MAROMU 7 - Ha`bari Ndjema ya I Maore

Maeledzo yarengwa hari mwa mufano wa ndrolo

¹ Wananyangu, afa kamusujua amba iSharia utawalia mutru tu v̄ale alio hayi? Mana v̄anu nisulagua na watru wajuao iSharia.

² Ha mufano, iSharia iyo ufungamanisa mutrumushe na mume wahe piya wakati mutrumume ule alio hayi; ɓadi neka umutrumume afu, v̄ale umutrumushe aɓuliwa na iSharia yakomufungamanisa na mutrumume wahe ule.

³ Ɓasi ha izo, neka andre adziv̄a mutru wangina wakati mume wahe alio hayi, v̄av̄o atsorongolwa amba muzindzi. Ɓadi neka mume wahe afu, v̄ale aɓuliwa na iSharia, tsena amololwa na mutru wangina katsoka muzindzi.

⁴ Ɗe ha inamuna iyo wanyu wajau wananyangu: mufu mbeli za iSharia ha uv̄umoja wanyu na umwili wa Kristi, pare av̄asa muke wa mutru wangina, ule aregezewa hayi ulawa ha uwafu, ile pare rimuv̄ingiye Mungu mavuna.

⁵ Mana wakati raka ratawaliwa na zitaɓia za shi unadamu zatru, zingushauku za ufanya dhambi zitsongeshewao na iSharia zakoruma ziga za umwili watru, ha namuna amba rakotoa mavuna yav̄ingao hari mwa ufa.

⁶ Ɓadi av̄asa riɓuliwa mbeli za iSharia, mana rifu ha itrongo ile yakorifunga, ha namuna amba av̄asa risumurumishia Mungu ha utawalizi muv̄ia wa iRoho, ɓadi tsi ɗe ha indzia ya utawalizi wa hale, ne ɗe iSharia yaangihwa.

iSharia isuriv̄enulia lidhambi

⁷ Ɓasi v̄anu rirongowe jeje? Amba Sharia, lilo dhambi? Ata hata! Ɓadi tsatsojua amba dhambi ɗe liv̄i, neka tsi ha iSharia. Mana tsatsojua amba udzihafukanisa iyo mbovu, na djeli iSharia kayaka yarongoa: «Usudzihafukanise.»

⁸ Ɓadi ha iãmuri ile, dhambi lipara nafasi ya utsonga kula namuna ya uhafukanifu moni hangu. Mana neka kav̄u Sharia, v̄av̄o dhambi lifu.

⁹ Hale oho, ɓaanda raha iSharia kayaka, tsika hayi. Ɓadi wakati iSharia yaja, v̄av̄o dhambi liv̄enuha amba la hayi,

¹⁰ na wami tsifu. Mana iãmuri yakolazimu iv̄inge uhayati, hanguju iniv̄ingia ufa.

¹¹ Mana dhambi lipara inafasi linidanganya, ha ndzia ya iãmuri, na ha indzia ya iãmuri, liniulu.

¹² V̄av̄o kweli amba iSharia ya ndzitwaharifu, na iãmuri wajau ya ndzitwaharifu, ya haki, tsena ndzuzuri.

¹³ Ɓasi v̄anu trongo ndzuzuri ile ɗe hanguju yafanyiha ufa? Ata hata! Ɓadi lidhambi, ha indzuzuri ɗe laniv̄ingia ufa, ile liv̄enuhe na udhambi walo, pare ha indzia ya iãmuri lidhambi lizidi uv̄enuha amba dhambi.

Moni ha mwanadamu v̄wa kondro kinyume na dhambi

¹⁴ Risujua amba Sharia, iyo trongo ya shiroho; ɓadi wami shiumbe mwendza mwili, tsa murumwa wa dhambi.

¹⁵ Tsisuelewa trongo niifanyao. Mana tsisufanya iyo niitsahao, ɓadi iyo niiengao ɗe niifanyao.

¹⁶ Neka iyo niifanyao ɗe ile tsisutsaha, v̄av̄o tsikuɓali amba Sharia, iyo ndjema.

¹⁷ Ɓasi ha izo, tsi tsena wami ɗe nifanyao trongo iyo, ɓadi ɗe lidhambi lilio moni hangu.

¹⁸ Nisujua amba kav̄u ndjema ilio moni hangu, yaãni v̄av̄o, hari mwa ihali ya shiuɓinadamu yangu. Kweli amba inia ya ufanya ndjema ya v̄av̄o, ɓadi ushindzi wa uifanya ɗe kav̄u.

¹⁹ Mana tsisufanya indjema niitsahao, ɓadi nisufanya imbovu ile tsisuitsaha.

²⁰ Na neka nisufanya iyo tsisuitsaha, v̄av̄o tsi wami ɗe niifanyao, ɓadi ɗe lidhambi lilio moni hangu.

²¹ Ha izo, tsimaizi isharia ini hanguju: namotsaha nifanye ndjema, mbovu ɗe inijiliao.

²² Mana moni na umo wangu, wami ujiv̄iwa na iSharia ya Mungu.

²³ Ɓadi nisuona sharia yangina hari mwa ziga za umwili wangu iwanao kinyume na ile ya iãkili yangu, na isharia iyo isunifanya mufungwa wa isharia ya dhambi ilio hari mwa ziga za umwili wangu.

²⁴ Masikini wami! Mbani ɗe atsonikomboao na umwili unu univ̄ingao hari mwa ufa?

²⁵ Natukuzihe Mungu, ha ndzia ya Insa-Kristi Raɓi watru! Ha izo ɓasi, ini ɗe iheli nilio: wami-wami ha iãkili yangu, tsa murumwa wa iSharia ya Mungu, na ha ihali ya shiuɓinadamu yangu, murumwa wa isharia ya dhambi.