MATIYO 4 - Ha`bari Ndjema ya I Maore

Insa asudjereɓiwa na Shetwani

¹ Ɓas Insa av̄ingwa na iRoho Ndzitwaharifu padzaju, ile adjereɓiwe na Iɓilisa.

² Iv̄o afunga suku aruɓaini mauku na mitsana, mwisoni akoona ndza.

³ V̄ale uMuzainifu aja amuambia: «Neka wawe ɗe uMwana wa Mungu, ãmurisha mawe yao yagauhe madipe.»

⁴ Insa amudjiɓu: «V̄uangihwa: ‹Mwanadamu katsoẽshi ha dipe tu, ɓadi ha kula urongozi ulawao hanyoni ha Mungu.› »

⁵ Amwesa Iɓilisa amuv̄ingi hari mwa liɗago dzitwaharifu, amuhedza v̄ahali uju rahana uju v̄wa iNyumba Ndzitwaharifu,

⁶ amuambia: «Neka wawe ɗe Mwana wa Mungu, dzipulise utsini hule; mana v̄uangihwa: ‹Atsoãmurisha malayika zahe ju laho, zitsohukalilia mihononi hazo, ile pare mundru waho usukwale hari mwa ɓwe.› »

⁷ Insa amudjiɓu: «V̄uangihwa wajau: ‹Kutsomudjereɓu Mwalaho Monyezi Mungu.› »

⁸ Amwesa ulawa v̄ale, Iɓilisa amuv̄ingi raha uju na mulima mundra halisi, amuonesa piya zingufalume za ulemenguni na utukufu wazo,

⁹ amuambia: «Zile piya nitsohuv̄azo, neka usunisudjudia na uniãɓudu.»

¹⁰ Sa ile Insa amuambia: «Lawa v̄anu Shetwani! Mana v̄uangihwa: ‹Utsomuãɓudu Mwalaho Monyezi Mungu, na umurumishia ɗe waye tu ɓas.› »

¹¹ Ɓas Iɓilisa amulawia, na malayika zija zimupara, zakomurumishia.

Insa asuandrisa hazi zahe Galilaya

¹² Wakati Insa akia amba Yahaya|Yahaya Muɓaĩshizi afungwa, alawa andre Galilaya.

¹³ Alawia iNazareti, andre aketsi Kafarnaumu, ɗago laka wangoni na iƁahari, mukaɓala wa Zaɓuluna na Nafutali.

¹⁴ Ha izo, zaka zarongolwa na mutrume Izaya zija zitsimidziha:

¹⁵ «Wanyu umura wa Zaɓuluna na wa Nafutali, mikaɓala djirani na iɓahari, nyambo ya umuro wa Jurdani, Galilaya, v̄ulio nishani tsi Mayahudi!

¹⁶ Umati ulio shidzani uono nuru ɓole, na wao waka hari mwa umukaɓala wa ishivuli ya ufa, nuru iwawalia.»

¹⁷ Rangu v̄ale Insa aandrisa uĩdhia ha urongoa: «Namwendre toɓa, mana Utawalizi wa Monyewe ziMbingu ukuruɓia!»

Insa asuhira walozi wanne wamuɗunge

¹⁸ Suku mengoni mwa suku, Insa akov̄ira wangoni na iƁahari ya Galilaya|Ɓahari ya Galilaya. Ɓas, v̄ale aono wananya waili, Simoni akohiriwa Monye, na Andreasa mwananyahe, wakovutsa wavu ɓaharini, mana waka walozi.

¹⁹ Sa ile awaambia: «Namuniɗunge, na wami nitsomufanyani walozi wa wanadamu.»

²⁰ Sa na isa ile walishi wavu zawo, wamuɗungu.

²¹ Utsengelea yahe mbeli, aono wananya waili wangina ne ɗe Yakoɓu mwana wa Zuɓudu, na mwananyahe Yuhani. Waka moni na laka yawo v̄umoja na ɓaɓawo Zuɓudu, wakorengeledza wavu zawo. Ɓas awahiri.

²² Sa ile kamwe walishi ilaka na ɓaɓawo, wamuɗungu.

Insa asusomedza na uzihira hari mwa liɓavu la Galilaya

²³ Insa akov̄ira hari mwa piya iGalilaya ha usomedza moni na ziNyumba za Uswali, na ujudza iHaɓari Ndjema ya Utawalizi wa Mungu; tsena akozihira kula uwaɗe na shifeli watru wakanazo.

²⁴ Ɓas, sifa zahe zienea hari mwa piya iSiriya. Akov̄ingiwa piya wao wakokodza na kula aina ya uwaɗe na utungu, rangu wendza mazetwani, wendza kifafa, ata wafa uv̄andre, na waye akowazihira.

²⁵ Dunia nyengi yakomuɗunga ulawa Galilaya, Dekapoli, Yerusalemu, Yudeya, na nyambo ya Jurdani.