Yobu 31 - BIBLIA Maandiko Matakatifu Kwa Watu Wote 2002

¹ Nimejizuiza kabisa mimi mwenyewe, macho yangu yasimwangalie binti kwa tamaa.

² Au, ninangojea nini kutoka kwa Mungu anayekuwa juu? Mungu Mwenye Uwezo ameniwekea kitu gani?

³ Hasara haipati watu waovu na maangamizi wale wanaotenda mabaya?

⁴ Mungu haoni njia zangu na kujua hatua zangu zote?

^5-6 Mungu anipime katika mizani ya haki, naye ataona kwamba sina kosa. Kama nimeishi kwa kufuata uongo, kama nimekimbilia kudanganya watu,

⁷ kama hatua zangu zimepotoka nao moyo wangu ukafuata tamaa za macho yangu, kama mikono yangu imechafuliwa na zambi,

⁸ basi nipande na mwingine akule, mazao yangu ya shamba yaongolewe.

⁹ Kama moyo wangu umevutwa kwa muke wa mutu, kama nimevizia kwenye mulango wa jirani yangu,

¹⁰ basi, muke wangu amupikie mume mwingine, na wanaume wengine walale naye.

¹¹ Jambo hilo ni kosa la kuchukiza, uovu ambao mwamuzi anapaswa kuazibu.

¹² Kosa langu lingekuwa kama vile moto wa kuniteketeza na kuangamiza, na kuchoma kabisa mapato yangu yote.

¹³ Kama nimekataa maneno ya mutumishi au mujakazi wangu, waliponiletea malalamiko yao,

¹⁴ nitafanya nini basi Mungu atakaposimama mbele yangu? Akinichunguza, nitamujibu nini?

¹⁵ Maana Mungu ndiye aliyeniumba mimi na mutumishi wangu; yeye ndiye aliyetuumba sisi wote.

¹⁶ Nimepata kumukatalia masikini mahitaji yake au kuwafanya wajane watumaini bure?

¹⁷ Nimekula chakula changu peke yangu, bila kuwaachia wayatima nao wapate kitu chochote?

¹⁸ Hapana! Tangu ujana wangu nimekuwa baba yao aliyewalea, tangu utoto wangu nimewaongoza wajane.

¹⁹ Nilipoona mutu anakufa kwa kukosa nguo, au masikini ambaye hana nguo ya kuvaa,

²⁰ nilimupa joto kwa nguo za manyoya ya kondoo wangu naye akanitakia baraka za shukrani ya moyo.

²¹ Kama nimekunjia yatima ngumi katika tribinali nikijua nitapendelewa na waamuzi,

²² basi, bega langu liongoke, mukono wangu ukwanyuke kwenye maungio yake.

²³ Maana hasara kutoka kwa Mungu ni kitisho kwangu; mimi siwezi kusimama mbele ya ukubwa wake.

²⁴ Sikuweka tumaini langu katika zahabu, sikuiambia zahabu safi: “Wewe ni usalama wangu”,

²⁵ sikupata kufurahia wingi wa utajiri wangu au kujivunia mapato mengi ya mikono yangu.

²⁶ Sikuangalia jua likiangaza au mwezi ukipita katika uzuri wake

²⁷ kusudi niviabudu kwa siri, na kubusu mikono yangu kwa heshima yake.

²⁸ Huo ungekuwa uovu wa kuazibiwa na waamuzi maana ningekuwa mwongo mbele ya Mungu anayekuwa juu.

²⁹ Nimefurahia kuangamia kwa adui yangu, au kufurahi alipopatwa na hasara?

³⁰ Hapana! Sikuruhusu kinywa changu kusema mabaya juu yake, kwa kumulaani kusudi akufe.

³¹ Watumishi wangu wote wanasema wazi, kila mugeni amekaribishwa katika nyumba yangu.

³² Musafiri hakulala inje ya nyumba yangu; nilimufungulia mulango mupita njia.

³³ Nimeficha makosa yangu kama wengine? Nimekataa kutambua zambi zangu?

³⁴ Sijaogopa kusimama mbele ya kundi la watu wala kukaa kimya au kujifungia ndani, kwa kuogopa kutishwa na mazarau yao.

³⁵ Heri kungekuwa mutu wa kunisikiliza! Ninaweza kutia sahihi yangu katika kila neno nililosema. Mungu Mwenye Uwezo anijibu! Heri mashitaki waadui zangu wanayonitolea yangeandikwa!

³⁶ Ningeyabeba kwa sifa juu ya mabega yangu na kuyavaa kwenye kichwa kama taji.

³⁷ Ningemuhesabilia Mungu kila kitu nilichofanya, ningemwendea kama mwana wa mufalme.

³⁸ Kama nimeiba shamba ninalolima na kusababisha mifereji yake iomboleze,

³⁹ kwa kufaidika na mazao yake bila kulipa na kusababisha kifo cha wenyeji,

⁴⁰ basi miiba iote mule pahali pa ngano, na magugu pahali pa shayiri. Mwisho wa masemi ya Yobu.