Kutoka 40 - BIBLIA Maandiko Matakatifu Kwa Watu Wote 2002

Hema linasimikwa na kutakaswa

¹ Yawe akamwambia Musa:

² Katika siku ya kwanza ya mwezi wa kwanza, utasimika hema takatifu la mukutano.

³ Ndani ya hema hilo utaweka lile Sanduku la Agano, kisha weka pazia mbele yake.

⁴ Utaingiza meza na kupanga vyombo vyake juu. Utaingiza kile kinara vilevile na kuweka taa zake juu yake.

⁵ Mazabahu ya zahabu ya kufukizia ubani utaiweka mbele ya Sanduku la Agano, kisha utatundika pazia kwenye mulango wa hema takatifu.

⁶ Ile mazabahu ya kuteketezea sadaka utaiweka mbele ya mulango wa hema takatifu la mukutano.

⁷ Birika la kunawia utaliweka katikati ya hema la mukutano na mazabahu na kulijaza maji.

⁸ Utazungusha upango na kutundika pazia kwenye mulango wake.

⁹ Kisha, utatakasa hema pamoja na vyombo vyake vyote kwa kuvipakaa yale mafuta ya kupakaa, nalo litakuwa takatifu.

¹⁰ Halafu, utatakasa mazabahu ya kuteketezea sadaka na vyombo vyake vyote kwa kuipakaa mafuta, nayo itakuwa takatifu kabisa.

¹¹ Birika la kunawia na tako lake vilevile utalitakasa kwa namna hiyohiyo.

¹² Utamwita Haruni na wana wake wakuje kwenye mulango wa hema la mukutano, kisha uwanawishe.

¹³ Utamuvalisha Haruni zile nguo takatifu. Utamupakaa mafuta na kumutakasa, kusudi aweze kunitumikia kama vile kuhani.

¹⁴ Utawaita wana wake na kuwavalisha zile kanzu.

¹⁵ Kisha uwapakae mafuta kama vile ulivyomupakaa baba yao, kusudi nao vilevile wanitumikie kama makuhani. Kupakwa mafuta huku kutawaingiza katika ukuhani wa kudumu katika vizazi vyao vyote.

¹⁶ Basi, Musa alitimiza kwa ukamilifu kabisa maagizo yote ya Yawe.

¹⁷ Katika siku ya kwanza ya mwezi wa kwanza mwaka wa pili kisha kutoka Misri, hema takatifu likasimikwa.

¹⁸ Musa akaweka vikalio vyake, akainua mbao zake, akashikamanisha miti yake na kusimamisha nguzo zake.

¹⁹ Akatandaza pazia juu ya hema takatifu na kuweka kifuniko cha hema juu yake, kama vile alivyoamuriwa na Yawe.

²⁰ Kisha akatwaa vile vibao viwili vya mawe na kuviweka katika lile sanduku. Akapitisha ile miti katika vikomo vya sanduku na kuweka kiti cha rehema juu yake.

²¹ Kisha akaweka lile Sanduku la Agano ndani ya hema na kutundika pazia, na kwa namna hiyo akafunika Sanduku la Agano, kama vile alivyoamuriwa na Yawe.

²² Akaweka meza ndani ya hema la mukutano, upande wa kaskazini, sehemu ya inje ya pazia,

²³ na juu yake akapanga mikate iliyotolewa kwa Yawe, kama vile alivyoamuriwa na Yawe.

²⁴ Akaweka kinara ndani ya hema la mukutano, upande wa kusini, kuelekea meza.

²⁵ Mule, mbele ya Yawe, akawasha taa zake, kama vile alivyoamuriwa na Yawe.

²⁶ Akaweka ile mazabahu ya zahabu katika hema, mbele ya pazia,

²⁷ na kufukiza ubani wenye harufu nzuri juu yake, kama vile alivyoamuriwa na Yawe.

²⁸ Akatundika pazia kwenye mulango wa hema takatifu,

²⁹ akaweka pale kwenye mulango wa hema takatifu mazabahu ya sadaka za kuteketezwa, akatolea juu yake sadaka ya kuteketezwa kwa moto na sadaka ya ngano, kama vile alivyoamuriwa na Yawe.

³⁰ Akaweka birika la kunawia katikati ya hema la mukutano na mazabahu, na kutia maji ya kunawa.

³¹ Musa, Haruni na wana wake, wote wakanawa mikono na miguu yao mule.

³² Kila mara walipoingia ndani ya hema au walipokaribia ile mazabahu, walinawa, kama vile Musa alivyoamuriwa na Yawe.

³³ Kwa mwisho Musa akatengeneza upango kuzunguka hema takatifu na mazabahu na kuweka pazia kwenye mulango wa upango. Hivyo, Musa akakamilisha kazi yote.

Wingu juu ya hema la mukutano

³⁴ Kisha, lile wingu likafunika lile hema la mukutano na utukufu wa Yawe ukajaza hema.

³⁵ Musa akashindwa kuingia ndani ya hema la mukutano kwa sababu hilo wingu lilikaa juu yake na utukufu wa Yawe ukajaa mule.

³⁶ Katika safari zao zote Waisraeli hawakuanza safari hata kidogo isipokuwa wakati wingu hilo lilipoinuliwa kutoka juu ya hema.

³⁷ Kama wingu hilo halikuinuliwa wao hawakuanza safari. Walingoja mpaka wakati lilipoinuliwa.

³⁸ Katika safari zao zote, Waisraeli waliweza kuliona lile wingu la Yawe juu ya hema wakati wa muchana na ule moto ukiwaka juu yake usiku.