MAGALATWIYA 1 - Ha`bari Ndjema ya I Maore

¹ Wami Ɓaulusu, Muv̄ingizi-Risala, trongo kayalawa ha wanadamu, wala ha indzia ya mwanadamu, ɓadi ha Insa-Kristi|Insa na Mungu Ɓaɓa, amuregeza hayi ulawa ha uwafu,

² na piya wananya wa shi uaminifu walio na wami, risumuangishiani wanyu ziDjama Ndziwaminifu za Galatwiya:

³ Rehema na amani nazimuendreleyeni ulawa ha Ɓaɓatru Mungu na Raɓi Insa-Kristi,

⁴ alio amba adzitoa fidia ha isiɓaɓu ya madhambi yatru, ile arikombowe na uwakati movu wa leo unu, ha uɗunga ya mav̄endzeleo ya Mungu watru amma Ɓaɓatru.

⁵ Natukuzihe daimani aɓada. Amina.

Kav̄u Haɓari Ndjema yangina

⁶ Nisushanga ha upesi trini muɓauhao Uwo alio amba amuhirini ha ineema ya Kristi, ha uendra hari mwa Haɓari Ndjema yangina.

⁷ Tsi amba v̄wa Haɓari Ndjema yangina, ɓadi v̄wa wamuɓaɓanisaoni, watsahao wagaudze iIndjili ya Kristi.

⁸ Ɓadi neka v̄wa mutru, wala ukana ɗe wasi, au malayika yalawa pev̄oni, amba asumujudzani Haɓari Ndjema yangina na ile ramujudzaniyo, ɓasi nalaãniwe.

⁹ Madza riirongoa, tsena risurudi riirongowe raha av̄asa: neka v̄wa mutru amujudzaoni Haɓari Ndjema yangina na ile mwaipara, ɓasi v̄av̄o nalaãniwe!

¹⁰ Ɓasi av̄asa, hali v̄anu nisutsaha muhakisho wa wanadamu, au wa Mungu? Hali nisutsaha nijiv̄idze wanadamu? Na djeli nakotsaha raha nijiv̄idze wanadamu, tsatsoka murumishi wa Kristi.

iNamuna Ɓaulusu adhwaminishiwa Uv̄ingizi-Risala

¹¹ Nisumuhakikishani, wananyangu, amba iIndjili nakoijudza, tsi ya shiuɓinadamu.

¹² Mana tsaipara ha mwanadamu, wala tsasomedzewayo na mwanadamu, ɓadi Insa-Kristi ɗe aniv̄enuliayo.

¹³ Kweli amba madza mukia maendreleo yangu moni na idini ya shi Uyahudi|Muyahudi nyuma oho, namuna jeje nakotresa iDjama Ndziwaminifu ya Mungu, ha utsaha niiangamidze.

¹⁴ Hari mwa itrongo ya uɗunga idini ya shi Uyahudi, nakov̄iria hirimu zangu nyengi wa kaɓila moja na wami, mana tsikana djitihadi ɓole zaidi na zimila za wadzaɗe wangu.

¹⁵ Ɓadi wakati Mungu atsaha wamopara, waye alio amba anitsahua rangu mimbani ha mayangu, tsena anihira ha urehema wahe

¹⁶ wa univ̄enulia uMwana wahe, ile nimujudze ha uwatru wa zinishani zangina kazimuji Mungu, ɓasi wakati uwo tsatsaha shauri ha mutru atsokao yotsi,

¹⁷ ɓila ata uhea Yerusalemu amba naone wao waka Mav̄ingizi-Risala|Risala kaɓula ya wami, tsilawa tsendre Araɓiya, amwesa tsiregea Damasko.

¹⁸ Ɓaanda ya maha miraru, tsihea Yerusalemu namujuwe Monye, tsena tsiɓaki suku kumi na tsano hahe.

¹⁹ Tsaona ata Muv̄ingizi-Risala wangina neka tsi ɗe Yakoɓu, mwananyahe wa Raɓi.

²⁰ Trongo zini nimuangishiaoni, nisumuambiani mbeli za Mungu amba tsisurongoa trambo.

²¹ Ɓaanda ya v̄av̄o, tsilawa tsendre hari mwa yimikaɓala ya Siriya na Silisiya.

²² Na v̄av̄o tsakojulihana sura na ziDjama Ndziwaminifu za Yudeya zilio ha Kristi.

²³ Ɓadi waka wakia tu amba: «Mutru ule akoritresa hale hule, av̄asa asuĩdhia uaminifu ule akotsaha auangamidze.»

²⁴ Na wao wakomutukuza Mungu ha siɓaɓu ya wami.