete njengenkhosi lese ihlomele kuhlasela,

²⁵ ngobe ugoca sibhakela, agocele Nkulunkulu, atiphakamise, achoshele Nkulunkulu,

²⁶ ngekwedzelela lokukhulu uhlasela Somandla ngelihawu lelicinile nalelilicinsi.

²⁷ Ngobe uhuce buso bakhe ngemafutsa akhe, lukhalo lwakhe lubhubuka imitsebe.

²⁸ “Uyawuhlala emadolobheni labhidlikile, etindlini lapho kungasahlali muntfu khona, tindlu lesetidzilike taba ngemahhinsi.

²⁹ Angeke asanjinga, nalomcebo wakhe ungeke ukhonse, netimphahla takhe tingeke tandze eveni.

³⁰ Angeke abubalekele bumnyama, lilangabi liyakubunisa emahlumela akhe, kuphefumula kwemlomo waNkulunkulu kuyawumtsatsa kumlahle khashane.

³¹ Akangatiyengi ngekwetsemba loko lokulihobosha, ngobe kute layakukutfola ngaloko.

³² Kuyawutsi sikhatsi sakhe singakefiki, akhokhelwe ngalokuphelele. Emagala akhe akayiwucwebetela, kodvwa ayawubuna.

³³ Uyawufanana nemvini lohhohlokelwe ngemagelebisi awo asengakavutfwa, abe njengesihlahla semncumo sihhohlokelwa timbali taso.

³⁴ Ngobe sishoshomane lesingenaNkulunkulu siyawuhlala singatseli lutfo, umlilo uyakudla emathende alabo labatsandza imidizo.

³⁵ Labo bantfu bemitsa inhlupheko, bese batala bubi. Sisu sabo sitilungiselela njalo emacebo.”