Isaya 23 - Siswati 1996 Bible

Livi lesembulo ngeThire

¹ Leli livi lesembulo lelimacondzana neThire lelitsi: Lilani, nine mikhumbi yaseThashishi, ngobe iThire seyibhujisiwe, yasala ite indlu nome sikhumulo. Nivile ngalombiko ngesikhatsi nibuya eSiphrosi.

² Bindzani, nine sive sesichingi, nani bahwebi baseSidoni, nine leseninjingiswe bashayeli bemikhumbi.

³ Sivuno salokutinhlavu sesigodzi semfula iNayili sefika ngelwandle, saba sivuno saseThire; kwatsi ngaso iThire yatsengiselana netive.

⁴ Bani nemahloni, wena Sidoni, bani nemahloni, nawe nqaba yaselwandle, ngobe lwandle selukhulumile lwatsi: “Angikaze ngibe nemhelo, kantsi futsi angikaze ngitale umntfwana. Angizange ngikhulise emadvodzana, nemadvodzakati futsi angizange ngiwakhulise.”

⁵ Nakufika tindzaba eGibhithe, bayawuba nelusizi lolukhulu, nabeva umbiko lophuma eThire.

⁶ Yewelani, niye eThashishi, lilani, nine sive sasesichingini.

⁷ Kungabe leli lidolobha lenu yini, lenake najabula nitigcabha ngalo, lelasungulwa kadzenidzeni, nalelibantfu balo bake bahamba ngetinyawo tabo bayawucaba emaveni lakhashane?

⁸ Ngubani lowahlela lokulwa neThire, lidolobha lebukhosi, lelibahwebi balo batikhulu, nebatsengisi balo bahlonishwa emhlabeni wonkhe?

⁹ NguSimakadze longuSomandla lokuhlelile kutsi entele phansi ligcabho labo bonkhe bukhatikhati, nekutsi atfobise bonkhe labadvumile emhlabeni.

¹⁰ Limani live lenu, nine baseThashishi, njengabaseNayili. Sikhumulo singeke siphindze sibe yindzawo yekutsenga nekutsengisa.

¹¹ Simakadze welule sandla sakhe wasiphakamisela etikwelwandle, wenta imibuso yalo yatfutfumela, wayala namacondzana nelaseFenisiya, kutsi tinqaba tayo atibhujiswe.

¹² Ukhulumile watsi: “Ungeke uphindze utijabulise, wena Ndvodzakati yaseSidoni, sewupitjitiwe! Sukumani newelele eSiphrosi, nakhona lapho ngeke nikutfole kuphumula.”

¹³ Bukani live lemaBhabhulona, lesive lese silite nyalo! Ema-Asiriya lelive asalente laba yindzawo yetilwane telihlane. Akhe imibhoshongo yekuvimbetela, ahlubula tinqaba talo, taba tindzala.

¹⁴ Lilani, nine mikhumbi yaseThashishi, inqaba yenu seyibhujisiwe!

¹⁵ Ngaleso sikhatsi iThire iyawukhohlakala iminyaka lengema-70, sikhatsi lesingangekuphila kwenkhosi. Kodvwa ekupheleni kwaleminyaka lengema-70, iThire iyawuba njengengwadla kulengoma letsi:

¹⁶ “Manje, wena ngwadla asakukhohliwe emadvodza, tsatsa ilire yakho, uyewuzula edolobheni! Dlala tingoma letinyenti kakhulu ngelihabhu, khona emadvodza atekukhumbula.”

¹⁷ Ekupheleni kweminyaka lengama-70, Simakadze utayihambela iThire. Itawubuyela emsebentini wayo webugwadla, yonkhe imibuso yemhlaba itawugwadla nayo.

¹⁸ Noko inzuzo yayo nemali yayo leyitfolako ingeke ibutsiswe ndzawonye, kodvwa iyakwehlukaniselwa Simakadze. Iyakwabelwa labo labakhonta Simakadze, babe nekudla lokunyenti netimphahla letinhle.