Yobu 18 - BIBLIA Maandiko Matakatifu Kwa Watu Wote 2002

¹ Kisha Bildadi, wa inchi ya Suhi, akajibu:

² Utawinda maneno ya kusema mpaka wakati gani? Fikiri vizuri nasi tutasema.

³ Kwa nini unatufanya kama ngombe? Mbona unatuona sisi kuwa wapumbafu?

⁴ Wewe unajirarua mwenyewe kwa hasira zako. Dunia itaachwa tupu kwa ajili yako au mawe yahamishwe toka pahali pake?

⁵ Kweli, mwangaza wa mutu mwovu utazimishwa; ulimi wa moto wake hautaangaa.

⁶ Katika nyumba yake mwangaza ni giza, taa inayomwangazia itazimishwa.

⁷ Hatua zake ndefu zitafupishwa; mipango yake itamwangusha chini.

⁸ Miguu yake mwenyewe itamutia katika mutego; kila mara anatembea juu ya shimo.

⁹ Mutego unamukamata kwenye kisigino, kamba inamunasa kabisa.

¹⁰ Amefichiwa kamba ya kumunasa ndani ya udongo, ametegewa mutego katika njia yake.

¹¹ Hofu kubwa inamutisha kila upande, inamufuata katika kila hatua yake.

¹² Alikuwa na nguvu, lakini sasa njaa imemubana; hasara ziko tayari kumwangusha.

¹³ Ugonjwa mukali unakula ngozi yake, ugonjwa wa kifo unaharibu viungo vyake.

¹⁴ Anaongolewa katika nyumba aliyotegemea, na kupelekwa kwa mufalme wa vitisho.

¹⁵ Nyumba yake tupu, wengine wataishi ndani; kiberiti kimetawanywa katika makao yake.

¹⁶ Yeye ni kama muti uliokauka mizizi, matawi yake juu yamenyauka.

¹⁷ Katika inchi hakuna atakayemukumbuka; jina lake halitatamkwa tena katika barabara.

¹⁸ Ameondolewa toka katika mwangaza, akatupwa katika giza; amefukuzwa mbali kutoka katika dunia.

¹⁹ Hana watoto wala wajukuu; hakuna aliyebaki katika makao yake.

²⁰ Watu wa upande wa magaribi wameshangazwa na yaliyomupata; hofu imewapata watu wa upande wa mashariki.

²¹ Hayo ndiyo yanayowapata wasiomujali Mungu; pale ndipo pahali pa wasiomujua Mungu.