MUV̄ENULIO 10 - Ha`bari Ndjema ya I Maore

Nida yahusu malayika na umwana shio av̄erwa

¹ Amwesa tsiono malayika yangina yendza ushindzi, yakoshuka ulawa pev̄oni, yaka yapindra vingu na shitswa yayo ika izingidziwa na mukakamba. Uso wayo uka mauri ɗe lijua, na yimindru yayo mauri ngidzo za moro.

² Ika isiki muhononi mwana shio aka aɓuha. Ika ihetsi umundru wa hume ɓaharini, na umundru wa potro shiv̄andreju mwa tsi.

³ Amwesa ishelemedza ha ji lendza nguvu, mauri simba ingurumao. Ushelemedza yayo, yamaguguma saɓa yahedza maji yawo.

⁴ Wakati maguguma saɓa yale yalagua, nakwendra amba niangihe, ɓadi tsikia ji lalawa pev̄oni amba: «Sikidza liti izo zarongolwa na yamaguguma saɓa yale, ɓadi usuziangihe.»

⁵ Ɓasi imalayika naiona yaka yahima uju na iɓahari na uju na ishiv̄andre ya tsi, ihedza umuhono wa hume pev̄oni,

⁶ amwesa ilav̄a na Uwo aẽshio ha daima, aumba uwingu na izo zilio moni hawo, ishiv̄andre ya tsi na zilio moni hayo, iɓahari na zilio moni hayo, amba: wakati ukomo!

⁷ Ɓadi hari mwa zisuku imalayika ya saɓa itsojao ivudziye liɓaragumu layo, iãdjaɓu ya shi Mungu itsotsimidziha ha uɗunga izo ajudza warumishi wahe, ne ɗe yimitrume.

⁸ Amwesa liji naka nalikia ulawa pev̄oni lilagua tsena na wami ha urongoa: «Endra warenge umwana shio aɓuha muhononi ha imalayika yahima uju na iɓahari na uju na ishiv̄andre ya tsi.»

⁹ Ɓasi tsendre tsipara imalayika, tsena tsiiambia iniv̄e umwana shio. Sa ile iniambia: «Irenge, amwesa uiɗye. Itsotria nyongo mimbani haho, ɓadi hanyoni haho itsoka ngizi mauri ya nyoshi.»

¹⁰ Tsirenge umwana shio muhononi ha imalayika, amwesa tsimuɗyi. Hanyoni hangu ika ngizi mauri ya nyoshi, ɓadi wakati naiɗya, mimba yangu ingia nyongo.

¹¹ Ɓas tsiambilwa: «Ilazimu raha ulaguwe shi mutrume ashukidziwa marongozi yahusu uwengi wa umati, wa nishani, wa luha, na wafalume.»