Yobu 17 - BIBLIA Maandiko Matakatifu Kwa Watu Wote 2002

¹ Nimevunjika moyo, siku zangu zimekwisha, kaburi langu liko tayari.

² Kweli wanaonichekelea wamenizunguka, matusi yao yananizuiza kulala.

³ Ee Mungu, ujitoe mwenyewe kuwa rehani kwa ajili yangu maana hakuna mwingine wa kujitoa kwa ajili yangu.

⁴ Umefumba akili za warafiki zangu; usiwaache basi wanishinde.

⁵ Mutu anayefitini warafiki zake kwa faida, watoto wake watakufa macho.

⁶ Nimefanywa kuwa kichekesho kwa watu, nimekuwa mutu wa kutemewa mate.

⁷ Macho yangu yamefifia kwa ajili ya uchungu; viungo vyangu vyote vimekuwa kama kivuli.

⁸ Watu wa haki wanashangaa wanapoona hayo, nao wasiokuwa na kosa wanachukizwa na wasiomwogopa Mungu.

⁹ Hata hivyo, mutu wa haki anashika njia yake, mutu ambaye hajafanya ubaya kwa mukono wake anazidi kuwa na nguvu.

¹⁰ Lakini ninyi mukuje, mukuje wote tena. Kwenu sitamupata mwenye hekima hata mumoja.

¹¹ Siku zangu zimekwisha, mipango yangu imevunjwa, matazamio ya moyo wangu yametoweka.

¹² Kwa hao watu, usiku ni muchana: wanasema kwamba mwangaza unakaribia giza.

¹³ Kama kuzimu kukiwa nyumba yangu, na makao yangu yako kule katika giza,

¹⁴ kama nikiita kaburi “baba yangu” na vidudu “mama yangu” au “dada yangu”,

¹⁵ basi, nimebakiliwa na tumaini gani? Ni nani anayeweza kuona tumaini lile?

¹⁶ Tazamio langu litashuka nami kuzimu! Tutateremuka wote wawili mpaka kule katika mavumbi!