Yobu 20 - BIBLIA Maandiko Matakatifu Kwa Watu Wote 2002

¹ Kisha Zofari wa inchi ya Namati akajibu:

² Mafikiri yangu yananisukuma nikujibu, wala siwezi kujizuia tena.

³ Ninasikia maonyo nisiyoweza kuvumilia, lakini akili yangu inanisukuma nijibu.

⁴ Wewe labda umesahau jambo hili: kwamba tangu zamani Mungu alipomwumba mutu katika dunia,

⁵ mwovu atajiona ameshinda kwa muda tu, furaha ya asiyemwogopa Mungu ni ya muda mufupi tu!

⁶ Mwovu akiweza kupanda hata kufikia mbingu, na kichwa chake kufika kwenye mawingu,

⁷ atatupiliwa mbali kama mavi yake. Waliopata kumujua watajiuliza: “Yuko wapi?”

⁸ Atatoweka kama ndoto, asionekane tena, atafutikana kama maono ya usiku.

⁹ Aliyemwona, hatamwona tena, wala pale alipoishi hapatatambuliwa tena.

¹⁰ Yeye mwenyewe atarudisha mali yake yote, watoto wake wataomba huruma kwa wamasikini.

¹¹ Japo alijisikia amejaa nguvu ya ujana, lakini italala pamoja naye katika mavumbi.

¹² Katika kinywa chake uovu ni mutamu kama sukari, anauficha chini ya ulimi wake;

¹³ hataki kabisa kuuachilia, lakini anaushikilia katika kinywa chake.

¹⁴ Lakini unapofika ndani ya tumbo unakuwa muchungu, mukali kama sumu ya nyoka.

¹⁵ Mwovu anameza mali haramu na kuitapika; Mungu anaitoa ndani ya tumbo lake.

¹⁶ Ananyonya sumu ya nyoka na nyoka atamuuma na kumwua.

¹⁷ Hataona tena mitiririko ya asali na ya maziwa.

¹⁸ Ataacha matunda ya jasho lake. Hatakuwa na uwezo wa kuyaonja,

¹⁹ kwa sababu amewaangamiza wamasikini na kuwaachilia, amenyanganya nyumba ambazo hakuzijenga.

²⁰ Kwa vile ulafi wake hauna mwisho, hataweza kuokoa kitu chochote cha lazima.

²¹ Kisha kula hakuacha hata makombo. Kwa hiyo fanaka yake yote haitadumu.

²² Atakapotajirika sana atapatwa na taabu, hasara itamupata kwa nguvu zote.

²³ Akiwa anajishugulisha kwa kushibisha tumbo, Mungu atamuletea kasirani yake imutiririkie kama chakula chake.

²⁴ Labda ataweza kuepuka upanga wa chuma, kumbe atachomwa na upanga wa shaba.

²⁵ Mushale utachomolewa kutoka katika mwili wake; incha yake itatolewa katika mugongo wake ikingaa, vitisho vya kifo vitamupata.

²⁶ Hazina zake zitaharibiwa, moto wa ajabu utamuteketeza; kilichobaki katika nyumba yake kitateketezwa.

²⁷ Mbingu zitafichua uovu wake, dunia itajitokeza kumushambulia.

²⁸ Mali zake zitanyanganywa katika siku ya kasirani ya Mungu.

²⁹ Hii ndiyo sehemu ya mutu mwovu kutoka kwa Mungu, ndio mwisho aliopangiwa na Mungu.