Kutoka 23 - BIBLIA Maandiko Matakatifu Kwa Watu Wote 2002

Haki na usawa

¹ Usitoe habari za uongo. Usishirikiane na mutu mwovu kwa kuwa mushuhuda mubaya.

² Usifuate watu wengi kwa kutenda ubaya. Wala wakati wa kukata maneno, usishuhudie kufuatana na watu wengi kwa kupotosha haki.

³ Usikuwe na upendeleo katika mashitaki ya masikini.

⁴ Ukimukuta ngombe au punda wa adui yako amepotea, utamurudishia mwenye naye.

⁵ Ukimwona punda wa mutu anayekuchukia ameanguka na muzigo wake, umusaidie mutu yule kumusimamisha punda wake, wala usimwache na kwenda zako.

⁶ Usipotoshe haki masikini anayostahili katika mashitaki yake.

⁷ Ujitenge mbali na mashitaki ya uongo wala usiwaue wasiokuwa na kosa na wenye haki, maana mimi sitamusamehe mutu mwovu.

⁸ Usipokee kituliro, maana kituliro kinapofusha wakubwa na kupotosha mambo ya wenye haki.

⁹ Usimutese mugeni. Ninyi munajua hali ya kuwa mugeni, maana mulikuwa wageni katika inchi ya Misri.

Mwaka wa saba

¹⁰ Kwa muda wa miaka sita utapanda mashamba yako na kuvuna mazao yake.

¹¹ Lakini katika mwaka wa saba, utayaacha mashamba yako bila kupanda mbegu, kusudi wamasikini kati ya watu wako wapate chakula kilichobakia mule na nyama wa pori wakule. Utafanya vile vile katika shamba lako la mizabibu na la mizeituni.

¹² Kwa siku sita utafanya kazi zako, lakini siku ya saba utapumzika, kusudi ngombe wako na punda wako vilevile wapate kupumzika, na watoto wa mujakazi wako na wageni wapate kustarehe.

¹³ Ushike mambo yote niliyokuambia. Usiyataje hata kidogo majina ya miungu mingine, hayo yasisikilike katika kinywa chako.

Sikukuu tatu kubwa

¹⁴ Mara tatu kila mwaka mutafanya sikukuu kwa heshima yangu.

¹⁵ Mutafanya sikukuu ya Mikate Isiyotiwa Chachu kama vile nilivyowaagiza. Mutakula mikate isiyotiwa chachu kwa siku saba wakati uliopangwa katika mwezi wa Abibu, kwa sababu katika mwezi ule mulitoka Misri. Mutu yeyote asikuje mbele yangu mikono mitupu.

¹⁶ Mutafanya sikukuu ya mavuno ya kwanza ya kazi zenu na ya mavuno ya mashamba yenu. Mutafanya sikukuu ya kukusanya mavuno mwisho wa mwaka munapokusanya mazao ya kazi zenu.

¹⁷ Mara tatu kwa mwaka wanaume wote watakusanyika mbele ya Bwana wenu, Yawe.

¹⁸ Usinitolee damu ya sadaka yangu pamoja na mukate uliotiwa chachu, wala usiyaache mafuta ya sikukuu yangu yabaki mpaka asubui.

¹⁹ Mazao ya kwanza ya shamba lako utayaleta katika nyumba yangu mimi Yawe, Mungu wako. Usipike mwana-kondoo au mwana-mbuzi katika maziwa ya mama yake.

Ahadi na maagizo

²⁰ Muangalie, mimi ninamutuma malaika awatangulie katika safari kusudi awalinde na kuwafikisha katika inchi niliyowatayarishia.

²¹ Musikilize na kutii maneno atakayosema, wala musimwasi. Hatawasamehe uasi wenu maana nimemutuma kwa jina langu.

²² Lakini mukimusikiliza kwa uaminifu na kufanya yote anayosema, mimi nitakuwa adui wa waadui zenu na mupinzani wa wapinzani wenu.

²³ Malaika wangu atakapowaongoza na kuwafikisha katika inchi ya Waamori, Wahiti, Waperizi, Wakanana, Wahivi na Wayebusi, nami nitawaangamiza wale wote.

²⁴ Musiiname mbele ya miungu yao kuiabudu, wala kuitumikia, wala musiige mambo yao. Lakini mutawaangamiza kabisa na kuvunjavunja nguzo zao.

²⁵ Mutanitumikia mimi Yawe, Mungu wenu, nami nitawabariki kwa chakula na maji na kuondoa magonjwa kati yenu.

²⁶ Hakutakuwa mwanamuke yeyote atakayepoteza mimba wala kuwa tasa katika inchi yenu. Nami nitawajalia maisha marefu.

²⁷ Nitapeleka kitisho mbele yenu na kuwavuruga watu wote mutakaowafikia. Waadui zenu nitawafanya wageuke na kuwakimbia.

²⁸ Nitatuma nyuki mbele yenu ambazo zitawafukuza Wahivi, Wakanana na Wahiti.

²⁹ Sitawaondoa watu wale katika mwaka mumoja, inchi isibakie tupu na nyama wa pori wasiongezeke sana na kuwazidia nguvu.

³⁰ Lakini nitawaondoa kidogokidogo mpaka pale mutakapoongezeka na kurizi ile inchi.

³¹ Mipaka ya inchi yenu itakuwa kutoka bahari Nyekundu mpaka bahari ya Mediteranea na kutoka jangwa mpaka muto Furati. Nitawatia wakaaji wa inchi ile katika mikono yenu, nanyi mutawafukuza wawaondokee.

³² Musifanye agano lolote nao, wala na miungu yao.

³³ Musiwaruhusu waishi katika inchi yenu wasiwasukume kutenda zambi mbele yangu. Maana kama mukitumikia miungu yao, hakika ile itakuwa mutego wa kuwanasa.