Kutoka 21 - BIBLIA Maandiko Matakatifu Kwa Watu Wote 2002

Maagizo juu ya watumwa

¹ Haya ndiyo maagizo utakayowapa Waisraeli:

² Ukimununua mutumwa Mwebrania, atakutumikia kwa miaka sita, lakini mwaka wa saba atakuwa huru na kuondoka, bila malipo.

³ Kama alinunuliwa mbele hajaoa, ataondoka peke yake. Lakini kama alikuja na muke wake, basi, ataondoka na muke wake.

⁴ Kama bwana wake alimwoea muke, akamuzalia watoto wanawake au wanaume, basi, yule mwanamuke na watoto wake watakuwa mali ya yule bwana wake na yule mutumwa ataondoka peke yake.

⁵ Lakini kama mutumwa yule akisema kwamba anamupenda bwana wake, muke wake na watoto wake na hataki kuondoka na kuwa huru,

⁶ basi, bwana wake atamuleta mbele ya Mungu. Kisha atamupeleka kwenye mulango au kwenye kizingiti na kumutoboa sikio lake kwa chuma chenye kuchongwa. Naye atamutumikia bwana wake maisha yake yote.

⁷ Mutu akimwuzisha binti yake kuwa mujakazi, yule hatapata uhuru wake kama watumwa wanaume.

⁸ Ikiwa yule bwana wake alimununua akuwe mumoja wa wake zake, kisha asipendezwe naye, yule bwana ataacha baba ya yule mujakazi amukomboe. Yule bwana hana haki ya kumwuzisha kwa watu wa mataifa mengine, akiwa amemudanganya.

⁹ Kama ataamua kumwoesha kwa mwana wake, atamutendea mujakazi yule kama vile binti yake.

¹⁰ Kama yule bwana akioa muke mwingine, anapaswa kuendelea kumutosheleza muke wake wa kwanza kwa chakula, nguo na haki zake za ndoa.

¹¹ Ikiwa yule bwana hatamutimizia haki hizo tatu, basi, muke ataondoka na kuwa huru bila malipo yoyote.

Maagizo juu ya uasi

¹² Anayepiga mutu na kumwua, hakika anapaswa kuuawa.

¹³ Lakini kama hakukuwa amemuvizia, lakini ni kwa musiba, basi, yule mwuaji ataweza kukimbilia usalama pahali nitakapowachagulia.

¹⁴ Lakini mutu akimushambulia mwenzake kwa makusudi na kumwua kwa werevu, hata kama akikimbilia kwenye mazabahu, mutamutoa kule kwenye mazabahu yangu na kumwua.

¹⁵ Anayemupiga baba yake au mama yake hakika atauawa.

¹⁶ Anayemukamata mutu kwa kinguvu kusudi amwuzishe au kumufanya mutumwa wake, hakika atauawa.

¹⁷ Anayemulaani baba yake au mama yake hakika atauawa.

¹⁸ Watu wawili wakigombana, kisha mumoja akamupiga mwenzake jiwe au ngumi bila kumwua, lakini akigonjwa na kubaki katika kitanda,

¹⁹ ikiwa yule aliyepigwa akisimama tena na kuweza kutembea kwa kutegemea fimbo, yule aliyemupiga atasamehewa. Lakini, atamulipa kwa ajili ya muda alioupoteza katika kitanda na kumutunza mpaka apone kabisa.

²⁰ Mutu akimupiga mutumwa wake au mujakazi wake kwa fimbo na kumwua palepale, hakika ataazibiwa.

²¹ Lakini mutumwa yule au mujakazi yule akibaki muzima siku moja au mbili, bwana wake hataazibiwa, maana yule alikuwa ni mali yake.

²² Wanaume wakipigana na kumwumiza mwanamuke mwenye mimba, hata mimba yake ikaharibika bila hasara ingine zaidi, yule aliyemwumiza atalipa feza kadiri mume wa mwanamuke yule atakavyodai na kama vile waamuzi watakavyoamua.

²³ Lakini kama kutakuwa hasara nyingine, basi, unapaswa kulipa uzima kwa uzima,

²⁴ jicho kwa jicho, jino kwa jino, mukono kwa mukono, muguu kwa muguu,

²⁵ kuchomwa moto kwa kuchomwa moto, kidonda kwa kidonda, na pigo kwa pigo.

²⁶ Mutu akimupiga mutumwa au mujakazi wake na kuliharibu jicho lake, anapaswa kumwachilia aende huru bila malipo kwa ajili ya jicho lake.

²⁷ Vilevile, akimupiga hata kumwongoa mutumwa wake au mujakazi wake jino, anapaswa kumwachilia huru kwa ajili ya jino lake.

Maagizo juu ya usalama wa wengine

²⁸ Ngombe akimupiga mutu pembe na kumwua, ngombe yule atauawa kwa kupigwa mawe na nyama yake haitakuliwa. Mwenye ngombe yule hatahukumiwa.

²⁹ Lakini kama ngombe yule amezoea kupiga watu pembe, na mwenye ngombe akaonywa lakini hakumufunga, kama ngombe yule akiua mume au muke, ngombe yule atapigwa mawe, na mwenye ngombe vilevile atauawa.

³⁰ Hata hivyo, yule mutu akilipishwa feza kwa kuokoa maisha yake, anapaswa kulipa kiasi kamili atakacholipishwa.

³¹ Ngombe akimupiga mutoto wa mutu mwingine kwa pembe, shauri hili litaamuliwa kwa njia hiyohiyo.

³² Kama ngombe yule akimupiga pembe mutumwa au mujakazi, mwenye ngombe atamulipa bwana wa yule mutumwa feza zenye bei ya shekeli makumi tatu na yule ngombe anapaswa kuuawa kwa kupigwa mawe.

³³ Mutu akiacha shimo wazi, au akichimba shimo kisha asilifunike, halafu ngombe au punda akatumbukia ndani,

³⁴ yule mwenye shimo lile anapaswa kulipa. Atatoa feza kwa mwenye nyama yule na nyama aliyekufa atakuwa wake.

³⁵ Ngombe wa mutu akimwumiza ngombe wa mutu mwingine na kumwua, basi, watu watamwuzisha yule ngombe aliyebaki muzima na kugawayana bei yake. Vilevile watagawayana yule ngombe aliyekufa.

³⁶ Lakini kama yule ngombe alikuwa amezoea kupiga wengine pembe na mwenye ngombe yule hakumufunga, yeye atalipa ngombe kwa ngombe na yule ngombe aliyeuawa atakuwa wake.

³⁷ Mutu akiiba ngombe au kondoo na kumuchinja au kumwuzisha, atalipa ngombe watano kwa kila ngombe na kondoo wane kwa kila kondoo.