Yobu 32 - BIBLIA Maandiko Matakatifu Kwa Watu Wote 2002

Masemi ya Elihu ( 32.1–37.24 ) Maneno ya mwisho ya Yobu

¹ Basi hawa watu watatu: Elifasi, Bildadi na Zofari, wakaacha kumujibu Yobu kwa vile alijiona kuwa mwenye haki.

² Kwa hiyo Elihu mwana wa Barakeli wa kabila la Buzi wa ukoo wa Rama akakasirika. Alimukasirikia Yobu kwa sababu Yobu alijiona yeye mwenye haki na wala si Mungu.

³ Vilevile, aliwakasirikia warafiki watatu wa Yobu kwa sababu hawakukuwa na neno la kumujibu Yobu, na kwa hiyo wakaonyesha kwamba Mungu amekosa.

⁴ Elihu alikuwa amekaa kimya wakati wale wazee waliposema na Yobu kwa maana yeye alikuwa kijana kuliko wao.

⁵ Lakini alipoona wale watu watatu wameshindwa kumujibu Yobu, akawaka hasira.

⁶ Basi, Elihu mwana wa Barakeli wa kabila la Buzi, akaanza kusema: Mimi ni kijana, ninyi ni wazee zaidi. Kwa hiyo niliogopa kuwaambia mawazo yangu.

⁷ Nilisema ndani ya moyo: “Uwaache wenye siku nyingi waseme, wenye miaka mingi wafundishe hekima.”

⁸ Lakini ile roho inayokuwa ndani ya mutu, ile pumzi ya Mungu Mwenye Uwezo, ndiyo inayomwezesha mwanadamu kufahamu.

⁹ Si lazima kuwa muzee kusudi ukuwe na hekima; haiko wazee tu ndio wenye kufahamu jambo linalokuwa sawa.

¹⁰ Kwa hiyo ninasema: “Munisikilize, muache nami nitoe maoni yangu.”

¹¹ Basi, mimi nilingojea kile mulichotaka kusema, nilisikiliza misemo yenu ya hekima, mulipokuwa munajaribu kutafuta neno la kusema.

¹² Niliwasikiliza kwa uangalifu sana, lakini hakuna hata mumoja wenu aliyemushinda Yobu; wote mulishindwa kujibu kwa maneno yake.

¹³ Kwa hiyo musiseme: “Sasa tumepata hekima. Atakayemushinda ni Mungu, wala si mwanadamu.”

¹⁴ Maneno ya Yobu hayakukuwa kwa ajili yangu. Kwa hiyo sitamujibu kama vile mulivyomujibu ninyi.

¹⁵ Ninyi mumeshangaa na kukaa kimya; ninyi hamuna cha kusema zaidi.

¹⁶ Basi, ningoje tu kwa vile hamusemi, kwa sababu munakaa tu bila kujibu kitu?

¹⁷ Mimi vilevile nitatoa jibu langu; mimi nitatoa vilevile maoni yangu.

¹⁸ Niko na maneno mengi sana, roho yangu inanisukuma kusema.

¹⁹ Moyo wangu umefurika kama divai iliyozibwa, kama kibuyu cha divai mupya tayari kupasuka.

²⁰ Ni lazima niseme kusudi nipate kutulia; inanipasa kufungua kinywa changu na kujibu.

²¹ Sitamupendelea mutu yeyote wala kutumia maneno ya kubembeleza mutu,

²² maana mimi sijui kubembeleza mutu. Kama si vile, Muumba wangu angeniangamiza.