Imisebenti yebaPhostoli 20 - Siswati 1996 Bible

Pawula uvakashela eMasedoniya nase-Akhaya

¹ Emvakwalesiphitsiphitsi Pawula wabita labakholwako wabakhutsata, wabavalelisa, wabashiya, waya eMasedoniya.

² Wadzabula tindzawo takhona ahamba akhutsata avuselela labakholwako ngemavi lamanyenti, waze wefika eGrisi,

³ lapho ahlala khona tinyanga letintsatfu. Besalungisela kuya eSiriya ngemkhumbi, nakeva kutsi emaJuda afuna kumbulala, wase ubona kutsi kuncono abuyele emuva ahambe ngaseMasedoniya.

⁴ Abephekeletelwa boSopateri, umsa waPhurosi waseBheriya, kanye na-Aristakhusi, naSekhundusi baseThesalonika, naGayosi waseDebe, naThimothi, naThikhikhusi, naTrofimusi base-Asiya.

⁵ Bona-ke bahamba embili bayawusilindzela eThrowasi.

⁶ Kepha tsine sahamba ngemkhumbi sisuka eFiliphi emvakweMkhosi Wesinkhwa Lesingenambiliso; kwatsi emvakwemalanga lasihlanu sahlangana nabo eThrowasi, lapho sacedza khona liviki.

Pawula uvakashela eThrowasi kwekugcina

⁷ Kwatsi ngeMgcibelo kusihlwa sahlangana ndzawonye enkonzweni yeSidlo. Pawula wakhuluma kubantfu kwaze kwabasekhatsi nebusuku, ngobe abetawuhamba ngakusasa.

⁸ Kwakukhanyiswe tibane letinyenti endlini lesetulu lapho besihlanganele khona.

⁹ Libhungu lebekutsiwa ngu-Oyithikhusi lalihleti efasitelweni. Kwatsi ngekuchubeka kwetinkhulumo taPawula Oyithikhusi wefikelwa butfongo walala, waze wawela phansi esuka esitezi sesitsatfu. Nase bamtsatsa, bakhandza kutsi sewufile.

¹⁰ Kodvwa Pawula wehla watijika etikwakhe wamgaca ngemikhono, wase utsi kulabo bebalapho: “Ningakhatsateki, akafi.”

¹¹ Emvakwekube Pawula asabuyele etulu esitezi, wefika wahlephula sinkhwa wadla, wakhuluma nabo sikhatsi lesidze kwaze kwadzabuka kusa, wase uyahamba.

¹² Balitsatsa lelibhungu balibuyisela ekhaya liphila, bajabula kakhulu.

Besuka eThrowasi baya eMilethusi

¹³ Sachubeka saya emkhunjini sakhwela saya e-Asosi, lapho sasitawufike sitsatse khona Pawula njengekusho kwakhe, ngobe abehambe ngetinyawo.

¹⁴ Watsi kube ahlangane natsi e-Asosi, sase siyamekhweta saya naye eMithilene.

¹⁵ Sachubeka ngemkhumbi kusukela lapho, saze sefika malungana neKhiyosi ngakusasa. Ngelilanga lelilandzelako sabe sendlula eSamosi, kwatsi kulelilandzelako sefika eMilethusi.

¹⁶ Pawula bekemise kutsi ufuna kuya e-Efesu, kuze angacitsi sikhatsi eveni lase-Asiya. Bekajake kutsi efike eJerusalema ngelilanga lePhentekhoste nakwenteka.

BoPawula bavalelisa babonisi base-Efesu

¹⁷ AseseMilethusi Pawula watfumela umlayeto e-Efesu wacela babonisi belibandla kutsi bamhlangabete.

¹⁸ Batsi nabefika, watsi kubo: “Nani niyati kutsi bengiphila njani ngisesemkhatsini wenu ngaso sonkhe sikhatsi kusukela ngelilanga lengefika ngalo e-Asiya,

¹⁹ ngikhonta iNkhosi ngekutfobeka konkhe, nangetinyembeti, nangekulingwa lengahlangana nako ngemacebo emaJuda.

²⁰ Niyati nekutsi kute lenganigodlela kona kunitjela nekunifundzisa embikwebantfu nasemakhaya enu, lokwakungahle kube lusito kini.

²¹ Kuwo emaJuda nemaGriki, ngalokufananako ngayala kakhulu ngiwatjela kutsi akaphendvukele kuNkulunkulu, nekutsi akholwe yiNkhosi yetfu Jesu.

²² “Manje-ke ngekulalela Moya Longcwele sengiya eJerusalema, kodvwa angati kutsi kutakwentekani kimi khona.

²³ Kepha-ke Moya Longcwele ungatisile kulelo nakulelo dolobha kutsi ngilindzelwe kuboshwa netinhlupheko.

²⁴ Kepha ngikhandza kutsi imphilo yami ayisho lutfo kimi, nangabe nje ngingaphumisela indzima yami ngicedze nemsebenti lengawunikwa yiNkhosi Jesu, wekutsi ngifakaze ngeliVangeli lemusa waNkulunkulu.

²⁵ “Bengihamba emkhatsini wenu nonkhe ngishumayela ngembuso waNkulunkulu. Manje-ke sengiyati kutsi kute namunye wenu loyawuphindze abone buso bami.

²⁶ Ngako-ke ngiyafakaza kulelilanga lalamuhla ngitsi anginacala lengati yenu nonkhe.

²⁷ Ngobe angizange nginifihlele lutfo lwentsandvo yaNkulunkulu.

²⁸ Ticapheleni nine kanye nemhlambi wonkhe lobekwe etandleni tenu nguMoya Longcwele, neluse libandla laNkulunkulu latitsengela lona ngengati yeNdvodzana yakhe.

²⁹ Ngiyati kutsi emvakwekuhamba kwami timphisi letesabekako tiyawufika emkhatsini wenu tihlasele tilimate umhlambi wetimvu.

³⁰ Emkhatsini wenu kuyawuvela bantfu labayawufundzisa lokuphambene neliciniso badvonse emakholwa lamanyenti alandzele bona.

³¹ Ngako-ke caphelani nikhumbule kutsi ngetinyembeti letinyenti imini nebusuku benginifundzisa ngamunye ngamunye, kwaze kwaphela iminyaka lemitsatfu.

³² Manje-ke senginibeka esandleni seNkhosi kanye nasevini lemusa wayo, yona lenemandla ekunakha inikhulise ininike lifa labo bonkhe labahlantiwe.

³³ “Angizange ngifise isiliva negolide nome imphahla yemuntfu.

³⁴ Nani lucobo niyati kutsi ngangisebenta ngaletandla tami, ngentela kutfola konkhe lengangikudzinga kanye nalabo ngangisebenta nabo.

³⁵ Nginikhombisile kanyenti kutsi ngekusebenta kakhulu kanje kufanele sibasite labeswele, nikhumbule nemavi eNkhosi Jesu lawasho nakatsi: ‘Kubusisiwe kupha kunekwemukela.’ ”

³⁶ Watsi kube acedze kukhuluma nabo, waguca wathandaza nabo bonkhe.

³⁷ Bakhala bonkhe, Pawula bamgaca ngemikhono, bamanga.

³⁸ Babedzabukiswe kakhulu ngemavi akhe labekawashito ekutsi ngeke baphindze babubone buso bakhe. Base bayamphekeletela baya naye emkhunjini.