YUHANI 15 - Ha`bari Ndjema ya I Maore

Insa ɗe muzaɓiɓu wa kweli

¹ «Wami ɗe umuzaɓiɓu wa kweli, na Ɓaɓangu ɗe umulimizi.

² Kula trahi hanguju kalisudza mavuna, waye ulitoa, na kula lidzao mavuna, waye uliav̄usa, pare lizidi udza.

³ Wanyu madza murahatsiwa ha siɓaɓu ya urongozi namuambianiwo.

⁴ Namuɓaki hari mwa uv̄umoja na wami, na wami nitsoɓaki hari mwa uv̄umoja na wanyu. Mauri ɗe inamuna trahi kalishindri ladza mavuna ha iwalo yalo neka kalaɓaki hari mwa likoho la umuzaɓiɓu, ɗe ha inamuna iyo tsena wanyu, neka kamusuɓaki hari mwa uv̄umoja na wami.

⁵ Wami ɗe umuzaɓiɓu, wanyu ɗe yamarahi. Mutru aɓakio hari mwa uv̄umoja na wami, na wami niɓakio hari mwa uv̄umoja na waye, uwo uv̄inga mavuna mengi. Mana neka tsi na wami, kamushindri ufanya itsokao yotsi.

⁶ Neka mutru kasuɓaki hari mwa uv̄umoja na wami, waye ulatswa v̄ondze mauri ɗe litrahi, na lilo uhuma; amwesa yamarahi yao ungulidziwa, uvutswa moroju yavudzwa.

⁷ Neka musuɓaki hari mwa uv̄umoja na wami, na marongozi yangu yasuɓaki moni hanyu, namumiye yotsi mutsahao, na wiyo mutsotakaɓaliwayo.

⁸ Tsini itrongo iv̄ingao utukufu ha Ɓaɓangu, ɗe wanyu uv̄inga mavuna ha uwengi, na v̄av̄o mutsodhiɓitisha amba wanyu maswihaɓa yangu.

⁹ Mauri ɗe inamuna Ɓaɓangu aniv̄endza, wami wajau tsimuv̄endzeni. V̄av̄o namuɓaki hari mwa uv̄endza yangu.

¹⁰ Neka musutuĩ ãmuri zangu, mutsoɓaki hari mwa uv̄endza yangu, mauri ɗe inamuna natuĩ ziãmuri za Ɓaɓangu, tsena niɓakio hari mwa uv̄endza yahe.

¹¹ Tsimuambiani trongo zini, ile pare furaha yangu ike hanyuju, na furaha yanyu ikamilishihe.

¹² Tsini iãmuri yangu: namuv̄endzane wanyu na wanyu, mauri ɗe inamuna namuv̄endzani.

¹³ Kav̄u uv̄endza muɓole rahana mutru uv̄a uhayati wahe ha siɓaɓu ya wandzani wahe.

¹⁴ Wanyu wandzani wangu, neka musufanya izo nimuãmurishaoni.

¹⁵ Tsisumuhirani tsena warumizi, mana murumizi kaji trongo murumisa wahe aifanyao. Ɓadi tsimuhirini wandzani, mana tsimujudzani piya izo nakia ha Ɓaɓangu.

¹⁶ Wanyu tsi ɗe mwanitsahua, ɓadi wami ɗe namutsahuani, tsena namuhetsini mwendre muv̄inge mavuna, na mavuna yanyu yaẽshi, pare trongo yotsi mutsomumiao Ɓaɓa ha lidzina langu, amutakaɓaliyeniyo.

¹⁷ Trongo nimuãmurishaoni, ɗe wanyu uv̄endzana.»

Uengefu wa lidunia ha Insa na watru wahe

¹⁸ «Neka lidunia lisumuengani, namujuwe amba linienge kaɓula lilo umuengani.

¹⁹ Na djeli muka wa lidunia, lidunia latsomuv̄endzani amba wa wilo. Na wanyu tsi wa lidunia, ɓadi tsimutsahuani hari mwa lidunia; iyo ɗe imana ata lidunia limuengaoni.

²⁰ Namunahane urongozi namuambianiwo: ‹Murumishi tsi muɓole rahana murumisa wahe.› Neka wanitrese, watsomutresani wajau. Na neka watuĩ urongozi wangu, watsotuĩ wajau wanyu.

²¹ Ɓadi watsomufanyiani piya trongo zizo ha siɓaɓu ya lidzina langu, mana kawasujua Uwo aniv̄eleha.

²² Na djeli tsaka naja, tsena tsaka nawarongodza, kawatsokana dhambi. Ɓadi av̄asa kawashindri upara siɓaɓu ya udziv̄a haki lidhambi lawo.

²³ Monyewe unienga, asumuenga wajau Ɓaɓangu.

²⁴ Na djeli tsaka nafanya hari mwawo zitrendro zilio amba kav̄u ata mutru wangina azifanya, kawatsokana dhambi. Ɓadi v̄anu waziono, amwesa warienge, wami na Ɓaɓangu.

²⁵ Ɓadi zini zija pare utsimidzihe urongozi waangihwa moni na iSharia yawo amba: ‹Wanienge ɓila siɓaɓu.› »

²⁶ «Wakati uMusaidizi atsojao, uwo nitsomuv̄elesheaniwo ulawa ha Ɓaɓa, ne ɗe iRoho ya ukweli ilawao ha Ɓaɓa, atsonilawia ushahidi.

²⁷ Na wanyu wajau mutsolawa ushahidi, mana mwa na wami rangu umwandro.»