Yobu 30 - BIBLIA Maandiko Matakatifu Kwa Watu Wote 2002

¹ Lakini sasa watu wananichekelea, tena watu wanaokuwa wadogo kuliko mimi; watu ambao niliwaona baba zao hawafai hata kuwahesabu kama imbwa wangu wakilinda kondoo.

² Ningepata faida gani katika mikono yao, watu ambao nguvu zao zilikuwa zimewaishia?

³ Katika ukosefu na njaa kali walitafutatafuta kitu cha kutafuna katika jangwa, sehemu tupu zisizokuwa na chakula.

⁴ Walichuma mimea katika jangwa na majani katika pori wakakula, walikula hata mizizi ya muti wa vifagio.

⁵ Walifukuzwa mbali na watu, watu waliwapigia kelele kama wezi.

⁶ Iliwapasa kutafuta usalama katika mifereji kwenye maporomoko, katika mashimo ndani ya udongo na mawe.

⁷ Kule katika vichaka walilia kama nyama, walikusanyika pamoja chini ya nyasi.

⁸ Walikuwa wapumbafu wakubwa na waovu ambao walilazimishwa kufukuzwa katika inchi kwa fimbo.

⁹ Na sasa wamenitungia wimbo wa kunizomea, nimekuwa kitu cha kuchekesha kwao.

¹⁰ Wananichukia na kuniepuka; wakiniona tu wanatema mate kwenye uso.

¹¹ Kwa maana Mungu ameniregeza na kunishusha, wamekuwa huru kunitendea wanavyopenda.

¹² Kundi la watu linasimama kwa kunishitaki, likitafuta kuniangusha kwa kunitegea. Linanishambulia kusudi niangamie.

¹³ Watu hao wanakata njia yangu, wanazidisha hasara yangu, na hakuna mutu wa kuwazuia.

¹⁴ Wanakuja kama kwenye njia kubwa, na kisha mashambulio wanasonga mbele.

¹⁵ Hofu kubwa imenishika. Heshima yangu imetoweka kama kwa upepo, na raha yangu imepita kama wingu.

¹⁶ Sasa sina nguvu yoyote ndani ya nafsi yangu; siku za mateso zimenipata.

¹⁷ Usiku mifupa yangu yote inauma; maumivu yanayonitafuna hayapoi.

¹⁸ Mungu amenishika kwa nguo zangu, amenibana kama shingo ya kanzu yangu.

¹⁹ Amenitupa katika matope; nimekuwa kama majivu na mavumbi.

²⁰ Ninakulilia, lakini haunijibu, ninasimama kuomba lakini haunisikilizi.

²¹ Umegeuka kuwa mukali kwangu, unanitesa kwa mukono wako wenye nguvu.

²² Unanitupa katika upepo na kunipeperusha; unanitupatupa huku na kule katika zoruba kali.

²³ Kweli! Ninajua utanipeleka tu katika kifo, pahali wote wanaoishi watakapokutana.

²⁴ Basi, mutu akiangamia hainui mukono? Mutu akiwa tabani haombi musaada?

²⁵ Sikuwalilia wale waliokuwa na taabu? Sikuona uchungu kwa ajili ya wamasikini?

²⁶ Lakini nilipotazamia mazuri, mabaya yalinipata; nilipongojea mwangaza, giza lilikuja.

²⁷ Moyo wangu unahangaika wala hautulii hata kidogo. Siku za mateso zimenipata.

²⁸ Ninapitapita nikiomboleza. Kwangu hakuna jua. Ninasimama katika makutano kuomba musaada.

²⁹ Kwa kilio nimekuwa ndugu ya imbwa wa pori, kati ya mimi na mbuni hakuna tofauti.

³⁰ Ngozi yangu inakuwa nyeusi na inachubuka, mifupa yangu inaungua kwa homa.

³¹ Kinubi changu kimekuwa cha kufanya kilio filimbi yangu kwa ajili ya kuomboleza.