Yobu 33 - BIBLIA Maandiko Matakatifu Kwa Watu Wote 2002

¹ Sasa, Yobu, sikiliza masemi yangu; sikiliza maneno yangu yote.

² Sikia! Ninafumbua kinywa changu. Ulimi wangu utasema.

³ Nitasema kadiri ya usawa wa moyo wangu; ninayoyajua nitayasema kwa uaminifu.

⁴ Roho ya Mungu iliniumba, nayo pumzi ya Mungu Mwenye Uwezo inanipa uzima.

⁵ Unijibu, kama unaweza. Panga masemi yako vizuri mbele yangu, ushike musimamo wako.

⁶ Wewe na mimi ni sawa mbele ya Mungu; mimi vilevile niliumbwa kwa sehemu ya udongo.

⁷ Kwa hiyo hauna sababu ya kuniogopa; maneno yangu mazito hayatakulemea.

⁸ Kweli umesema, nami nikasikia; nimesikia yote uliyosema.

⁹ Wewe umesema hivi: “Mimi niko safi, wala sina kosa. Hakuna ubaya wowote katika moyo wangu.

¹⁰ Mungu ananitafutia sababu, ananiona kama adui yake.

¹¹ Ananifunga miguu kwa minyororo, na kuchunguza hatua zangu zote.”

¹² Lakini Yobu, ninakuambia pale umekosa. Mungu ni mukubwa kuliko mwanadamu.

¹³ Kwa nini unashindana naye, ukisema hatajibu ulizo lako moja?

¹⁴ Mungu anaweza kusema kwa njia moja au ingine lakini mutu hatambui.

¹⁵ Mungu anaongea na watu katika ndoto na maono, wakati usingizi muzito unapowapata,

¹⁶ wanaposinzia katika vitanda vyao. Halafu anawafungua watu masikio yao; anawatia hofu kwa maonyo yake,

¹⁷ wapate kuachana na matendo yao mabaya, na kuvunja kiburi chao.

¹⁸ Hivyo anamukinga mutu asiangamie katika shimo, maisha yake yasiangamie kwa upanga.

¹⁹ Mungu anamwazibu mutu kwa maumivu yanayomuweka katika kitanda, maumivu yanashika viungo vyake bila kukoma;

²⁰ naye anapoteza hamu yote ya chakula, hata chakula ni chukizo kwake.

²¹ Mwili wake unakonda hata hawezi kutambuliwa, na mifupa yake iliyofichama ikatokea inje.

²² Yuko karibu sana kuingia ndani ya kaburi, na maisha yake karibu na wale wanaoleta kifo.

²³ Lakini inawezekana kwamba malaika, ambaye ni mupatanishi mumoja kati ya maelfu, atakuwa karibu na mutu yule kwa kumufunulia jambo la kufanya.

²⁴ Yule malaika anaweza kumwonea huruma na kumwomba Mungu: “Umwokoe asiingie katika shimo; nimepata ukombozi wake.”

²⁵ Mwili wake utaweza kuwa tena kama kijana, ataweza kurudilia tena nguvu zake za ujana.

²⁶ Kisha atamwomba Mungu na kukubaliwa, atakuja mbele yake kwa furaha, na Mungu atamurudishia utukufu wake.

²⁷ Atashangilia mbele ya watu na kusema: “Nilitenda zambi na kupotosha usawa, nami sikuazibiwa kutokana na hayo.

²⁸ Mungu aliniokoa nisiangamie katika shimo; nimebaki muzima na ninaona mwangaza.”

²⁹ Sikia! Mungu anamufanyia mwanadamu haya yote, tena mara mbili, mara tatu.

³⁰ Anamwokoa mwanadamu asiangamie katika shimo, aweze kuona mwangaza wa maisha.

³¹ Sikia Yobu, unisikilize kwa uangalifu; ukae kimya, nami nitasema.

³² Kama una la kusema, unijibu; sema, maana ninataka kukuona bila kosa.

³³ Kama sivyo, nyamaza unisikilize, ukae kimya nami nikufundishe hekima.