Isaya 21 - Siswati 1996 Bible

Umbono ngekuwa kweBhabhulona

¹ Leli livi lesembulo lelimacondzana neBhabhulona, lihlane lelingaselwandle: Njengetiwunguwungwana tihhusha tendlula eveni laseningizimu, kanjalo umhlaseli uchamuka ngasehlane, eveni lelesabekako.

² Ngikhonjiswe umbono lowesabekako: Bantfu labangemambuka bayatsengisana, baphangi batsatsa imphango. Hlaselani, nine ma-Elamu! Vimbetelani, nani maMede! “Ngitakucedza konkhe loko kububula lobekubangwa baseBhabhulona.”

³ Nginelusizi ngalombono lengiwubonile, buhlungu bungibambile, njengemhelo ufikela umfati nasatawubeleka. Kuyangetfusa loko lengikuvako, ngiyamangala ngaloko lengikubona ngemehlo ami.

⁴ Inhlitiyo yami iyaphatamiseka, kwesaba kuyangitfutfumelisa; kuhlwa lebengiloku ngikufisa sekujike kwaba sesabiso kimi.

⁵ Bendlala ematafula, bendlale emacansi, bayadla, banatse! Bese kuphuma simemetelo sitsi: “Sukumani, nine tindvuna! Gcobisani emahawu enu!”

⁶ Naku-ke lokushiwo nguSimakadze kimi, utsi: “Hamba ubeke umlindzi, umtjele akubikele ngako konkhe lakubonako.

⁷ Nakabona tincola temphi letiboshelwe, letinemahhashi laboshelwe ngamabili, nebagibeli betimbongolo bagibele, nome bagibeli bemakamela basetulu, akahlale acaphele ngesineke lesikhulu.”

⁸ Lomlindzi wamemeta watsi: “Lilanga ngelilanga, nkhosi yami, ngima etulu embhoshongweni wekulindza, busuku ngebusuku ngihlala ngisemsebentini wami.

⁹ Asubuke nje, naku kuta umuntfu ugibele incola yakhe yemphi, lenemahhashi laboshelwe ngamabili. Lomuntfu waphendvula watsi: ‘IBhabhulona seyiwile, iwile! Tonkhe titfombe tetithico tayo setibhidlikele phansi emhlabatsini!’ ”

¹⁰ Awu, sive sami, senipitjitelwe phansi ebaleni lekubhulela kolo, ngiyanitjela loko lengikuvile kuSimakadze longuSomandla, kuNkulunkulu wema-Israyeli.

Livi lesembulo nge-Edomu

¹¹ Leli livi lesembulo lelimacondzana neDuma lelitsi: Kukhona longimemetako kaSeyiri, utsi: “Mlindzi, sekusele kangakanani kutsi kuse? Mlindzi, sekusele kangakanani kutsi kuse?”

¹² Umlindzi uyaphendvula, utsi: “Kuyeta kusa, kodvwa kusesebusuku. Nanifuna kubuta, butani, nibophindze nibuye futsi.”

Livi lesembulo nge-Arabiya

¹³ Leli livi lesembulo lelimacondzana ne-Arabiya lelitsi: Nine ludvwendvwe lwemakamela akaDedani, nine lenimisa emavungwini ase-Arabiya,

¹⁴ baletseleni emanti laba lasebomile; nine lenihlala eThema, baletseleni kudla laba lababalekile.

¹⁵ Babalekela tinkemba, yebo, tinkemba letiphakanyisiwe, nebutjoki lobucishiwe, nekushisa kwemphi.

¹⁶ Naku-ke lokushiwo nguSimakadze kimi, utsi: “Njengesisebenti lesenta sivumelwane semnyaka munye nemcashi waso, balisisa kahle emalanga, ngobe ekugcineni kwawo lonkhe ludvumo lwakaKhedari lutawuphela.

¹⁷ Imisalela yemadvodza lanemba ngebutjoki, langemachawe akaKhedari itawuba mbalwa.” Simakadze longuNkulunkulu wa-Israyeli sewukhulumile.