Yobu 28 - BIBLIA Maandiko Matakatifu Kwa Watu Wote 2002

Sifa za hekima

¹ Hakika kuna nafasi ya kuchimba feza, na pahali ambako zahabu inasafishwa.

² Watu wanachimba chuma ndani ya udongo, wanayeyusha shaba kutoka mawe ya madini.

³ Wachimba madini wanaleta taa katika giza, wanatafutatafuta mpaka chini zaidi ya udongo, na kuchimbua mawe yenye madini katika giza.

⁴ Mwanadamu anachimba mashimo mbali na makao ya watu, mbali na watu pahali kusipofikiwa, wachimba madini wananinginia wakifungwa kamba.

⁵ Kutoka ndani ya udongo chakula kinapatikana, lakini chini yake kila kitu kinavurugwa kwa moto.

⁶ Katika mawe yake kunatoka mawe ya yakuti, na udongo wake una mavumbi ya zahabu.

⁷ Njia ya kwenda kule hakuna ndege mukula nyama anayeijua; na wala jicho la tai halijaiona.

⁸ Nyama wakali hawajaikanyaga wala simba mwenyewe hajapita ndani yake.

⁹ Mwanadamu anachimbua mawe magumu kabisa, anachimbua milima mpaka kwenye misingi yake.

¹⁰ Anapasua mifereji kati ya mawe makubwa, na jicho lake linaona mawe ya bei kali.

¹¹ Anaziba chemichemi zisitiririke, na kufichua vitu vilivyofichwa.

¹² Lakini hekima itapatikana wapi? Ni pahali gani panapopatikana maarifa?

¹³ Hakuna mutu anayejua bei ya hekima, wala hekima haipatikani katika inchi ya wanaokuwa wazima.

¹⁴ Vilindi vinasema: “Hekima haiko kwetu.” Bahari inasema: “Haiko kwangu.”

¹⁵ Hekima haiwezi kupatikana kwa zahabu, wala kwa kupima kiasi kingi cha feza.

¹⁶ Haiwezi kupimwa kwa zahabu ya Ofiri, wala kwa mawe ya sardoniki au ya yakuti samawi.

¹⁷ Zahabu au kioo havilingani nayo, wala haiwezi kubadilishwa na mawe ya zahabu safi.

¹⁸ Hekima ina bei kali kuliko mawe ya matumbawe na marijani, bei kali yake inashinda bei kali ya ushanga.

¹⁹ Topazi ya Etiopia haiwezi kulinganishwa nayo, wala haiwezi kupewa bei ya zahabu safi.

²⁰ Basi, hekima inatoka wapi? Ni wapi panapopatikana maarifa?

²¹ Imefichwa mbali na macho ya viumbe vyote vyenye uzima, na ndege hawawezi kuiona.

²² Shimo la kuangamia na Kifo wanasema: “Tumesikia uvumi wake kwa masikio yetu.”

²³ Mungu anajua njia ya hekima, anajua pahali inapopatikana.

²⁴ Maana yeye anaona mpaka kwenye miisho ya dunia, anaona kila kitu chini ya mbingu.

²⁵ Alipoupa upepo uzito wake na kuyapimia maji mipaka yake,

²⁶ alipoamua mvua inyeshe wapi, umeme na radi vipite wapi,

²⁷ pale ndipo alipoiona hekima na kuitangaza. Aliisimika na kuichunguza.

²⁸ Kisha Mungu akamwambia mwanadamu: Sikia! Kumwogopa Bwana ndiyo hekima, na kujitenga na uovu ndiyo maarifa.