Genesisi 22 - Siswati 1996 Bible

Nkulunkulu utjela Abrahama kutsi amentele umhlatjelo nga-Isaka

¹ Emvakwaloko Nkulunkulu wavivinya Abrahama, watsi kuye: “Abrahama! Ye, Abrahama!” Waphendvula watsi: “Ngilapha, Nkhosi!”

² Nkulunkulu watsi: “Tsatsa Isaka, indvodzana yakho, leyodvwana naloyitsandzako, uye eveni laseMoriya, wente umhlatjelo ngayo entsabeni lengitakulayela yona.”

³ Ngakusasa ekuseni ngeluvivi, Abrahama wavuka, wabophela imbongolo yakhe, watsatsa tisebenti takhe taba timbili kanye nendvodzana yakhe Isaka. Wakabha tinkhuni temhlatjelo labetawufike awushise, besuka bahamba baya kuleyo ndzawo Nkulunkulu labemlayele yona.

⁴ Ngelilanga lesitsatfu Abrahama watsi uphakamisa emehlo, wayibona indzawo isesekhashane.

⁵ Abrahama wase ukhuluma kuletisebenti takhe watsi: “Hlalani la nalembongolo, mine nalomfana sisaya lapha kuyawukhonta, sitawubuya sibuye la kini.”

⁶ Abrahama watsatsa tinkhuni temhlatjelo wekushiswa, watetfwesa Isaka, umsa wakhe, yena waphatsa umlilo nemukhwa esandleni sakhe. Bahamba bobabili ndzawonye.

⁷ Isaka watsi kuyise Abrahama: “Babe!” Wasabela watsi: “Ngilapha, ndvodzana yami.” Isaka wabuta watsi: “Ngiyatibona tinkhuni nemlilo, kepha liphi lizinyane lemvu yemhlatjelo?”

⁸ Abrahama waphendvula watsi: “Ndvodzana yami, Nkulunkulu utatibonela yena lizinyane lemhlatjelo wekushiswa.” Ngako-ke bachubeka solomane bahamba bobabili.

⁹ Batsi kube befike kulendzawo Nkulunkulu labemlayele yona, Abrahama wakha lilati walungisa tinkhuni, wabopha Isaka, umsa wakhe, wambeka etinkhunini etikwelilati.

¹⁰ Abrahama welula sandla sakhe, watsatsa umukhwa asatawuhlaba umsa wakhe.

¹¹ Kepha ingilosi yaSimakadze yambita isezulwini yatsi: “Abrahama! Ye, Abrahama!” Wasabela watsi: “Ngilapha.”

¹² Yatsi: “Ungacali ubeke sandla kulomfana, futsi ungenti lutfo kuye; ngobe manje sengiyati kutsi uyamesaba Nkulunkulu, ngekutsi awukangigodleli indvodzana yakho lekukuphela kwayo.”

¹³ Abrahama watsi uphakamisa emehlo uyacalata, wabona emvakwakhe kunesihhanca, sibanjwe ngetimphondvo esihlahleni. Abrahama wahamba wayawutsatsa lesihhanca, wase unikela ngaso, saba ngumhlatjelo esikhundleni sendvodzana yakhe.

¹⁴ Ngako-ke Abrahama wetsa leyo ndzawo libito, watsi: “Simakadze uyatibonela.” Nalamuhla lendzawo bantfu basayibita ngekutsi: “Simakadze uyatibonela entsabeni.”

¹⁵ Ingilosi yaSimakadze yaphindze yamemeta Abrahama kwesibili isezulwini,

¹⁶ yatsi, “Nali livi laSimakadze litsi: ‘Ngitifunga mine kutsi njengobe wente loku, wangete wayigodla indvodzana yakho yekuphela,

¹⁷ ngiyakukubusisa impela, ngandzise titukulwane takho tibe ngangetinkhanyeti tesibhakabhaka nangangesihlabatsi selugu lwelwandle. Titukulwane takho tiyakwehlula emadolobha etitsa tato.

¹⁸ Tive tonkhe temhlaba tiyawubusiswa ngetitukulwane takho, ngobe ulalele livi lami.’ ”

¹⁹ Abrahama wancandzeka wabuyela etincekwini takhe, bahambisana sebabuyela eBherisheba, lapho Abrahama afike wakha khona.

Titukulwane takaNahori

²⁰ Emvakwaloko Abrahama wabikelwa kwatsiwa: “Phela Milkha sewutalele umnakenu Nahori bantfwana:

²¹ Litubulo lakhe ngu-Uzi, elanywe nguBuzi, umnakabo, bese kuta Khemuweli, uyise wa-Aramu,

²² elanywe nguKhesede, naHazo, naPhildashi, naJidilafe, naBethuweli.”

²³ Bethuweli watala Rebheka. Laba-ke labasiphohlongo Milkha wabatala kuNahori, umnakabo-Abrahama.

²⁴ Ngetulu kwaloko umfati lomunye waNahori lekwakutsiwa nguRewuma watala boTheba, naGahamu, naThahashi, naMakha.