MUV̄ENULIO 8 - Ha`bari Ndjema ya I Maore

Mupulio wa iliti ya saɓa

¹ Upua yahe iliti ya saɓa, v̄ufanyiha zi pev̄oni mukaɓala wa muda wa nusu ya sa.

² Amwesa tsiono malayika saɓa zile zihimi mbeli za Mungu, tsena ziv̄olwa maɓaragumu saɓa.

³ V̄uja malayika yangina, ihimi talatalaju mwa sadaka, na wiyo isiki shieredzo ya dhahaɓu. Iv̄olwa uɓani ha uwengi pare autamaniye v̄umoja na yamamilio ya piya uwatwaharifu hari mwa italatala ya dhahaɓu ile mbeli na ishiri ya ufalume.

⁴ uMwesi wa uɓani uhea mbeli za Mungu ulawa muhononi ha imalayika v̄umoja na yamamilio ya uwatwaharifu.

⁵ Ɓaanda ya v̄ale imalayika irenge ishieredzo-uɓani, aijadza moro wa italatala, amwesa aivutsu shiv̄andreju mwa tsi. Sa ile v̄ukiliha maguguma, maji, peni, na mudridrimio wa ishiv̄andre ya tsi.

Malayika nne za handra zisuvudzia yamaɓaragumu

⁶ Ɓasi zimalayika saɓa zile zaka zasika yamaɓaragumu saɓa zakodzitayarisha ya uyavudzia.

⁷ Ya handra ivudzia ɓaragumu layo. Na v̄ale v̄ushuku vua yafa ɓwe na moro zatsangana na damu, zipulisiwa shiv̄andreju mwa tsi. liFungu la raru la ishiv̄andre ya tsi livudzwa, lifungu la raru la yimiri livudzwa, na piya malavu maitsi yavudzwa.

⁸ iMalayika ya v̄ili ivudzia liɓaragumu. Ɓasi shitru mauri mulima muɓole wakovua na moro uvutswa ɓaharini. liFungu la raru la iɓahari lifanyiha damu,

⁹ na lifungu la raru la ziziumbe zendza roho zaka ɓaharini zifu, tsena lifungu la raru la zimarikaɓu ziangamidziwa.

¹⁰ iMalayika ya raru ivudzia ɓaragumu layo. Na v̄ale nyora ɓole yakowala mauri shizinga ya moro ipuliha ulawa mbinguni, tsena ipuliha hari mwa lifungu la raru la yimiro na hari mwa yamatso ya maji.

¹¹ Na lidzina la inyora ini Siɓiri. liFungu la raru la yamaji yafanyiha nyongo, amwesa wengi wa wanadamu wafu ha yamaji yafanyiha nyongo.

¹² iMalayika ya nne ivudzia liɓaragumu. Ɓasi lifungu la raru la lijua liremwa, v̄umoja na lifungu la raru la umwezi, na lifungu la raru la zinyora, ile lifungu la raru lazo lifanyihe shidza, na lifungu la raru la umutsana lilawe iheu yalo, na uuku wajau.

¹³ Tsiangalia, ɓasi tsikia kwezi lakov̄euha hari-hari na uwingu, tsena lakoshelemedza ha ji lendza nguvu: «Maondo, maondo, maondo ha uwakazi wa ishiv̄andre ya tsi ha siɓaɓu ya zingono zasalia za maɓaragumu yajovudziwao na zimalayika traru!»