Genesisi 43 - Siswati 1996 Bible

BomnakaboJosefa babuyela eGibhithe sebanaBhenjamini

¹ Indlala yadlanga kakhulu eveni.

² Kwatsi sebakudle konkhe kudla lababekutsenge eGibhithe, uyise wakhuluma kubo watsi: “Hambani njalo niyesitsengela lokunye kudla.”

³ Kodvwa Juda wamphendvula watsi: “Leya ndvodza yasiyalisisa yatsi: ‘Ningeke ningibone ngisho nekungibona, naningeti naye lomnakenu.’

⁴ Nawungasivumela kutsi sihambe nemnaketfu, kulungile, sitawuhamba siyekutsengela lokudla.

⁵ Kodvwa nawungasivumeli kutsi sihambe naye, singeke sewuke, ngobe lendvodza yakhuluma yatsi: ‘Ningeke ningibone ngisho nekungibona, naningeti naye lomnakenu.’ ”

⁶ Israyeli watsi: “Ningiphatseleni kabuhlungu kangaka ngekutjela lendvodza kutsi ukhona lomunye umnakenu?”

⁷ Baphendvula batsi: “Lendvodza yasibutisisa, yabuta konkhe ngatsi nangemndeni wakitsi yatsi: ‘Uyihlo usaphila yini? Ninaye yini lomunye umnakenu?’ Natsi-ke sasiphendvula imibuto yakhe. Besingati ngani tsine kutsi utawube sewutsi: ‘Yehlani naye lomnakenu’?”

⁸ Juda wakhuluma kuyise, Israyeli, watsi: “Mkhulule lomfana, ngihambe naye, sitewushesha sihambe, kutewubate lotawubulawa yindlala.

⁹ Mine ngitawuba sibambiso sakhe ngemphilo yami; nangabe ngingakabuyi naye la kuwe, licala laloko ngitawuletfwala ngize ngife.

¹⁰ Kube asikabambeleleki nje, ngabe sesihambe saze sabuyela nakabili.”

¹¹ Israyeli, uyise, wakhuluma kubo watsi: “Nangabe kufanele kube njalo-ke, hambani netipho letititselo telikhetselo talelive, nitifake emasakeni enu, nifike nitiphe lendvodza leniyishoko: nitsatse litsantana lebhalisamu, neleluju lwetinyosi, nelemakha, nelemure, nelemaphisitakhiwo, nelema-alimondi.

¹² Nibophatsa imali yekutsenga, niyiphatse ngalokuphindvwe kabili, nincandzekise nalemali leyabuyiswa ifakwe emilonyeni yemasaka enu; mhlawumbe yafakeka ngesiphosiso.

¹³ Hambani nalomnakenu niyewukhombisa lendvodza.

¹⁴ Shangatsi Nkulunkulu Somandla anganipha umusa ebusweni balowo muntfu, anikhululele umnakenu nibuye kanye naye naBhenjamini. Kepha-ke mine nangemukwa bantfwabami, ngiyemukwa.”

¹⁵ Ngako-ke lamadvodza esuka lapho atsatsa sipho, nemali seyiphindvwe kabili, batsatsa naBhenjamini bahamba naye baya eGibhithe bafike bakhulekela kuJosefa.

¹⁶ Watsi kube Josefa ababone bahamba naBhenjamini, watjela indvuna yetisebenti tasendlini kakhe watsi: “Tsatsa lamadvodza uwangenise endlini kami, bese uyahlaba ulungise kudla, ngobe atakudla kanye nami emini.”

¹⁷ Sisebenti senta njengobe Josefa abeshito; satsatsa lamadvodza sawangenisa endlini kaJosefa.

¹⁸ BomnakaboJosefa besaba kakhulu, ngobe babengeniswe endlini kaJosefa, badzimate batsi: “Singeniswe lapha ngenca yalemali leyabuyiselwa emasakeni etfu nasite lapha kwekucala. Wentele kutsi atesituma, asitfumbe asente tigcili takhe, asemuke naletimbongolo tetfu.”

¹⁹ Ngako bahamba baya kulendvuna yetisebenti tendlu yaJosefa, bakhuluma nayo beme emnyango,

²⁰ batsi: “Manje nkhosi, ngesikhatsi site lapha kwekucala sitewutsenga kudla,

²¹ satsi lapho sefika saphumula khona, savula emasaka etfu sonkhe sakhandza kutsi emilonyeni yawo kunalemali besitewutsenga ngayo, iphelele. Ngako sesibuye nayo.

²² Sehle nalenye futsi imali kutewutsenga ngayo kudla. Asati kutsi ngubani lona labeyibuyisele lemali lapha emasakeni etfu.”

²³ Lendvuna yabaphendvula yatsi: “Cha, kulungile, ningesabi. Nkulunkulu wenu, longuNkulunkulu weyihlo, uniphile lomcebo emasakeni enu. Mine ngayitfola inkhokhelo yenu.” Yase ibakhiphela Simeyoni, yabaletsela yena.

²⁴ Lendvuna yawatsatsa lamadvodza yawangenisa endlini kaJosefa, yawanika emanti, ageza tinyawo tawo, yabe seyipha netimbongolo tawo kudla.

²⁵ Lamadvodza abe asalungisa tipho tawo alungela kutetfula kuJosefa nakefika emini, njengobe abesavile kutsi abetakudla kanye nawo.

²⁶ Watsi kube efike ekhaya Josefa, bomnakabo base bangenisa tipho lababemphatsele tona batetfula kuye, bamkhotsama.

²⁷ Wababuta imphilo watsi: “Linjani likhehla lelinguyihlo, lenakhuluma ngalo, lisaphila yini?”

²⁸ Baphendvula batsi: “Inceku yakho lengubabe, isaphila.” Bamkhotsamela, bamshayela sihlutfu.

²⁹ Watsi Josefa nakaphakamisa emehlo, wabona Bhenjamini, umntfwanakabo, labelamana naye emhlane, watsi: “Nguye lona yini lomnakenu lomncane lenangitjela ngaye? Shangatsi Nkulunkulu angaba nemusa kuwe, ndvodzana yami!”

³⁰ Josefa washesha waphuma, ngobe inhlitiyo yakhe yefikelwa buhlungu, wafuna indzawo lesitsele, wangena khona wakhala.

³¹ Asagezile buso bakhe, waphindze waphuma; waticinisa watsi: “Phakelani kudla.”

³² Josefa bamphakela yedvwa, nabomnakabo babaphakela bodvwana, nalamaGibhithe labedla nawo aphakelwa odvwana, ngobe phela emaGibhithe abekutsatsa ngekutsi kutehlisa kudla nemaHebheru.

³³ BomnakaboJosefa bahlaliswa etafuleni, ngekwelamana kwabo: litubulo ngebudzala balo nelitfunjana ngebuncane balo, bonkhe babebheke ngakuJosefa. Batsi nabakubona loko bomnakaboJosefa babukana bodvwana, bamangele.

³⁴ Batsi nabanikwa kudla kwasetafuleni laJosefa, kwakaBhenjamini kwaphindvwa kahlanu kunekwabo bonkhe. Ngako-ke badla, banatsa, bajabula kanye naye.