Yobu 24 - BIBLIA Maandiko Matakatifu Kwa Watu Wote 2002

¹ Mbona Mungu Mwenye Uwezo hapangi wakati wa hukumu? Kwa nini wanaomujua hawajui hizo siku zake?

² Watu wanaondoa vitambulisho vya mipaka ya mashamba, na wengine wanaiba makundi ya nyama na kuwafuga.

³ Wananyanganya wayatima punda wao, wanatwaa ngombe dume wa mujane kuwa rehani.

⁴ Wanasukuma wamasikini kandokando ya barabara; wamasikini wa dunia wanajificha mbele yao.

⁵ Kwa hiyo kama punda wa pori katika jangwa, wanatoka mapema kwenda kutumika, wakitafuta chakula kwa bidii, kusudi wapate chochote cha kukulisha watoto wao.

⁶ Wamasikini wanalazimishwa kuvuna mashamba ya wengine, wanaokota katika shamba la mizabibu la waovu.

⁷ Usiku kucha wanalala uchi bila nguo, wakati wa baridi hawana cha kujifunikia.

⁸ Wanalowana kwa mvua ya juu ya milima, wanajibanisha kwenye mawe kwa ukosefu wa makimbilio.

⁹ Kuna watu wanaoondoa watoto wayatima kwenye vifua vya mama yao. Wengine wanatwaa nguo ya masikini kuwa rehani.

¹⁰ Wamasikini wanatembea uchi, bila nguo; wenye njaa wanabeba miganda ya ngano.

¹¹ Wanawatengenezea waovu mafuta yao, au kukamua divai bila hata kuionja.

¹² Kutoka katika muji, kilio cha wanaokufa kinasikilika, na walioumizwa wanalalamika kuomba musaada. Lakini Mungu hasikilizi kabisa maombi yao.

¹³ Kuna wengine waovu wasiopenda mwangaza, wasiofahamu njia za mwangaza, na hawapendi kushika njia zake.

¹⁴ Mwuaji anaamuka asubui mapema, kwa kwenda kuwaua wamasikini na wakosefu, na usiku ukifika, kazi yake ni kuiba.

¹⁵ Muzinzi naye anangojea giza liingie, akisema: “Hakuna atakayeniona”; kisha anaficha uso wake kwa nguo.

¹⁶ Usiku wezi wanavunja nyumba, lakini muchana wanajifungia ndani; wala hawajui kabisa mwangaza ni nini.

¹⁷ Kwao wote giza kubwa ni mwangaza wa asubui; wao ni warafiki za vitisho vya giza kubwa.

¹⁸ Lakini munasema: “Waovu wanapelekwa haraka na mafuriko ya maji, makao yao yanabaki kuwa inchi iliyolaaniwa; hakuna anayeenda kwenye mashamba yao ya mizabibu.”

¹⁹ Kama vile teluji inavyoyeyuka katika joto na kipwa ndivyo kuzimu inavyotowesha waovu.

²⁰ Maana muzazi wao anawasahau watu hao, hakuna atakayewakumbuka tena. Ndivyo uovu ulivyovunjika kama muti.

²¹ Waovu wanatesa wanawake wasiopata watoto wala hawawatendei vizuri wanawake wajane.

²² Mungu, kwa nguvu yake, anawaangamiza wenye uwezo; anasimama, nao wanakata tamaa ya kuishi.

²³ Anawaacha waovu wajione salama, lakini macho yake yanachunguza mienendo yao.

²⁴ Waovu wanafanikiwa kwa muda tu, kisha wanatoweka, wananyauka na kufifia kama vile jani, wanakatwa kama vile masuke ya ngano.

²⁵ Nani basi, anayeweza kuhakikisha kwamba mimi ni mwongo na kuonyesha kwamba maneno yangu si kweli?