Yobu 22 - BIBLIA Maandiko Matakatifu Kwa Watu Wote 2002

Sehemu ya tatu ya Mazungumuzo ( 22.1–27.23 ) Masemi ya Elifasi

¹ Kisha Elifasi wa inchi ya Temani akajibu Yobu:

² Mwanadamu anafaa kwa kitu chochote mbele ya Mungu? Kwa kweli mwenye hekima anajifaidia mwenyewe tu.

³ Unazani kwamba unamufurahisha Mungu Mwenye Uwezo kama wewe ni mwenye haki? Au anapata faida gani kama uko mukamilifu?

⁴ Unazani anakuazibu na kukuhukumu kwa sababu wewe unamuheshimu?

⁵ Hapana! Uovu wako ni mukubwa sana! Ubaya wako hauna mwisho!

⁶ Wewe umemunyanganya ndugu yako nguo ya rehani; umemutwaa nguo hiyo moja anayokuwa nayo.

⁷ Umewanyima maji wale waliokuwa wamechoka; umewanyima chakula wale wanaokuwa na njaa.

⁸ Umemuruhusu mwenye cheo kunyanganya inchi yote; umemwacha anayependelewa aishi mule.

⁹ Umewaacha wajane waende mikono mitupu; umewaponda wayatima mikono yao.

¹⁰ Kwa hiyo mitego imekuzunguka pande zote, hofu ya rafla imekupata.

¹¹ Giza limekuangukia usione kitu; mafuriko ya maji yamekufunika.

¹² Tunajua kwamba Mungu yuko kule juu mbinguni; Angalia jinsi nyota za juu kabisa zinavyokuwa mbali!

¹³ Lakini wewe unasema: “Mungu anajua nini? Anaweza kupenya mawingu na kutoa hukumu?

¹⁴ Mawingu mazito yamemuzunguka asipate kuona; anatembea inje ya anga la dunia!”

¹⁵ Umeamua kufuata njia za zamani ambazo watu waovu wamezifuata?

¹⁶ Hao walifagiliwa mbele ya wakati wao, misingi yao imepelekwa mbali na maji.

¹⁷ Hao ndio waliomwambia Mungu: “Achana nasi!” Na “Wewe Mungu Mwenye Uwezo unaweza nini juu yetu?”

¹⁸ Lakini Mungu ndiye aliyejaza nyumba zao fanaka, lakini walimuweka mbali na mipango yao!

¹⁹ Wenye haki wanaona na kufurahi, wasiokuwa na kosa wanawachekelea.

²⁰ Wanasema: kweli wale waadui zetu wameangamizwa, na walichoacha kimeteketezwa kwa moto.

²¹ Sasa, Yobu, ukubaliane na Mungu ukuwe na amani, na kwa hiyo mazuri yatakufikia.

²² Pokea mafundisho kutoka kwake; na uyaweke maneno yake ndani ya moyo wako.

²³ Ukimurudilia Mungu na kunyenyekea, ukiondoa uovu mbali na makao yako,

²⁴ ukitupilia mbali mali yako, ukitupa zahabu ya Ofiri kwenye ukingo wa kijito,

²⁵ Mungu Mwenye Uwezo akiwa ndiyo zahabu yako na feza yako ya bei kali,

²⁶ basi, ndipo utakapomufurahia Mungu Mwenye Uwezo na kuinua uso wako kwake.

²⁷ Utamwomba naye atakusikiliza, nawe utavitimiza viapo vyako.

²⁸ Neno lolote utakalokusudia litafanikiwa, na mwangaza utaangazia njia zako.

²⁹ Maana, Mungu anawashusha wenye majivuno, lakini anawaokoa wanyenyekevu.

³⁰ Yeye anamwokoa mutu asiyekuwa na kosa. Nawe utaokolewa kwa sababu haukutenda mabaya.