Zaburi 71 - BIBLIA Maandiko Matakatifu Kwa Watu Wote 2002

Mungu tumaini la wazee

¹ Ninakimbilia kwako, ee Yawe, usiniachilie kufezeheka hata kidogo!

² Kwa haki yako uniokoe na kunikomboa; unitegee sikio lako na kuniokoa!

³ Ukuwe kikingio changu cha kukimbilia, kimbilio lenye nguvu la kuniokoa, kwa maana wewe ni kikingio na kimbilio langu.

⁴ Uniokoe, ee Mungu wangu, kutoka mikono ya waovu, kutoka makucha ya watu wabaya na wakali.

⁵ Maana wewe, Bwana wangu Yawe, ni tumaini langu, tegemeo langu tangu ujana wangu.

⁶ Nimekutegemea tangu kuzaliwa kwangu; wewe ulinilinda nilipotoka katika tumbo la mama yangu. Nitakusifu siku zote.

⁷ Kwa wengi nimekuwa mushangao, lakini wewe ni kimbilio langu lenye nguvu.

⁸ Kinywa changu kimejaa sifa zako, na utukufu wako muchana kutwa.

⁹ Wakati wa uzee usinitupe; ninapoishiwa na nguvu usiniachilie.

¹⁰ Maana waadui zangu wanasema vibaya juu yangu; wanaovizia maisha yangu wanafanya mipango,

¹¹ na kusema: “Mungu amemwachilia; mumufuate na kumukamata, kwa maana hakuna wa kumwokoa!”

¹² Usikae mbali nami, ee Mungu; ukuje haraka unisaidie, ee Mungu wangu.

¹³ Wapinzani wangu wote wafezeheke na kuangamizwa; wenye kuvizia kuniua wafezeheke na kuzarauliwa.

¹⁴ Lakini mimi nitakuwa na matumaini siku zote; tena nitakusifu zaidi na zaidi.

¹⁵ Kinywa changu kitaeleza matendo yako ya haki, nitatangaza muchana kutwa matendo yako ya wokovu ijapokuwa hayo yanapita akili yangu.

¹⁶ Nitataja matendo yako makubwa, ee Bwana wangu Yawe; nitatangaza kwamba wewe ndiwe mwenye haki.

¹⁷ Ee Mungu, wewe umenifundisha tangu ujana wangu; tena na tena, ninatangaza matendo yako ya ajabu.

¹⁸ Usiniachilie, ee Mungu, nitakapokuwa muzee mwenye imvi nyingi, kusudi nivitangazie vizazi vitakavyokuja nguvu yako.

¹⁹ Nguvu na haki yako, ee Mungu, vinafika mpaka juu katika mbingu. Wewe umefanya mambo makubwa sana. Ee Mungu, ni nani anayekuwa kama wewe?

²⁰ Umeniletea taabu kubwa, lakini utanirudishia tena uzima, wewe utaniinua tena kutoka katika shimo.

²¹ Utaniongezea heshima yangu, na kunifariji tena.

²² Nami nitakusifu kwa kinubi, kwa sababu ya uaminifu wako, ee Mungu wangu; nitakuimbia sifa kwa zeze, ewe Mutakatifu wa Israeli.

²³ Nitanyanyua sauti kwa furaha, ninapokuimbia wewe sifa zako, na roho yangu itakusifu, maana umeniokoa.

²⁴ Nitatangaza haki yako muchana kutwa, maana wanaonitakia hasara wamefezeheka na kuzarauliwa.