MAKOLOSIYA 4 - Ha`bari Ndjema ya I Maore

¹ Wanyu warumisa, namurendreye warumwa wanyu ha namuna yaondzoha tsena ya haki, ha ujua amba wanyu wajau muna Mola pev̄oni.

Maosio yangina

² Namudziv̄e iwanyu yanyu ha yamamilio; namushese ha uendrelea nayo, v̄umoja na himida.

³ Namurimiliye wasi wajau, ile Mungu ariɓuliye mulongo wa ujudza Urongozi wa iãdjaɓu yahusu Kristi, ilio amba ha siɓaɓu ya wiyo ɗe nafungwa.

⁴ Ɓasi namunimiliye niirongowe mauri ɗe inamuna yalazimu niirongowe.

⁵ Namudziv̄inge v̄umoja na hikima mbeli za wao walio v̄ondze. Namurumiye ha uzuri uwakati mulionawo.

⁶ Ha daima marongozi yanyu nayake yendza neema, tsena yendza ladha, ile mujuwe namuna yalazimu mudjiɓu kula mutru.

Masalamu ya mwiso

⁷ Hari mwa izo zanihusu, umwananya wa shi uaminifu muv̄endzewa Tihikusa, alio murumishi muaminifu amma munyangu wa hazi hari mwa uv̄umoja na Raɓi, atsomujudzani kula trongo.

⁸ Nisumuv̄elesheaniwo ha kusudi ile mujuwe ihali yatru, na tsena amutriyeni ɓari ziroho.

⁹ Nisumuv̄eleha v̄umoja na umwananya muv̄endzewa tsena muaminifu Onesimu, alio wa shi hanyu. Watsomujudzani piya zihidjirio hunu.

¹⁰ Aristarkusa, munyangu wa shiv̄a, asumusalimuni, waye v̄umoja na Markusi, mudjamaza wa Ɓarnaɓasi. Waye uwo madza mupara malagidzo yamuhusu: amoja hanyu, namumurenge ha uzuri.

¹¹ Insa ahiriwao Yustusu, asumusalimuni wajau. Hari mwa wao watahiriwa, ɗe wao tu ɗe wafanyao hazi na wami ha tanafu ya Utawalizi wa Mungu; na hanguju wakonitrulidza iroho.

¹² Eɓafrasu alio wa shi hanyu, asumusalimuni; murumishi wa Kristi-Insa uwo asudzisonga dahari ha umufanyiani mamilio, ile musike hodari ɓaanda mwakamilishiha, na ukana yakini yaswafishiha na mav̄endzeleo ya Mungu.

¹³ Wami nisumulawia ushahidi amba asudzisonga ha kusudi ha siɓaɓu ya wanyu, ha siɓaɓu ya wa shi Laodiseya, tsena na wa shi Hiyerapulisu.

¹⁴ Lukasi, twaɓiɓu muv̄endzewa watru, asumusalimuni v̄umoja na Demasu.

¹⁵ Namusalimu uwananya wa shi uaminifu walio Laodiseya, v̄umoja na Nimfasi na iDjama Ndziwaminifu ilio muraɓani hahe.

¹⁶ Wakati itsokao amba musomo liɓarua lini, namufanye namuna ata lisomwe wajau hari mwa iDjama Ndziwaminifu ya Laodiseya, na wanyu tsena musome lilo litsolawao Laodiseya.

¹⁷ Namuambiye Arkiɓusa: «Dzifahamishe na urumishi waupara ulawa ha Raɓi, pare uutsimidze.»

¹⁸ Salamu la umuhono wangu wami Ɓaulusu tsilini. Namunahane zifungo za silisili zangu. Urehema naumuendreleyeni.