TITUSA 1 - Ha`bari Ndjema ya I Maore

¹ Wami Ɓaulusu, murumishi wa Mungu amma Muv̄ingizi-Risala wa Insa-Kristi amba niv̄inge wao watsahulwa na Mungu hari mwa uaminifu na ujuzi wa ukweli walingana na iĩɓada.

² Ukweli uwo, ɗe itama ya uhayati mukamilifu wa daima, watolwa wahadi kaɓula ya umwandro wa yimida na Mungu tsi murongoa-trambo.

³ Ɓasi hari mwa uwakati wahe, av̄enua Urongozi wahe ha ndzia ya haɓari ilio amba tsidhwaminishiwayo ulawana na iãmuri yahe waye Mungu, Muhuyifu watru.

⁴ Nisuhuangishia wawe Titusa, mwana wangu wa kweli hari mwa uaminifu watru shirika: Rehema na utrulivu zilawao ha Mungu amma Ɓaɓa v̄umoja na Kristi-Insa, Muhuyifu watru, nazihuendreleye.

Hazi za Titusa hari mwa iDjama Ndziwaminifu ya Kireta

⁵ iMana ata nahulisha shisiwani Kireta, ɗe amba utriye ndziani izo zaka zaɓaki za urengeledza, tsena uhetsi waɓole hari mwa iDjama Ndziwaminifu ya kula ɗago, ha uɗunga zitaratiɓu nahuv̄a.

⁶ Muɓole wa Djama Ndziwaminifu alazimu ake ɓila tuhuma, mume wa mutrumushe moja, wana wahe wake waaminifu tsena wasurongolwe na taɓia mbi, wala yaka amba tsi watuĩvu.

⁷ Kweli amba dhwamana wa Djama Ndziwaminifu, rangu alio mushangirizi wa Mungu, alazimu ake ɓila tuhuma. Kalazimu aka mwendza hanyo, mwendza hasera, mulevi, mumani, wala adziparia ha namuna kayalazimu.

⁸ Ɓadi nake mukariɓisa, muv̄endza izo zilio ndjema, muelevu, mutru wa haki, mutwaharifu, mutru ashindrao adziziye,

⁹ afungamanihe na ĩlimu ya kweli ha inamuna yasomedzewa, pare ashindre atriye ɓari ha umusomo mwema na uharalia wao walio kinyume.

¹⁰ Kweli amba v̄wa wengi kawatuĩ itsokao yotsi, wendza marongozi kayana faida na wadjandja, hususwani hari mwa wao waɗungao trongo za matahiri.

¹¹ Walazimu waɓalwe zihanyo. Wao uangamidza miraɓa mikamilifu ha usomedza trongo kazalazimu; na iyo, ile wapare faida zendza aĩɓu.

¹² Ata moja mengoni mwawo alio mutrume hawo, arongoa: «Makireta ha dahari wanafiki, zinyama za peu, mav̄endzoɗya wendza shiɗa.»

¹³ Ushahidifu uwo kweli. Ɓasi warudi ha uhali, ile pare wakane uaminifu muzuri,

¹⁴ ɓadi wasushahilihe na mahadisi yatrungwa ya shiUyahudi na ãmuri za watru wapotezao ukweli.

¹⁵ Kula shitru ndziraharifu ha wao walio waraharifu, ɓadi kav̄usi yarahara ha wao waliona utshafi, amwesa kawana uaminifu; ãkili yawo na likoho la unamuzi lawo zingia utshafi.

¹⁶ Wasurongoa amba wasumujua Mungu, ɓadi wasumuhara ha zitrendro zawo. Wafanyiha walaãnifu, kawatuĩ itsokao yotsi, ɓila kawashindri ufanya ata shitrendro ndjema.