Yobu 27 - BIBLIA Maandiko Matakatifu Kwa Watu Wote 2002

¹ Yobu akaendelea kutoa masemi yake, akasema:

² Kama vile Mungu anavyoishi, aliyeniondolea haki yangu, Mungu Mwenye Uwezo aliyeifanya nafsi yangu ikuwe na uchungu,

³ ninaapa kwamba kadiri ninavyoweza kupumua, roho ya Mungu ikiwa bado ndani yangu,

⁴ midomo yangu haitasema uongo hata kidogo, wala ulimi wangu kusema udanganyifu.

⁵ Siwezi kabisa kusema kwamba ninyi munasema ukweli. Mpaka kufa kwangu ninasema sina kosa.

⁶ Ninashikilia haki yangu, wala sitaiacha; katika zamiri yangu sina cha kunihukumu katika maisha yangu.

⁷ Adui yangu apate azabu ya mwovu, anayesimama kunishambulia aazibiwe kama mubaya.

⁸ Asiyemwogopa Mungu ana tumaini gani wakati Mungu anapokata pumzi yake, anapomwondolea uzima wake?

⁹ Wakati atakapopatwa na taabu, Mungu atasikia kilio chake?

¹⁰ Mwovu hawezi kufurahi mbele ya Mungu Mwenye Uwezo; hataweza kudumu akimwomba Mungu.

¹¹ Nitawafundisha jinsi kitendo cha Mungu kinavyokuwa, sitawaficha mipango ya Mungu Mwenye Uwezo.

¹² Lakini ninyi munajua jambo lile vizuri sana! Mbona, basi munasema maneno yasiyokuwa na maana?

¹³ Hiki ndicho Mungu alichomwekea mutu mwovu; mutesaji alichopangiwa kupata ni hiki:

¹⁴ Watoto wake hata wakuwe wengi watauawa kwa upanga; wazao wake hawatakuwa na chakula cha kutosha.

¹⁵ Wale watakaopona watakufa kwa ugonjwa mukali, na wajane wao hawatawaomboleza.

¹⁶ Hata akilundika feza kama vile mavumbi, na nguo kama vile udongo wa mufinyanzi,

¹⁷ yeye alundike tu, lakini mwenye haki ndiye atakayezivaa, na feza yake watu wasiokuwa na kosa wataigawanyana.

¹⁸ Nyumba mwovu anayojenga ni kama vile utando wa buibui, ni kama vile kibanda cha mulinzi katika shamba.

¹⁹ Anakwenda kulala akiwa tajiri, lakini ni mara ya mwisho; atafungua macho yake, na utajiri wake umetoweka!

²⁰ Vitisho vinamufikia kama vile mafuriko; usiku anapatwa na zoruba.

²¹ Upepo mukali wa mashariki unamupeperusha naye anatoweka; unamufagilia mbali kutoka makao yake.

²² Upepo ule unamufunika bila huruma; anajaribu kukimbia lakini mbio za bure.

²³ Upepo unamupigia vigelegele anapokimbia, na kumuzomea toka pahali pake.