Yobu 26 - BIBLIA Maandiko Matakatifu Kwa Watu Wote 2002

Jibu la Yobu

¹ Kisha Yobu akajibu:

² Aa! Jinsi gani ulivyomusaidia asiyekuwa na uwezo! Jinsi gani ulivyomwokoa asiyekuwa na nguvu!

³ Jinsi gani ulivyomushauri asiyekuwa na hekima, na kumushirikisha ujuzi wako!

⁴ Lakini umesema hayo kwa ajili ya nani? Nani aliyekusukuma kuongea hivyo?

Bildadi anasema

⁵ Mizimu kule chini inatetemeka, maji ya chini na wakaaji wake yanaogopa.

⁶ Kuzimu kuko wazi kabisa mbele ya Mungu. Shimo la kuangamia halina kifuniko chochote.

⁷ Mungu anatandaza kaskazini juu ya pahali patupu, na anatundika dunia pahali pasipo kuwa kitu.

⁸ Anayafunga maji katika mawingu yakuwe mazito, nayo mawingu hayapasuki kwa uzito wake.

⁹ Anaufunika uso wa mwezi na kutandaza juu yake wingu.

¹⁰ Amechora muviringo juu ya uso wa bahari, penye mpaka kati ya mwangaza na giza.

¹¹ Mungu akitoa sauti ya kukaripa, nguzo za mbingu zinatetemeka na kushangaa.

¹² Kwa nguvu zake alituliza bahari; kwa maarifa yake alimwangamiza Rahabu.

¹³ Kwa pumzi yake alisafisha anga; mukono wake ulitoboa nyoka mukubwa anayeruka.

¹⁴ Ikiwa haya ni machache tu ya matendo yake, ni minongono tu tunayosikia juu yake, nani anayeweza kujua ukubwa wa nguvu yake?