Isaya 44 - Siswati 1996 Bible

Simakadze nguye yedvwa longuNkulunkulu

¹ “Kodvwa lalela, wena Jakobe, nceku yami, Israyeli, wena lengikukhetsile.

² Naku lokushiwo nguSimakadze, lowo lowakwenta, wakubumba esiswini, nalonguyena atakukusita, utsi: Ungesabi, wena Jakobe, nceku yami, Jeshuruni, lengimkhetsile.

³ Ngobe ngiyawutfululela emanti eveni lelomile, nemifula emhlabatsini lowomile; ngiyawutfululela Moya wami kubantfwana bakho, nesibusiso sami etitukulwaneni takho.

⁴ Bayawuhluma njengetjani emadlelweni, nanjengemabhabhabhulomu ngasemfuleni logeletako.

⁵ Lomunye uyawutsi: ‘Mine ngiwaSimakadze;’ lomunye utatibita ngelibito laJakobe; nalomunye uyawubhala esandleni sakhe, atsi: ‘NgiwaSimakadze,’ atsatse libito la-Israyeli.”

Simakadze, hhayi tithico

⁶ “Naku-ke lokushiwo nguSimakadze, iNkhosi neMkhululi wema-Israyeli, Simakadze longuSomandla, utsi: Mine ngiwekucala newekugcina; ngaphandle kwami kute Nkulunkulu.

⁷ Ngubani-ke lofanana nami? Lowo akakumemetele. Akakumemetele, akubeke embikwami, loko lokwentekile kusukela ngasungula sive sami sakadzenidzeni, naloko lokuseta, yebo, akasho kucala phela kutsi kutakwentekani.

⁸ Ningatfutfumeli, ningesabi. Angizange ngikumemetele yini loku, ngakhuluma ngako kungakenteki kadzeni? Nine nibofakazi bami. Kukhona yini lomunye Nkulunkulu ngaphandle kwami? Cha, kute lelinye Lidvwala, kute nalinye lengilatiko.”

Kukhonta titfombe kuyaphukutwa

⁹ Bonkhe labenta tithico balite, naletintfo letiligugu kangaka kubo tilite. Labo lababetikhulumela batimphumphutse, futsi abati lutfo, lokulihlazo kubo.

¹⁰ Ngubani lobumba sithico, asente asilolonge kahle, lesingeke simbuyisele lutfo?

¹¹ Yena nalahambisana nabo bayawuhlaziswa; tingcweti kutekubumba atisilo lutfo, kodvwa tibantfu nje. Ababutsane ndzawonye bonkhe, beme kuloko labasime kuko; bayawehliselwa ekwesabekeni kwelihlazo lalokubi.

¹² Umfuli utsatsa lithulusi asebente ngalo emalahleni; abumbe sithico ngetandvo, akubetsele ngemandla akhe onkhe. Uyalamba, aphelelwe ngemandla; anganatsi ngisho emanti, bese uyoma aze acaleke.

¹³ Umbati ulinganisa ngentsambo, ente luhlaka ngelutsi lwekubhala; akucandvule ngemashizolo, abekise ngemakhampasi. Ukubumba kube nesimo semuntfu, kufanane nemuntfu ngebunjalo bakhe bonkhe, entele kutsi kutewuhlaliswa endlini yetithico.

¹⁴ Ugawula imisedari, mhlawumbe atsatse umsayipuresi nome um-okhi. Uyakuyekela kukhule emkhatsini wetihlahla telihlatsi, nome ahlanyele sipheshula, imvula bese iyakukhulisa.

¹⁵ Umuntfu ukusebentisa ekubaseni umlilo; lokunye kwako akutsatse atifutfumete ngako, ubasa umlilo apheke sinkhwa. Kodvwa uphindze abate nkulunkulu wakhe, bese uyamkhonta; wenta sithico, bese ukhotsama kuso.

¹⁶ Incenye yaleso sigodvo usibasa emlilweni, alungise kudla kwakhe kulowo mlilo; wosa inyama yakhe kuwo, ayidle, esutse. Uphindze otse kuwo, atsi: “Inhhi! Sengifutfumele; ngibona umlilo.”

¹⁷ Kulesigodvo lesisele ubata nkulunkulu, lekusithico sakhe, akhotsame kuso, asikhonte. Uthandaza kuso atsi: “Ngisindzise; wena ungunkulunkulu wami.”

¹⁸ Abati lutfo, abacondzi lutfo; emehlo abo abhadziwe, kuze bangetiwubona, netingcondvo tabo tivaliwe, khona bangetiwucondzisisa.

¹⁹ Kute loke eme, acabangisise. Kute namunye lonelwati; kute nalonekucondza lotsi: “Incenye yalolukhuni ngiyibasile, ngidzimate ngapheka nesinkhwa kulamalahle alo, ngose inyama, ngayidla. Pho, ngingayenta yini intfo lesinengiso ngalolukhuni lolusele? Ngingasikhotsamela yini lesizemuzemu selugodvo?”

²⁰ Utondla ngemlotsa, edukiswe yinhlitiyo lekhohlisiwe; angeke atisindzise nome atsi: “Lentfo lesesandleni sami sangesekudla ayisiwo yini emanga?”

Simakadze nguMdali neMsindzisi

²¹ “Khumbula letintfo, wena Jakobe, ngobe uyinceku yami, wena Israyeli. Ngikwentile, wena uyinceku yami, ngingeke ngikukhohlwe, wena Israyeli.

²² Tikhubekiso takho ngitishanyele njengelifu. netono takho njengenkhungu yasekuseni. Buyela kimi, ngobe sengikuhlengile.”

²³ Hlabelani ngekujabula, nine mazulu, ngobe loku kwentiwe nguSimakadze; memetani kakhulu, nine tindzawo temhlaba letijulile. Hlokomani ngengoma, nine tintsaba, nine mahlatsi, nato tonkhe tihlahla tenu. ngobe Simakadze sewuhlenge Jakobe, ubonakalisa bukhosi bakhe ka-Israyeli.

IJerusalema itakwakhelwa bantfu

²⁴ “Naku lokushiwo nguSimakadze, uMhlengi wakho, lowakubumba esiswini, utsi: NginguSimakadze, lowente tonkhe tintfo, yena yedvwa loweneke emazulu, lowendlala umhlaba ayedvwana,

²⁵ lophuntisa tibonakaliso tebaphrofethi bemanga, labaphengulako abente tilima, acitse kufundza kwalabahlakaniphile, akugucule akwente kube ngumbhedvo.

²⁶ Ngimi lofeza emavi etinceku takhe, aphumelelise tiphrofetho tetitfunywa takhe, lotsi ngeJerusalema: ‘Itawuhlalwa bantfu,’ nangemadolobha akaJuda atsi: ‘Atakwakhiwa,’ nangetindzala tawo atsi: ‘Ngitativusetela.’

²⁷ Ngimi lokhuluma nekujula kwemanti atsi: ‘Yoma, ngitakomisa imifudlana yakho.’

²⁸ Ngimi futsi lokhuluma ngaKhuresi atsi: ‘Ungumelusi wami, uyawukwenta konkhe loko lengikutsandzako; uyawukhuluma ngeJerusalema, atsi: “Ayakhiwe kabusha,” nangelithempeli atsi: “Akwakhiwe tisekelo talo.” ’ ”